ភ្នំពេញ ៖ នៅព្រឹកថ្ងៃទី០៩ ខែវិច្ឆិកា ឆ្នាំ២០១៥ នេះជាថ្ងៃប្រារព្ធពិធីបុណ្យឯករាជ្យជាតិ ៩ វិច្ឆិកា ខួបលើកទី៦២ ហើយពិធីនេះ បានរៀបចំ នៅវិមានឯករាជ្យក្រោមអធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទសម្ដេច ព្រះនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដោយមានការអញ្ជើញចូលរួមពីថ្នាក់ដឹកនាំរាជរដ្ឋាភិបាល និងតំណាងក្រសួងស្ថាប័នពាក់ព័ន្ធ ព្រមទាំងកងកម្លាំងប្រដាប់អាវុធយ៉ាងច្រើន។
ថ្នាក់ដឹកនាំសំខាន់ៗដែលអញ្ជើញចូលរួមក្នុងពិធីនោះ រួមមានសម្ដេចអគ្គមហាសេនាបតីតេជោរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចអគ្គមហាពញាចក្រី ហេង សំរិន ប្រធានរដ្ឋសភាជាតិ សម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ព្រមទាំងមន្ត្រីជាន់ខ្ពស់ នៃរាជរដ្ឋាភិបាល សមាជិកព្រឹទ្ធសភា សមាជិករដ្ឋសភា និងនាម៉ឺនសព្វមុខមន្ត្រីព្រមទាំងប្រជាពលរដ្ឋ និងសិស្សានុសិស្សជាច្រើនផ្សេងទៀត។ ៩ វិច្ឆិកា ខួបលើកទី៦២ នាឆ្នាំនេះ ត្រូវបានរៀបចំឡើងយ៉ាងអធិកអធម នៅវិមានឯករាជ្យ ដោយមានការតាំងលំអនូវបដា ពាក្យស្លោក ព្រមទាំងទង់ជាតិ នៅតាមផ្លូវ និងមុខមន្ទីរ ក្រសួង ស្ថាប័នរដ្ឋផងដែរ។
ដោយឡែកមន្ត្រីជាន់ខ្ពស់នៃរាជរដ្ឋាភិបាលមួយចំនួន ក៏បានមានប្រសាសន៍ទៅកាន់អ្នកសារព័ត៌មានអំពីស្នាព្រះហត្ថរបស់ព្រះករុណាព្រះបាទសម្ដេចព្រះ នរោត្តម សីហនុ ព្រះបរមរតនកោដ្ឋ ក្នុងព្រះរាជបូជនីយកិច្ចទាមទារឯករាជ្យពីអាណានិគមបារាំង និងបានបញ្ជាក់ថា ស្នាព្រះហស្ថពិសេសថ្លៃថ្លារបស់ព្រះមហាវីរក្សត្រ គឺការទាមទារឯករាជ្យពីបារាំងដោយមិនបានបង្ហូរឈាម ហើយការប្រារព្ធទិវាឯករាជ្យជាតិនេះ គឺជាព្រឹត្តិការណ៍មួយសំខាន់ណាស់ ដើម្បីរំលឹកដល់ថ្ងៃដែលកម្ពុជាទទួលបានឯករាជ្យពេញបរិបូរណ៍នៅថ្ងៃទី៩ ខែ វិច្ឆិកា ឆ្នាំ១៩៥៣ ក្រោមស្នាព្រះហត្ថរបស់ព្រះមហាវីរក្សត្រ ហើយនៅទីកន្លែងណាក៏ដោយ តែងតែនឹកឃើញអំពីគុណូបការៈ និងស្នាព្រះហត្ថដ៏ធំធេងនេះ។
