កំពង់ធំ ៖ អាជីវកម្មបូមខ្សាច់១កន្លែង ដែលស្ថិតនៅស្ទឹងសែន ក្នុងភូមិអូរសំបួរឃុំក្ដីដូង ស្រុក កំពង់ស្វាយ បានធ្វើឲ្យប្រជាពលរដ្ឋនៅក្បែរនោះ សំដែងការព្រួយបារម្ភនិងភ័យខ្លាចបាក់ស្រុតដី លំនៅដ្ឋាន របស់ពួកគាត់ ដែលនៅតាមមាត់ស្ទឹងនោះ។
ប្រជាពលរដ្ឋទាំងនេះ បានសុំឲ្យអ្នកសារព័ត៌មានជួយចម្លងដំណឹងនេះ ជូនដល់លោកអភិបាលខេត្ត និង ក្រសួងឧស្សាហកម្មរ៉ែនិងថាមពល ជួយអន្តរាគម និង ពិនិត្យបានហ្មត់ចត់ ពីផលប៉ះពាល់ជាពិសេសការបាក់ស្រុតដីមាត់ច្រាំងស្ទឹង និង ដីលំនៅដ្ឋានរបស់ពួកគាត់ដោយសារតែអាជីវកម្មបូបខ្សាច់នេះ។
ប្រភពព័ត៌មានពីប្រជាពលរដ្ឋនេះ បានបន្តឲ្យដឹងថា ពួកគាត់មិនដឹងថា អាជីវកម្មបូបខ្សាច់ នេះមានច្បាប់ ឬ អត់ច្បាប់នោះទេ ប៉ុន្តែទោះជាយ៉ាងណាក្ដី អាជីវកម្មបូបខ្សាច់នេះ បង្កឲ្យមានការ ប៉ះពាល់ ដូចជាបាក់មាត់ច្រាំងស្ទឹងនៅត្រើយម្ខាងជាដើម ហើយកាលពីពេលថ្មីលំនៅដ្ឋានរបស់ ប្រជាពលរដ្ឋ នៅសង្កាត់កំពង់ក្របៅ ជាប់ព្រំប្រទល់នឹងឃុំក្ដីដូងនេះ ក៏មានបាក់ស្រុតដី ធ្លាក់ផ្ទះប្រជាពលរដ្ឋចូល ទៅក្នុងទឹកស្ទឹងផងដែរ ដែលធ្វើឲ្យពួកគាត់កាន់តែព្រួយបារម្ភ និង ភ័យខ្លាចនោះ។
ចំណែកមេការអាជីវកម្មបូមខ្សាច់ នៅភូមិអូរសំបួរ ឃុំក្ដីដូងនេះ បានប្រាប់អ្នកសារព័ត៌មាន ឲ្យដឹងថា អាជីវកម្មបូមខ្សាច់នេះ មានច្បាប់ប៉ុន្តែមិននៅនឹងទេ គឺនៅថៅកែ នៅខេត្តកំពង់ចាមឯណោះ។
លោក ផា សាវ៉ន មេឃុំក្ដីដូងបានប្រាប់អ្នកសារព័ត៌មានថា អាជីវកម្មបូមខ្សាច់នេះ គឺបានធ្វើ ច្បាប់ស្មើសុំ ហើយគាត់ក៏បានស៊ីញេបញ្ជូនទៅលើអស់ហើយ។
ប្រធានមន្ទីរឧស្សាហកម្មរ៉ែ និង ថាមពល ខេត្តកំពង់ធំ លោក ណឹម ចន្ថា មិនបានឆ្លើយបំភ្លឺ ពី អាជីវកម្មបូមខ្សាច់ នៅភូមិអូរសំបួរនេះដូចម្ដេចទេ ដោយសារទូរស័ព្ទ របស់លោកហៅចូលហើយ ប៉ុន្តែគ្មានអ្នកទទួល ប៉ុន្តែកន្លងមកលោកណឹម ចន្ថា បានធ្លាប់បំភ្លឺប្រាប់អ្នកសារព័ត៌មានថា រាល់ អាជីវកម្មបូមខ្សាច់ ក្រោយពីទទួលបានសំណុំបែបបទស្នើសុំហើយ ក្រសួងនិងមន្ទីរចុះទៅពិនិត្យនិង វាយតម្លៃផលប៉ះពាល់នៅទីកន្លែងសុំធ្វើអាជីវកម្មបូមនោះ ឲ្យបានច្បាស់លាស់ជាមុនទើបអនុញ្ញាតិ ច្បាប់។
ប្រជាពលរដ្ឋក៏ដូចជាមន្ត្រីរាជការខ្លះ បាននិយាយរិះគន់ចំពោះករណី អាជីវកម្មបូមខ្សាច់នេះថា ជាឃុបឃិតគ្នារវាងមន្ទីរជំនាញ និង អាជ្ញាធរដែនដី ជាមួយថៅកែអាជីវកម្មបូមខ្សាច់ ដែលបើក ឲ្យធ្វើសកម្មភាព ដោយគ្រាន់តែបំពេញសំណុំបែបបទស្មើសុំ តែប៉ុណ្ណោះ ប៉ុន្តែច្បាប់អនុញ្ញាតិពី ក្រសួងមិនទាន់សម្រេចជាផ្លូវការណ៍នៅឡើយ ហើយអាជីវកម្មបូមខ្សាច់ខ្លះទៀត ការពិនិត្យនិងវាយ តម្លៃផលប៉ះពាល់គឺត្រូវរ៉ូវគ្នា ក៏បង្កើតឲ្យច្បាប់អនុញ្ញាតិកើតឡើង ហើយអាជីវកម្មបូមខ្សាច់ខ្លះទៀត សំណើ និង ច្បាប់អនុញ្ញាតិដាក់ចំណុចនេះ នៅពេលទៅធ្វើដាក់ចំណុចផ្សេង ដែលធ្វើឲ្យមានផល ប៉ះពាល់ដល់ទ្រព្យសម្បតិ្តសាធារណ និង ទ្រព្យសម្បត្តិ របស់ប្រជាពលរដ្ឋ ដូចជាបាក់ច្រាំងស្ទឹងចូល ជ្រៅមកផ្លូវសាធារណនៅតាមមាត់ស្ទឹង និង លំនៅដ្ឋានប្រជាពលរដ្ឋជាដើម៕
ពលរដ្ឋឃុំក្ដីដូង ព្រួយបារម្ភពីការបាក់ស្រុតដីលំនៅដា្ឋន នៅតាមមាត់ច្រាំងស្ទឹងសែន
0 Comments