បាត់ដំបង ៖ ស្ត្រីជាម្តាយម្នាក់ បានស្រែកឆោឡោបង្កការភ្ញាក់ផ្អើលដល់ប្រជាពលរដ្ឋក៏ដូចជាសមត្ថកិច្ចគ្រប់លំដាប់ថ្នាក់ បន្ទាប់ពីបានឃើញកូនស្រី ត្រូវជនសង្ស័យម្នាក់អូសទម្លាក់ទឹកស្ទឹងសង្កែ។
ហេតុការណ៍នេះ កើតឡើងម៉ោង ៩និង៤១នាទី យប់ថ្ងៃទី១០ ខែវិច្ឆិកា ឆ្នាំ២០១៥ នៅចំណុចផ្ទះបណ្តុះសណ្តែកមួយកន្លែង ស្ថិតក្នុងភូមិវត្តអូតាមឹម ឃុំអូរដំបងមួយ ស្រុកសង្កែ ខេត្តបាត់ដំបង។
សេចក្តីរាយការណ៍បានឲ្យដឹងថា ការភ្ញាក់ផ្អើលនេះ ធ្វើឲ្យប្រជាពលរដ្ឋ ក៏ដូចជាសមត្ថកិច្ចគ្រប់លំដាប់ថ្នាក់ បានចុះទៅស្រាវជ្រាវ បន្ទាប់ពីម្ចាស់ផ្ទះបានស្រែកឆោឡោឡើងដោយបាត់កូនស្រីម្នាក់ឈ្មោះ ឆាំ ស្រីរ័ត្ន ហៅ តែងមោ អាយុ១៨ឆ្នាំ ជាសិស្សរៀនថ្នាក់ទី១២ នៃវិទ្យាល័យ នេត យ៉ង់។ ហើយអះអាងថា មានជនសង្ស័យម្នាក់បានអូសទាញក្មេងស្រីរូបនោះទម្លាក់ទៅក្នុងស្ទឹងសង្កែ ខណៈដែលនាងកំពុងអង្គុយច្រកសណ្តែក ដើម្បីបណ្តុះលក់នៅថ្ងៃស្អែក។
តាមការអះអាងស្ត្រីជាម្តាយឈ្មោះ ជាវ ម៉ៅ អាយុ៥៦ឆ្នាំ បានរៀបរាប់ថា នៅមុនកើតហេតុគឺកូនស្រីរបស់គាត់កំពុងអង្គុយច្រកសណ្តែកបាយ ដើម្បីបណ្ដុះសណ្តែកលក់នាពេលព្រឹក ហើយរូបគាត់ក៏កំពុងអង្គុយលេងផ្ទះអ្នកជិតខាងនៅម្ខាងថ្នល់ម្នាក់ បន្ទាប់មកក៏ស្រាប់តែលឺសម្រែកស្រែករបស់កូនស្រី ដែលសម្រែកនេះ គឺជាសម្រែកល្វើយៗចាកចេញពីផ្ទះធ្លាក់តាមជ្រលងទៅក្នុងស្ទឹងសង្កែបន្ទាប់មកក៏បាត់សំឡេងឈឹងតែម្តង។
ស្ត្រីជាម្តាយបានអះអាងបន្ថែមថា គាត់បានឃើញក្បាលមនុស្សប្រុសម្នាក់នៅក្នុងស្ទឹងគឺបានចាប់កូនស្រីរបស់គាត់ដោយមិនដឹងថា បំណងយ៉ាងណានោះទេ។
រហូតមកដល់ម៉ោង១១ជាងយប់ថ្ងៃដដែល ទាំងសមត្ថកិច្ចគ្រប់លំដាប់ថ្នាក់ក៏ដូចជាប្រជាពលរដ្ឋ និងកម្លាំងដែលចុះតាមរុករកនៅក្នុងស្ទឹងក៏ពុំទាន់ប្រទះឃើញនារីរងគ្រោះ ឬ ក៏ជនសង្ស័យនោះឡើយ ដោយបាត់ដំណឹងទាំង២នាក់តែម្តង។ រហូតដល់តម្រូវឲ្យសមត្ថកិច្ចនាំយកបងស្រី និង ម្តាយទៅធ្វើការសាកសួរនៅប៉ុស្តិ៍នគរបាលរដ្ឋបាល ដើម្បីចង់ដឹងពីការពិត ប៉ុន្តែឆ្លើយតបនឹងសំណួរសមត្ថកិច្ចថា “ខណៈពេលដែលជនសង្ស័យមកចាប់កូនស្រីរបស់គាត់អូសទម្លាក់ទៅក្នុងស្ទឹងសង្កែ ពីចំណុចច្រកសណ្តែកបាយនៅខាងមុខផ្ទះមានភ្លើងបំភ្លឺ ឬ ទេ?” ស្ត្រីជាម្តាយបានបំភ្លឺថា ភ្លើងបំភ្លឺនៅខាងមុខផ្ទះត្រូវបានជនសង្ស័យដកឌុយពន្លត់ភ្លើងបាត់ទៅហើយ។
ដូច្នេះប្រភពជាច្រើនបានរិះគន់ថា ពាក់ព័ន្ធបញ្ហានេះ គឺទំនងជាអាចជនសង្ស័យមានការត្រូវរ៉ូវគ្នាជាមួយនឹងកូនស្រី ព្រោះមានឱកាសច្រើន ដើម្បីចូលទៅដកឌុយពន្លត់ភ្លើង នៅក្នុងផ្ទះហើយមកជួបនឹងកូនស្រីនៅខាងមុខផ្ទះ រហូតមកដល់ម្តាយចាកចេញពីផ្ទះអ្នកជិតខាងមកទាន់ ទើបនាំគ្នាស្ទុះចុះទៅតាមស្ទឹងសង្កែតែម្តង នេះជាចំណុចដែលប្រភពជាច្រើនកំពុងធ្វើការផ្តោតលើបញ្ហានេះ ប៉ុន្តែអ្វីជាការពិត គឺស្ថិតនៅលើសមត្ថកិច្ចដែលកំពុងសាកសួរស្ត្រីជាម្តាយ និង បងស្រី៕
ស្ត្រីម្នាក់ស្រែកឆោឡោទាំងយប់បង្កការភ្ញាក់ផ្អើលដោយសារតែបាត់កូនស្រី
0 Comments