ភ្នំពេញ ៖ ថវិកាចំនួន ៤០,១៣០ ដុល្លារអាមេរិកត្រូវបានក្រុមហ៊ុនតូយ៉ូតា(ខេមបូឌា)បាននាំយកប្រគល់ជូនដល់មន្ទីរពេទ្យគន្ធបុប្ផាទី៤ ដែលស្ថិតនៅវត្តភ្នំ រាជធានីភ្នំពេញដែលថវិកាសប្បុរសធម៌ទាំងនេះទទួលបានមកពីការប្រគុំតន្ត្រី តូយ៉ូតា ក្លាស់ស្ស៊ីក និងទទួលបានពីមូលនិធិសប្បុរសធម៌របស់ក្រុមហ៊ុន តូយ៉ូតា(ខេមបូឌា)។
ពិធីប្រគល់ និងទទួលថវិកាសប្បុរសធម៌នេះបានធ្វើឡើងដោយផ្ទាល់រវាងលោក ម៉ាសាអាគិ កាវ៉ាបាតា អគ្គនាយកក្រុមហ៊ុនតូយ៉ូតា(ខេមបូឌា)ជូនដល់ លោក Beat Richner ប្រធានមន្ទីរពេទ្យគន្ធបុប្ផា និងលោក Denis Laurent អនុប្រធានមូលនិធិគន្ធបុប្ផានៃមន្ទីរពេទ្យគន្ធបុប្ផាកាលពីល្ងាចថ្ងៃទី១១ ខែវិច្ឆិកា ឆ្នាំ២០១៥។
គួរបញ្ជាក់បន្ថែមថា ថវិកាសប្បុរសធម៌ខាងលើនេះបានមកពីការប្រគុំតន្ត្រីសប្បុរសធម៌ តូយ៉ូតា ក្លាស់ស្ស៊ីក លើកទី៣នៅសាលមហោស្រពចតុមុខដែលបានត្រូវបានផ្តល់នូវកិត្តិយសដ៏ឧត្តុង្គឧត្តមជាទីបំផុតតាមរយៈការយាងចូលរួមក្រោមព្រះរាជាធិបតីភាពដ៏ខ្ពង់ខ្ពស់របស់សម្ដេចព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរក្នុងសេរីភាព សេចក្ដីថ្លៃថ្នូរ និងសុភមង្គលជាទីគោរពសក្ការៈដ៏ខ្ពង់ខ្ពស់បំផុតកាលពីថ្ងៃទី៣១ ខែតុលា ឆ្នាំ២០១៥។
ការប្រគុំតន្ត្រី TOYOTA CLASSIC ឆ្នាំ២០១៥ នេះត្រូវបានប្រារព្ធឡើង ក្នុងគោលបំណងប្រមូលមូលនិធិ បម្រើដល់សកម្មភាពសប្បុរសធម៌ក្នុងសង្គម។ ជាក់ស្តែង ដូចថ្ងៃនេះស្រាប់រាល់ថវិកាទាំងអស់ ដែលទទួលបានពីការលក់សំបុត្រចូលទស្សនាតន្ត្រីនេះបានយកមកប្រគល់ជូនដល់មន្ទីរពេទ្យគន្ធបុប្ផាដោយផ្ទាល់។
ក្រៅពីការប្រគល់ថវិកាសប្បុរសធម៌ជូនដល់មន្ទីរពេទ្យគន្ធបុប្ផា លោក ម៉ាសាអាគិ កាវ៉ាបាតា អគ្គនាយកក្រុមហ៊ុនតូយ៉ូតា(ខេមបូឌា)រួមទាំងសហការីក៏បានជួបសំណេះសំណាល និងពិភាក្សាក៏ដូចជា ទស្សនាទិដ្ឋភាព មន្ទីរពេទ្យទាំងមូលជាមួយលោក Beat Richner និងលោក Denis Laurent ផងដែរ។
លោក Beat Richner ប្រធានមន្ទីរពេទ្យគន្ធបុប្ផា និងលោក Denis Laurent បានថ្លែងអំណរគុណយ៉ាងជ្រាលជ្រៅចំពោះការបរិច្ចាគថវិកាសប្បុរសធម៌របស់ក្រុមហ៊ុនតូយ៉ូតា(ខេមបូឌា)និ ងចាត់ទុកការផ្តល់អំណោយនេះជាកាយវិការមនុស្សធម៌មួយដ៏ប្រពៃក្នុងការជួយសង្គ្រោះកុមារមានជំងឺ៕
ក្រុមហ៊ុន តូយ៉ូតា (ខេមបូឌា) នាំយកថវិកាសប្បុរសធម៌ជូនដល់មន្ទីរពេទ្យគន្ធបុប្ផា
0 Comments