លោកអៀង ម៉ូលី ប្រធានអាជ្ញាធរប្រយុទ្ធប្រឆាំងជំងឺអេដស៍ បានមានប្រសាសន៍ទៅកាន់អ្នកសារព័ត៌មានខណៈអញ្ជើញចូលរួមពិធីនោះថា នេះគឺជាស្នាព្រះហត្ថដ៏ធំធេងរបស់ព្រះបរមរតនកោដ្ឋ ពីព្រោះការទាមទារឯករាជ្យមិនមែនជាការស្រួលទេ។ ទោះជាបែបនេះក្តីព្រះអង្គបានទាមទារឯករាជ្យពីបារាំងដោយមិនមានការបង្ហូរឈាមឡើយ ហើយក៏បានធ្វើជាសម្ព័ន្ធមិត្តជាមួយបារាំង កសាងប្រទេសបានសុខ សន្តិភាពទៀតផង។ លោកបញ្ជាក់ថា អ្វីដែលពិសេសមួយទៀត គឺនៅពេលទាមទារបានឯករាជ្យ ព្រះអង្គបានផ្ទេររាជសម្បត្តិទៅព្រះវររាជបិតារបស់ព្រះអង្គ ដែលករណីនេះពុំដែលឃើញក្នុងប្រវត្តិសាស្ត្រ។
ចំណែកលោកប៉ា សុជាតិវង្ស អភិបាលរាជធានីភ្នំពេញ បានមានប្រសាសន៍ដែរថា ព្រឹត្តិការណ៍នេះ គឺជាព្រឹត្តិការណ៍ថ្មីមួយទៀត ដែលប្រជាពលរដ្ឋទូទាំងប្រទេសបានអបអរសាទរទិវាបុណ្យឯករាជ្យជាតិ។ លោកបន្តថា ជាការពិតហើយ ឯករាជ្យជាតិ ពិតជាមានអត្ថន័យសម្រាប់ប្រទេសជាតិមួយ ដែលធ្លាប់រងនូវការគ្រប់គ្រងពីបរទេស អាណានិគមនិយមដែលបានដាក់នឹមត្រួតត្រានៅលើកម្ពុជា ពីព្រោះនេះហើយដែលបានធ្វើឲ្យកម្ពុជាមានសិទ្ធិស្វ័យសម្រេច ក្នុងការការពារបូរណភាពទឹកដី ការពារសិទ្ធិ សេរីភាព រួមជាមួយនឹងការមានសិទ្ធិនៅក្នុងការអភិវឌ្ឍន៍ប្រទេសជាតិ តាមបំណងប្រាថ្នារបស់ខ្លួន។
លោកប៉ា សុជាតិវង្ស បញ្ជាក់ថា ទិវានេះពិតជាមានអត្ថន័យណាស់ ហើយយើងតែងតែបានផ្សារភ្ជាប់ទិវាឯករាជ្យជាតិនេះ ទៅនិងស្នាព្រះហត្ថរបស់ព្រះបរមរតនកោដ្ឋ ដែលព្រះអង្គបានពលិកម្មគ្រប់បែបយ៉ាង ដើម្បីបុព្វហេតុឯករាជ្យជាតិនេះ ឥឡូវនេះ គឺមានតែប្រជាពលរដ្ឋខិតខំប្តេជ្ញាចិត្ត ដើម្បីការពារឯករាជ្យជាតិ ក៏មានន័យថា ដើម្បីការពារបូរណភាពទឹកដីឲ្យបានគង់វង្សតទៅអនាគតទៀត។
ដោយឡែកនាយឧត្ដមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ថា ជារៀងរាល់ឆ្នាំ នៅថ្ងៃទី៩ វិច្ឆិកា គឺរាជរដ្ឋាភិបាលកម្ពុជា តែងតែប្រារព្ធពិធីបុណ្យឯករាជ្យជាតិនេះ ដើម្បីរម្លឹកនូវបូជនីយកិច្ចរបស់ព្រះបរមរតនកោដ្ឋ ក្នុងដំណើរទស្សនកិច្ចរបស់ព្រះអង្គក្នុងការទាមទារឯករាជ្យ។ នាយឧត្ដមសេនីយ៍បន្តថា ការប្រារព្ធទិវាឯករាជ្យជាតិនេះ គឺជាព្រឹត្តិការណ៍មួយសំខាន់ណាស់ដែលធ្វើឲ្យកម្ពុជាទទួលបាននូវឯករាជ្យពេញបរិបូរណ៍នៅថ្ងៃទី៩ វិច្ឆិកា ឆ្នាំ១៩៥៣ ហើយយើងទាំងអស់គ្នាទៅនៅទីកន្លែងណាក៏ដោយ តែងតែនឹងឃើញអំពីគុណូបការៈ និងស្នាព្រះហត្ថដ៏ធំធេងរបស់ព្រះបរមរតនកោដ្ឋ៕
ទិវាបុណ្យឯករាជ្យជាតិ ៖ មន្ត្រីៗលើកឡើង ពីព្រះរាជបូជនីយកិច្ចរបស់ព្រះមហាវីរក្សត្រ ក្នុងការទាមទារឯករាជ្យ ដោយមិនបង្ហូរឈាម
0 Comments