ក្រុមអ្នកសង្កេតការណ៍សហភាពអឺរ៉ុប បានអះអាងនៅថ្ងៃអង្គារនេះថា ការបោះឆ្នោតសកលដោយសេរីជាលើកដំបូងរបស់ប្រទេសមីយ៉ាន់ម៉ា ក្នុងរយៈពេល ២៥ ឆ្នាំកន្លងមកនេះ ដំណើរការទៅយ៉ាងរលូន ល្អប្រសើរជាងការរំពឹងទុកទៅទៀត ប៉ុន្តែកំណែទម្រង់ច្រើនជាងនេះ គួរតែត្រូវការ ដើម្បីធានាបានការបោះឆ្នោតសុក្រឹត និងយុត្តិធម៌នាពេលអនាគត។
ថ្លែងទៅកាន់សន្និសីទកាសែតនាទីក្រុងរ៉ង់ហ្គូន លោកអាឡិចសាន់ដឺ ហ្គ្រាហ្វ ឡាំដូហ្វ ប្រធានក្រុមសង្កេតការណ៍សហភាពអឺរ៉ុប បានសម្តែងនូវការស្ងើចសរសើរយ៉ាងខ្លាំងដល់ដំណើរការបោះឆ្នោតរបស់ប្រទេសមីយ៉ាន់ម៉ាថា បានធ្វើទៅយ៉ាងរលូន អំឡុងការបោះឆ្នោតជាប្រវត្តិសាស្ត្ររបស់ខ្លួន កាលពីថ្ងៃអាទិត្យកន្លងទៅ។
លោកបាននិយាយថា ដំណើរការបោះឆ្នោត បានល្អប្រសើរជាងការរំពឹងទុក តែទោះបីជាយ៉ាងណាក៏ដោយ កំណែទម្រង់ច្រើនជាងនេះ ត្រូវការជាចាំបាច់ ដើម្បីធានាបានការបោះឆ្នោតពិតប្រាកដនាពេលអនាគត។
សូមបញ្ជាក់ថា លទ្ធផលថ្មីពីការបោះឆ្នោតរបស់មីយ៉ាន់ម៉ា បានបង្ហាញនៅថ្ងៃអង្គារនេះថា គណបក្សប្រឆាំងសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុង សានស៊ូជី ដណ្តើមការគ្រប់គ្រងសភាក្នុងតំបន់ភាគច្រើន ក៏ដូចជាអាចបង្កើតបានរដ្ឋាភិបាលថ្មី បន្ទាប់ពីលទ្ធផលផ្លូវការ បានបង្ហាញថា គណបក្សរបស់លោកស្រី បានឈ្នះ ៩៧ អាសនៈនៅក្នុងចំណោម ១០៧អាសនៈមាននៅសភាក្នុងស្រុក ខណៈដែលគណបក្សអភិវឌ្ឍន៍ និងសាមគ្គីសហភាព ទទួលបានតែ ៣ អាសនៈប៉ុណ្ណោះ៕
ប្រធានក្រុមសង្កេតការណ៍សហភាពអឺរ៉ុប អះអាងថា ដំណើរការបោះឆ្នោតនៅមីយ៉ាន់ម៉ា ល្អប្រសើរជាងការរំពឹងទុក
0 Comments