បាត់ដំបង ៖ កម្មករស៊ីឈ្នួលបាញ់ស្មៅចំនួន៥នាក់ បានរងរបួសធ្ងន់ ស្រាល ព្រមទាំងបានបញ្ជូនទៅកាន់មន្ទីរពេទ្យ ដើម្បីសង្គ្រោះផងដែរ បន្ទាប់ពីពួកគេបាននាំគ្នាផឹកស្រាស ក្រោយសម្រាកពីការងារ ហើយបានចាប់ច្រឡំយកដបថ្នាំបាញ់ស្មៅមកផឹក ដោយសារតែពួកគេដាក់ដបទាំងពីរនេះនៅក្បែរគ្នា។
ហេតុការណ៍នេះបានកើតឡើងកាលពីថ្ងៃទី១២ ខែវិច្ឆិកា ឆ្នាំ២០១៥ វេលាម៉ោង៧ និង៣០នាទីយប់ ត្រង់ចំណុចភូមិអូរតាសុខ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ត្រង់ចំណុច ដែលពួកគេស្នាក់នៅ រហូតធ្វើឲ្យមានការភ្ញាក់ផ្អើលដល់ម្ចាស់ចម្ការ និងកម្លាំងកងរាជអាវុធហត្ថស្រុក ដោយបាននាំគ្នាបញ្ជូនជនរងគ្រោះទាំង៥នាក់យ៉ាងបន្ទាន់ដើម្បីទៅសង្គ្រោះ។
យោងតាមរបាយការណ៍របស់មូលដ្ឋានកងរាជអាវុធហត្ថស្រុកភ្នំព្រឹក បានឲ្យដឹងថា នៅមុនពេលកើតហេតុ គឺមានកម្មករចំនួន៥នាក់ ដែលមានមុខរបរស៊ីឈ្នួលបាញ់ស្មៅឲ្យម្ចាស់ចម្ការត្រង់ចំណុចខាងលើ ហើយបានស្នាក់នៅក្នុងទីតាំងខាងលើ ដែលពួកគេទាំងអស់មកពីភូមិអូរ ឃុំពេជ្រចិន្ដា ស្រុកភ្នំព្រឹក បាននាំគ្នាទិញស្រាស មកផឹកជាមួយគ្នា ដោយពួកគេមិនបានចាប់អារម្មណ៍អំពីដបថ្នាំដែលដាក់នៅក្បែរនោះឡើយ។
របាយការណ៍បានបន្តថា លុះការផឹកស៊ីបែបចង់ធ្លាក់ភ្នែកទៅហើយនោះ ក៏ស្រាប់តែពួកគេបានចាប់ច្រឡំដប គឺទៅយកដបទឹកថ្នាំសម្រាប់បាញ់សម្លាប់ស្មៅមកចាក់ផឹកទៅវិញ ដែលបណ្ដាលឲ្យមានការពុលបែកពពុះមាត់ទាំងអស់គ្នា ទើបធ្វើឲ្យមានការភ្ញាក់ផ្អើល ដោយកម្មករទាំង៥នាក់នោះមានឈ្មោះ ១ សី ទក ភេទប្រុស អាយុ២៨ឆ្នាំ ស្រាល២ កង ថា ភេទប្រុស អាយុ៣០ឆ្នាំ ធ្ងន់ ៣ សុំ សៅ ភេទប្រុស អាយុ២៨ឆ្នាំ ស្រាល៤ ម៉េង ហេង ភេទប្រុស អាយុ៣៨ឆ្នាំ ធ្ងន់ និង៥ឈ្មោះ សួន ធូ ភេទប្រុស អាយុ២៨ឆ្នាំស្រាល។
បច្ចុប្បន្នពួកគេទាំង៥នាក់ គឺកំពុងសម្រាកព្យាបាល នៅក្នុងមន្ទីរពេទ្យ ដោយក្រុមគ្រូពេទ្យកំពុងតែជួយសង្គ្រោះយ៉ាងយកចិត្តទុកដាក់ និងផុតពីគ្រោះថ្នាក់ហើយ ទាំងនេះ គែជាការធ្វេសប្រហែសរបស់ពួកគេដែលរៀបចំការផឹកស៊ីមិនមានការប្រុងប្រយ័ត្ន ដោយបានដាក់ដបថ្នាំបាញ់សម្លាប់ស្មៅយីហោ ៤៨ ដែលផលិតនៅប្រទេសថៃ មកដាក់ក្បែរ ៕
នាំគ្នាផឹកស្រាស ច្រឡំផឹកថ្នាំបាញ់ស្មៅពុល ចូលពេទ្យ៥នាក់
0 Comments