កំពង់ឆ្នាំង ៖ ទំនាស់ដីធ្លីរវាងប្រជាពលរដ្ឋ២គ្រួសារបានកើតឡើងអាចនឹងឈានទៅដល់ការកើតអំពើហិង្សា និងកើតជាទំនាស់រ៉ៃរ៉ាំពិបាក និងដៅស្រាយចេញនៅពេលខាងមុខជាមិនខាន។ ទំនាក់ដីធ្លីនេះកើតឡើងក្នុងភូមិដើមពពេល ឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង ហើយអ្វីដែលគួរឲ្យហួសចិត្តទៅនោះគឺក្រុមគ្រួសារទាំងពីរនោះពីមុនមានភាពល្អូកល្អឺនរាប់អានគ្នាចាក់ទឹកមិនលិចរហូតឈានដល់ការមានគម្រោងភ្ជាប់សាច់ឈាមកូនប្រុសស្រីទៀតផង។
តាមការអះអាងរបស់លោក សេង សារី និង ប្រពន្ធឈ្មោះ ម៉ុក ចន្ធី បានឲ្យដឹងថា ដំបូងឡើយគាត់ បានទិញដីពីឈ្មោះ ចែម ផុន និងប្រពន្ធ ឈ្មោះ អឿ សារុំ ក្នុងតម្លៃ ២២០០ដុល្លាអាមេរិកដែលមានទំហំ ១៩២ម៉ែត្រការ៉េ ដែលមានទទឹង ប្រវែង ៨ម៉ែត្រ និងបណ្តោយ ២៤ម៉ែត្រ ហើយអ្នកលក់ ចែម ផុន បានសន្យាថា ទុកផ្លូវដែលមានទទឹង៣ម៉ែត្រ សម្រាប់ឲ្យគាត់បានធ្វើដំណើរចេញចូលដីដែលបានទិញ និងអ្នកដទៃទៀតដែលមានទីលំនៅនៅក្បែរៗនោះ រួមទាំងកូនប្រុសបង្កើតរបស់ឈ្មោះ ចែម ផុន ផងដែរ។ ក្រោយមកគាត់បានសង់ផ្ទះនៅលើដីដែលបានទិញ ហើយឈ្មោះ ចែម ផុន និងប្រពន្ធ ឈ្មោះ អឿ សារុំ មានមកស្ដីដណ្ដឹងកូនស្រីរបស់គាត់ឲ្យទៅកូនប្រុសរបស់ខ្លួន គាត់ក៏យល់ព្រមតែដោយកូនស្រីរបស់គិតបានពិនិត្យសង្កេតឃើញចរិតកូនប្រុសរបស់ឈ្មោះ ចែម ផុន និង អឿ សារុំ មិនកើតដោយដើរផឹកស៊ី បង្កជម្លោះ អំពើហិង្សាជាញឹកញាប់ជាមួយបងប្អូន ទើបកូនស្រីរបស់គាត់សម្រេចចិត្តមិនព្រមទទួលយករៀបការជាគូអនាគត។ ក្រោយពេលមានការផ្តាច់ពាក្យរួច ឈ្មោះ ចែម ផុន និង ប្រពន្ធឈ្មោះ អឿ សារុំ មានការខឹងសម្បារយ៉ាងខ្លាំងក៏បានរាំងរបងលើផ្លូវដើរដែលមានទទឹង៣ម៉ែត្រនោះមិនឲ្យក្រុមគ្រួសាររបស់គាត់ និងអ្នកដទៃទៀតដើរឆ្លងកាត់ឡើយ។
ដោយសារមានសភាពបិទផ្លូវតាមអំពើចិត្តបែបនេះ ក្រុមគ្រួសារ លោក សេង សារី និង ប្រពន្ធឈ្មោះ ម៉ុក ចន្ធី រួមនិងប្រជាពលរដ្ឋដែលដើរឆ្លងកាត់ទីនោះសំណូមពរដល់អាជ្ញាធរ និងសមត្ថកិច្ចពាក់ព័ន្ធទាំងអស់មេត្តាជួយអន្តរាគមន៍ឲ្យមានការបើកផ្លូវខាងលើនេះឡើងវិញ ដើម្បីឲ្យពួកគាត់បានធ្វើដំណើរឆ្លងកាត់ដូចមុន។
ករណីនេះ គួរតែអាជ្ញាធរ និងសមត្ថកិច្ចពាក់ព័ន្ធមានវិធានការជាបន្ទាន់ផងដែរ ដើម្បីកុំឲ្យទំនាស់ខាងលើនេះរាលដាលក្លាយជារ៉ាំរ៉ៃ និងកើតមានអំពើហិង្សា។ សូម្បីតែកូនបង្កើតរបស់ខ្លួនក៏បានសម្ដែងនូវការមិនពេញចិត្ត និងរិះគន់ចំៗទៅលើលោក ចែម ផុន និងប្រពន្ធ ឈ្មោះ អឿ សារុំ ដែលជាឪពុកម្តាយបង្កើតផងដែរ ចុះទម្រាំដល់អ្នកក្រៅដែលទទួលរងនូវភាពក្តៅក្រហាយយ៉ាងដូច្នេះតែវាទៅជាយ៉ាងណា?។
នេះជាមរៀនមួយសម្រាប់បងប្អូនប្រជាពលរដ្ឋទាំងអស់ដែលទិញដីពីអ្នកលក់ ហើយសន្យាទុកផ្លូវនេះ ផ្លូវនោះតែផ្ទាល់មាត់ គ្មានកិច្ចសន្យា និងលាយលក្ខណ៍អក្សរ ដូចនេះត្រូវមានកិច្ចសន្យា និងការទទួលដឹងឮពីអាជ្ញាធរត្រឹមត្រូវទើបល្អ ដើម្បីជៀសវាងករណីដូចខាងលើនេះ៕
ទំនាស់បិទផ្លូវមួយនៅក្នុងភូមិដើមពពេល ប្រជាពលរដ្ឋសំណូមពរអាជ្ញាធរ និងសមត្ថកិច្ចពាក់ព័ន្ធជួយអន្តរាគមន៍
0 Comments