កណ្ដាល ៖ បុរសម្នាក់ស្លាប់ និងម្នាក់ទៀតបានរងរបួសធ្ងន់ ខណៈដែលជួបគ្រោះថ្នាក់ចរាចរណ៍បើកម៉ូតូបុកគ្នាក្នុងទិសដៅបញ្ច្រាសទិសគ្នា។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧យប់ថ្ងៃទី១១ ខែវិច្ឆិកា ឆ្នាំ២០១៥ នៅលើកំណាត់ផ្លូវខេត្ត៣៨៣k ត្រង់ចំណុចភូមិដុល ឃុំសន្លុង ស្រុកខ្សាច់កណ្ដាល ខេត្តកណ្តាល។
បើតាមសមត្ថកិច្ចចរាចរណ៍ស្រុកខ្សាច់កណ្ដាលបានឲ្យដឹងថា ជនរងគ្រោះទាំងពីរនាក់មានឈ្មោះយិន គី ភេទប្រុស អាយុ២៥ឆ្នាំ មានទីលំនៅភូមិដុល ឃុំសន្លុង ស្រុកខ្សាច់កណ្ដាល ខេត្តកណ្តាលស្លាប់ និងទី២ឈ្មោះ ជឿន ម៉ៅ ភេទប្រុស អាយុ៣៧ឆ្នាំ មានទីលំនៅភូមិដុល ឃុំសន្លុង ស្រុកខ្សាច់កណ្ដាល ខេត្តកណ្តាល រងរបួសធ្ងន់។
សាក្សីនៅក្បែរកន្លែងកើតហេតុបានឲ្យដឹងថា នៅវេលាម៉ោង៧យប់មានម៉ូតូមួយគ្រឿង ម៉ាកHondaC125 ពណ៌ខ្មៅ ពាក់ស្លាកលេខភ្នំពេញ1A.R1481 អ្នកបើកបរដោយឈ្មោះ ជឿន ម៉ៅ បើកបរក្នុងទិសដៅពីលិចទៅកើត លុះមកដល់ចំណុចខាងលើអ្នកបើកបរម៉ូតូនេះបានបើកឆ្លងផ្លូវពីលិចទៅជើង ហើយត្រូវបានម៉ូតូមួយគ្រឿងទៀត ម៉ាកHonda C125 ពណ៌ខ្មៅ ពាក់ស្លាកលេខព្រៃវែង1D. 5408 បើកបរដោយឈ្មោះ យិន គី បើកបរក្នុងទិសដៅពីកើតទៅលិចបញ្ច្រាសទិសគ្នា បណ្ដាលឲ្យបុកគ្នាចំយ៉ាងពេញទំហឹងធ្វើឲ្យឈ្មោះ យិន គិ ស្លាប់នៅនឹងកន្លែងកើតហេតុ និងខូចខាតសម្ភារៈម៉ូតូ២គ្រឿង។
ភ្លាមៗនោះត្រូវបានកម្លាំងជំនាញចរាចរណ៍មកធ្វើការវាស់វែង និងយកម៉ូតូទាំងពីរទៅរក្សាទុកនៅអធិការដ្ឋាននគរបាលស្រុកខ្សាច់កណ្ដាល ដើម្បីរង់ចាំការដោះស្រាយនៅពេលក្រោយ។
សូមបញ្ជាក់ថា មូលហេតុដែលបង្កឲ្យមានគ្រោះថ្នាក់ចរាចរណ៍ខាងលើនេះគឺអ្នកបើកបរមិនប្រកាន់ស្តាំខ្វះការប្រុងប្រយ័ត្ន៕
ម៉ូតូបុកជាមួយម៉ូតូ ស្លាប់ម្នាក់ និងរបួសធ្ងន់ម្នាក់នៅស្រុកខ្សាច់កណ្ដាល
0 Comments