ក្រចេះ ៖ មន្ត្រីអង្គការWWF រួមនិងមន្ត្រីនាយកដ្ឋានរដ្ឋបាលជលផលបានលើកឡើងស្រដៀងគ្នា កត្តាពីរយ៉ាងដែលជាឧបសគ្គពាក់ព័ន្ធទៅនឹងការងារអភិរក្សសត្វផ្សោតនៅតាមដងទន្លេមេគង្គក្រចេះស្ទឹងត្រែងគឺការសាងសង់ទំនប់វារីអគ្គិសនីដនសាហុងរបស់ប្រទេសឡាវគឺជាកត្តាគំរាមកំហែងដល់អាយុជីវិត និងការស់នៅរបស់សត្វផ្សោត ក្រៅពីការដាក់មង ឬការនេសាទខុសច្បាប់នៅក្នុងតំបន់អភិរក្ស។
ការលើកឡើងបែបនេះគឺធ្វើឡើងស្របពេលខេត្តក្រចេះបានប្រារព្ធនូវទិវាអន្តរជាតិសម្រាប់សត្វផ្សោតដែលរៀបចំឡើងដោយអង្គការWWFសហការជាមួយជំនាញរដ្ឋបាលជលផលដោយមានប្រជាពលរដ្ឋប្រមាណជា៤០០នាក់បានធ្វើយុទ្ធនាការដង្ហែផ្សព្វផ្សាយពាក់ព័ន្ធទៅនឹងការងារអភិរក្សសត្វផ្សោត នៅតាមផ្លូវមួយចំនួនក្នុងក្រុងក្រចេះកាលពីព្រឹកថ្ងៃទី១០ ខែសីហា ក្រោមអធិបតីភាពឯកឧត្តម អេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល។
លោក ឈិត សំអាត នាយកអង្គការWWFប្រចាំនៅប្រទេសកម្ពុជាមានប្រសាសន៍ថា យុទ្ធនាការនេះមានសារៈសំខាន់ខ្លាំងណាស់ដែលជាយុទ្ធនាការបញ្ឈប់នូវការសាងសង់ទំនប់វារីអគ្គិសនី(ដនសាហុង) និងការប្ដេជ្ញាចិត្តរបស់រាជរដ្ឋាភិបាលក្នុងការការពារសត្វផ្សោតដែលជានិមិត្តរូបជាតិ និងជារតនៈសម្បត្តិរបស់ប្រទេសកម្ពុជាយើង បន្ទាប់ពីប្រសាទអង្គវត្ត និងជាផលិតផលយ៉ាងសំខាន់ក្នុងការទាក់ទាញភ្ញៀវទេសចរ ទាំងវប្បធម៌ និងសេដ្ឋកិច្ចសង្គមនៅក្នុងប្រទេសកម្ពុជាផងដែរ។
លោកបន្តថា នៅក្នុងយុទ្ធនាការនេះមានគោលបំណង និងសារៈសំខាន់ខ្លាំងគឺដើម្បីផ្សព្វផ្សាយឲ្យប្រជាពលរដ្ឋទូទៅបានយល់ដឹងនូវព័ត៌មាននៃចំនួនសត្វផ្សោតដែលរស់នៅតាមដងទន្លេមេគង្គដែលទើបនឹងរកឃើញនៅក្នុងឆ្នាំ២០១៥ថ្មីៗនេះមានចំនួនប្រមាណជា៨០ក្បាល ហើយចំនួននេះគឺមានការថយចុះជាបន្តបន្ទាប់ បើប្រៀបធៀបតាំងពីឆ្នាំ២០០៥ មានចំនួន១២៧ក្បាល ឆ្នាំ២០០៧មាន៩៣ក្បាល ឆ្នាំ២០១០មាន៨៥ក្បាល និងឆ្នាំ២០១៥នេះធ្លាក់មកនៅចំនួន៨០ក្បាល។
ហេតុផលនៃការស្លាប់របស់សត្វផ្សោតនាពេលកន្លងទៅគឺបណ្ដាលមកពីការជាប់មង និងការនេសាទខុសច្បាប់នៅក្នុងតំបន់ស្នូលនៃការអភិរក្សសត្វផ្សោតដែលមានចាប់ពីខេត្តក្រចេះរហូតដល់ខេត្តស្ទឹងត្រែង។ ដោយឡែកឧបសគ្គមួយទៀតដែលគួរកត់សំគាល់នឹងជាកត្តាគំរាមកំហែងធំបំផុតនោះគឺការសាងសង់ទំនប់វារីអគ្គិសនី ដនសាហុង របស់ប្រទេសឡាវដែលគេដឹងថា នឹងមានការចាប់ផ្តើមសាងសង់នោះ។ លោកថា វាជាក្តីបារម្ភមួយយ៉ាងធំពាក់ព័ន្ធទៅនឹងអាយុជីវិត និងការរស់រានរបស់សត្វផ្សោតទន្លេមេគង្គដែលជារតនៈសម្បត្តិជាតិរបស់ប្រសទេសកម្ពុជាយើងនេះ។ លោកបញ្ជាក់ថា នៅក្នុងផែនការសាងសង់ទំនប់ ដនសាហុងនេះវាផលិតអគ្គិសនីត្រឹមតែ២១០០មេកាវ៉ាត់ (MKV) ដែលចំនួននេះថ្វីត្បិតវាតូចតែអាចបង្កផលប៉ះពាល់ច្រើនក្រៅពីជម្រកសត្វផ្សោតគឺមានប្រជាជនប្រមាណជា៦០លាននាក់ដែលពឹងផ្អែកទៅលើទន្លេមេគង្គនេះតាមរយៈការនេសាទ តាមរយៈការធ្វើកសិកម្ម និងការប្រកបមុខរបរផ្សេងៗទៀតផងដែរ។
ដោយឡែក លោក វិ បុល ប្រធាននាយកដ្ឋានអភិរក្សរដ្ឋបាលជលផលបានឲ្យដឹងដែរថា ផ្សោតជាប្រភេទមួយក្នុងចំណោមសត្វទាំង៥៨ដែលរាជរដ្ឋាភិបាលបានកំណាត់នៅក្នុងអនុក្រឹត្យលេខ១២៣ដែលគេកំណាត់ថា ជាប្រភេទសត្វកំពុងរងគ្រោះថ្នាក់ និងជិតផុតពូជដែលរដ្ឋាភិបាលចាំបាច់ត្រូវតែធ្វើការអភិរក្សឲ្យបានខ្លាំងក្លាបំផុត។
ទន្ទឹមនឹងការអភិរក្សសត្វផ្សោតក៏ត្រូវគិតទៅលើត្រីមានពូជនៅក្នុងដងទន្លេមេគង្គផងដែរ ពីព្រោះថាប្រសិនណាបើអត់មានត្រីនោះផ្សោតក៏អត់មានអ្វីជាចំណីដែរ។ ហើយដែលសំខាន់ជាងនេះខេត្តក្រចេះ និងខេត្តស្ទឹងត្រែងគឺជាប្រភពនៃជម្រកសម្រាប់ត្រីពងកូនបន្តពូជ ចែកចាយទៅដល់ទន្លេសាបនិងនៅក្នុងបរទេសកម្ពុជាយើងផងដែរ៕
ការសាងសង់ទំនប់វារីអគ្គិសនីរបស់ឡាវជាកត្តាគំរាមកំហែងទៅដល់អាយុជីវិត និងការរស់នៅរបស់សត្វផ្សោត
0 Comments