ក្រុមជម្រើសជាតិកម្ពុជា ដែលមានសមាជិក ២៣ នាក់បូកទាំងថ្នាក់ដឹកនាំ ៩ រូបផ្សេងទៀតបានធ្វើដំណើរដល់ប្រទេសអ៊ីរ៉ង់ ដែលជាទឹកដីកណ្ដាលហើយដើម្បីត្រៀមខ្លួនប្រកួតជម្រុះពានរង្វាន់បាល់ទាត់ពិភពលោក 2018 FIFA World Cup Russia ប្រចាំទ្វីបអាស៊ី ជុំទី២ ក្នុងពូល E ជាមួយក្រុមអាហ្វហ្គានីស្ថាន។
យោងតាមថ្នាក់ដឹកនាំក្រុមជម្រើសជាតិកម្ពុជា បានប្រាប់មកពីប្រទេសអ៊ីរ៉ង់ថា ក្រុមលោកបានធ្វើដំណើរដល់ប្រទេសអាស៊ីកណ្ដាលមួយទាំងអស់គ្នា ហើយសុខសប្បាយទាំងអស់គ្នាដែរ។
មូលហេតុដែលសហព័ន្ធកីឡាបាល់ទាត់ពិភពលោក (FIFA) បានសម្រេចយកប្រទេសអ៊ីរ៉ង់ ធ្វើជាទឹកដីកណ្ដាលក្នុងការប្រកួតរវាងកម្ពុជា និងអាហ្គានីស្ថាន នេះព្រោះតែ នៅក្នុងប្រទេសអាហ្វហ្គានីស្ថាន មានបញ្ហាសង្គ្រាមរ៉ាំរ៉ៃដោះស្រាយមិនទាន់ដាច់ស្រឡះ។
ក្រុមថ្នាក់ដឹកនាំរបស់ក្រុមជម្រើសជាតិកម្ពុជា មានលោក ម៉ៃ តុលា ជាប្រធានប្រតិភូ លោក ឆាំង ពិសិដ្ឋ ជាអ្នកចាត់ការទូទៅក្រុម លោក Lee Tae Hoon ជាគ្រូបង្វឹក។ លោក អ៊ុង កងយ៉ានិត លោក អ៊ុំ សាវង្ស និងលោក ហោ សុខហេង ជាគ្រូជំនួយ លោក អ៊ិន សុខា ជាគ្រូអ្នកចាំទី លោក ហៃ សក្ករី និងលោក សៀង ប៊ុនណា ជាគ្រូពេទ្យ។
ចំណែកបញ្ជីឈ្មោះកីឡាករទាំង២៣នាក់រួមមាន អ្នកចាំទី ស៊ូ យ៉ាទី, អ៊ុំ សេរីរ័ត្ន និង ប្រាក់ មុន្នីភារុណ។ ចំណែកខ្សែការពារមាន ហុង ផេង, រស់ សំអឿន, សុខ សុវណ្ណ, រឿម ចាន់រឿន, ស៊ុន សុវណ្ណដេត, នេន សុធារ័ត្ន, សឿយ វិសាល, ណុប តុលា។
ចំពោះខ្សែបម្រើ មាន សំអឿន ពិដោរ, ហួយ ផល្លីន, វ៉ា សុខថន, ធារី ចន្ថាប៊ីន, សុះ ស៊ូហាណា, ទិត្យ ឌីណា, ច្រឹង ពលរដ្ឋ, ឈិន ឈឿន។ រីឯ ខ្សែប្រយុទ្ធមាន ឃួន ឡាប៊ូរ៉ាវី, ចាន់ វឌ្ឍនាកា, ប្រាក់ មុន្នីឧត្តម, កែវ សុខផេង។
ក្រុមជម្រើសជាតិកម្ពុជា នឹងត្រូវប្រកួតជម្រុះពានរង្វាន់បាល់ទាត់ពិភពលោក ជាមួយអាហ្វហ្គានីស្ថាន នៅវេលាម៉ោង ៣ រសៀល (ត្រូវនឹងម៉ោង ៥និង៣០ នាទី) ថ្ងៃទី១២ ខែវិច្ឆិកា ឆ្នាំ២០១៥ នៅទីលានកីឡដ្ឋាន Takhti Stadium ទឹកដីនៃប្រទេសអ៊ីរ៉ង់ ដែលជាទឹកដីកណ្ដាល។ នៅថ្ងៃទៅ ១៣ ខែ វិច្ឆិកា កម្ពុជា ត្រូវត្រឡប់មកប្រទេសកំណើតវិញដើម្បីទទួលភ្ញៀវក្រុមជម្រើសជាតិជប៉ុន នៅថ្ងៃទី ១៧ ខែវិច្ឆិកា ក្នុងរាជធានីភ្នំពេញ៕
ក្រុមជម្រើសជាតិ២៣នាក់ធ្វើដល់ប្រទេសអ៊ីរ៉ង់ ហើយដើម្បីជម្រុះ World Cup ជាមួយអាហ្វហ្គានីស្ថាន
0 Comments