សៀមរាប ៖ កម្លាំងបរិស្ថានដែនជម្រកសត្វព្រៃបឹងពែរចុះល្បាត ក្នុងតំបន់ការពារព្រៃធម្មជាតិ ក្នុងព្រំប្រទល់ ខេត្តសៀមរាបជាប់បានធ្វើការឃាត់ខ្លួនបានជនល្មើស២នាក់ និង ដកហូតគោយន្តដឹកឈើ បញ្ជូនមកកាន់បរិស្ថានស្រោង ដើម្បីរក្សាទុកដោះស្រាយតាមច្បាប់។
ការចុះប្រតិបត្តិការបង្ក្រាបបទល្មើសព្រៃឈើ រហូតឈានដល់ឃាត់ខ្លួនបានមនុស្ស២នាក់និងវត្ថុតាងនេះ ធ្វើឡើងកាលពីថ្ងៃទី១០ ខែវិច្ឆិកា ឆ្នាំ២០១៥ ស្ថិតនៅចំណុចភូមិសាស្ត្រវាលកប៉ាល់ហោះក្នុងព្រៃសហគមន៍ភ្នំបាឡាំង ក្នុងភូមិសាស្ត្រ ភូមិព្រះធាតុ ឃុំខ្វាវ ស្រុកជីក្រែងខេត្តសៀមរាប។
លោក ភូង លីណា ប្រធានមន្ទីរបរិស្ថានខេត្តសៀមរាប បានមានប្រសាសន៍ប្រាប់នៅរសៀលម៉ោង៣ ថ្ងៃទី១១ ខែវិច្ឆិកា ថា ក្នុងពេលចុះល្បាតកម្លាំងជំនាញបានស្ទាក់ចាប់ បានអ្នកបើកបរគោយន្តកន្ត្រៃចំនួន២គ្រឿង និងវត្ថុតាងយកមកកាន់ស្នាក់ការបរិស្ថានស្រោង។
លោកបន្តថា ក្រោយពីធ្វើការឃាត់ខ្លួនបានអ្នកបើកបរគោយន្តកន្ត្រៃចំនួន២នាក់នោះ កម្លាំងជំនាញ បានឲ្យគាត់ធ្វើកិច្ចសន្យា និង អប់រំឲ្យត្រឡប់ទៅលំនៅដ្ឋានវិញ ចំណែកវត្ថុតាងរួមមានម៉ាស៊ីនត្រង់ស៊ីន័រ០១គ្រឿង និង គោយន្តកន្ត្រៃចំនួន០២គ្រឿង ដែលកំពុងដឹកជញ្ជូនឈើនៅចំណុចវាលកប៉ាល់ហោះក្នុងព្រៃសហគមន៍ភ្នំបាឡាំង ក្នុងភូមិសាស្ត្រ ភូមិព្រះធាតុ ឃុំខ្វាវ ស្រុកជីក្រែង ខេត្តសៀមរាបនេះ បញ្ជូនមកស្នាក់ការបរិស្ថានស្រោង ដើម្បីទុកដោះស្រាយតាមផ្លូវច្បាប់។
លោកបញ្ជាក់បន្ថែមថា អ្នកបើកបរគោយន្តកន្ត្រៃមានទី១ឈ្មោះអេង សុឃាង, ទី២ឈ្មោះហ៊ាង សុងហៃ អ្នកទាំងពីរមានទី លំនៅភូមិតាភ្ញា ឃុំគោគធ្លកលើ ស្រុកជីក្រែង ខេត្តសៀមរាប។
បច្ចុប្បន្នកម្លាំងជំនាញ ធ្វើការដកហូត បានឈើទាំងអស់មានចំនួន.២៤ដុំ ក្នុងនោះមាន ឈើបេងមានចំនួន ០៣ដុំ, ប្រភេទឈើធ្នង់ចំនួន.១១ដុំ,និងប្រភេទឈើកកោះចំនួន.១០ដុំទៀតផងយកមករក្សាទុក នៅស្នាក់ការបរិស្ថានស្រោង ក្នុងស្រុកជីក្រែងដើម្បីដោះស្រាយតាមច្បាប់ ស្តីពីតំបន់ការពារធម្មជាតិ។
សូមរំលឹកថា កន្លងទៅកម្លាំងបរិស្ថានបឹងពែរ ដែលដឹកនាំដោយលោកប្រធានមន្ទីរខេត្តបានធ្វើការចុះបង្ក្រាបករណីដឹកជញ្ជូនឈើនៅតំបន់ការពារ ដ៏ក្តៅគគុកនោះ គេសង្កេតឃើញថា ចាប់មិនបានមួយដង្ហើមចង្រិតផង ក៏ត្រូវមានអន្តរាគមន៍ឲ្យដោះលែង។
គួរកត់សម្គាល់ផងដែរថា សកម្មភាពដឹកជញ្ជូនល្មើសច្បាប់ខុសច្បាប់គ្រប់ប្រភេទត្រូវបានគេក្រុមឈ្មួញ សម្រុកដឹកយ៉ាងរលូនក្នុងភូមិសាស្ត្រ ឃុំខ្វាវ ស្រុកជីក្រែង ខេត្តសៀមរាប ដែលមានការសង្ស័យថា សមត្ថកិច្ចនៅតំបន់នោះជាអ្នកបើកភ្លើងខៀវ ឲ្យមានបទល្មើសកើតឡើងយ៉ាងគគ្រឹកគគ្រេង៕
បរិស្ថានដែនជម្រកសត្វព្រៃបឹងពែរ ឃាត់ខ្លួនជនល្មើស២នាក់និងគោយន្តដឹកឈើ២គ្រឿង
0 Comments