កំពង់ឆ្នាំង ៖ ជនជាតិអូស្ត្រាលីមួយក្រុមក្នុងអង្គការឃូហ្វា នៅព្រឹកថ្ងៃទី១០ ខែវិច្ឆិកា ឆ្នាំ២០១៥ បានចុះមកសិក្សាស្វែងយល់អំពីការនេសាទត្រីតាមវាលស្រែទំនប់ព្រៃមូល ជាមួយប្រជាពលរដ្ឋ និងចុះជួយឧបត្ថម្ភថវិកាដល់សមាជិកសហគមន៍កសិកម្មឃុំព្រៃមូល ស្រុករលាប្អៀរ ខេត្តកំពង់ឆ្នាំង។
លោក ភោគ សារុំ ប្រធានសហគមន៍កសិកម្មឃុំព្រៃមូលបាននិយាយឲ្យដឹងថា នៅព្រឹកថ្ងៃទី១០ ខែវិច្ឆិកា ឆ្នាំ២០១៥នេះ អង្គការឃូហ្វាអូស្ត្រាលីបានចុះមកដល់សហគមន៍កសិកម្មឃុំព្រៃមូល បានស្វែងយល់អំពីការប្រើប្រាស់ឧបករណ៍នេសាទត្រីជាលក្ខណៈគ្រួសារនៅតាមវាលស្រែ ដោយបានឲ្យសមាគមកសិកម្មគាត់បង្ហាត់បង្ហាញរបៀបអូសរំចងចាប់ត្រី និងបង់សំណាញ់នៅក្នុងវាលស្រែទំនប់ព្រៃមូលយ៉ាងសប្បាយរីករាយ។
លោក ភោគ សារុំ បានបន្តឲ្យដឹងថា នៅក្នុងរយៈពេល៤ឆ្នាំមកដល់ឆ្នាំនេះ សមាជិកសហគមន៍កសិកម្មឃុំព្រៃមូលមានសមាជិកជាង៦០០នាក់ហើយ និងនៅចុងឆ្នាំ២០១៥នេះ សមាជិកសហគមន៍នឹងឡើងជាង៧០០នាក់។
អង្គការឃូហ្វាអូស្ត្រាលីមួយនេះ រយៈពេល៤ឆ្នាំកន្លងមកបានចុះពិនិត្យក្នុងសហគមន៍ និងជួយឧបត្ថម្ភថវិកាដល់សមាជិកក្នុងសហគមន៍ចំនួន៣០នាក់ ក្នុង១ឆ្នាំៗ ដែលក្នុង១គ្រួសារៗទទួលបានថវិកាចំនួន៣០ម៉ឺនរៀល ដោយបានបង្រៀនបង្ហាត់បង្ហាញ និងពង្រឹងពង្រីកការចិញ្ចឹមសត្វមាន់ ជ្រូក មាន់ ទា ការដាំដុះដំណាំ និងមុខរបរធ្វើចង្អេរ កញ្ច្រែង នៅតាមគ្រួសារជាដើម។ ប៉ុន្តែការជួយឧបត្ថម្ភនេះ គឺសំដៅលើសមាជិកសហគមន៍ណាដែលឧស្សាហ៍ព្យាយាម និងតស៊ូ មានគំរូល្អក្នុងការងារ ខ្វះដើមទន់ ដោយមិនជួយជាទូទៅនោះឡើយ។
លោកប្រធានសហគមន៍កសិកម្មឃុំព្រៃមូលបានសំណូមពរដល់សមាជិកក្នុងសហគមន៍ទាំងអស់ សូមជួយការពារពូជត្រីនៅតាមបឹង ឬទំនប់ក្នុងមូលដ្ឋាន ដោយត្រូវតែនាំគ្នាជួយទប់ស្កាត់ការឆក់ត្រីរបស់ជនខិលខូច និងនាំគ្នាប្រើប្រាស់តែឧបករណ៍នេសាទស្របច្បាប់ ដើម្បីរក្សាទុកឲ្យត្រីមានការកើនឡើង សម្រាប់ធ្វើការនេសាទផ្គត់ផ្គង់ជីវភាពនៅក្នុងគ្រួសារ។
ទន្ទឹមនេះដែរ សូមបងប្អូនក្នុងសហគមន៍បង្កើនការចិញ្ចឹមសត្វ ដាំដុះដំណាំតាមគ្រួសារ និងប្រកបមុខរបរធ្វើចង្អេរ កញ្ច្រែងឲ្យបានច្រើន ដើម្បីទ្រទ្រង់ជីវភាពក្នុងគ្រួសារឲ្យបានធូរធារ ហើយក៏អាចមានឱកាសទទួលបានការឧបត្ថម្ភថវិកាពីអង្គការឃូហ្វាអូស្ត្រាលីខាងលើនេះផងដែរ៕
អង្គការឃូហ្វាអូស្ត្រាលី ចុះជួយសហគមន៍កសិកម្ម និងស្វែងយល់អំពីការនេសាទត្រីជាលក្ខណៈគ្រួសារ
0 Comments