ក្រសួងមហាផ្ទៃបានឲ្យដឹងថា ការបំផ្ទុះគ្រាប់បែកអត្តឃាតចំនួនពីរនៅតំបន់ Burj al-Barajneh ភាគខាងត្បូងជាយក្រុងបេរូតបានបណ្ដាលឲ្យមនុស្សយ៉ាងហោចណាស់ ៤៣ នាក់បានស្លាប់។ ចំនួនអ្នកស្លាប់ត្រូវបានគេរំពឹងថា នឹងកើនឡើង ខណៈដែលកាកបាទក្រហមរបស់ប្រទេសលីបង់បានដាក់ចំនួននៃអ្នករងរបួសជាង ២០០ នាក់។
ក្រុមសកម្មប្រយុទ្ធរដ្ឋឥស្លាមបានអះអាងទទួលខុសត្រូវចំពោះការវាយប្រហារនេះ។ ក្រុម ISបានអះអាងនៅលើ Twitter ថា ភ្នាក់ងាររបស់ពួកគេបានបំផ្ទុះគ្រាប់បែកនៅពេលជិះកង់នៅពាក់កណ្តាលផ្លូវក្នុងជាយក្រុងបេរូត។
របាយការណ៍របស់ AFP បានលើកឡើងថា ការផ្ទុះលើកទីមួយបានកើតឡើងនៅខាងក្រៅវិហារឥស្លាមរបស់ពួកនិកាយស៊ីអ៊ីត ខណៈដែលការវាយប្រហារមួយទៀតបានកើតឡើងនៅក្នុងហាងលក់នំមួយកន្លែងនៅក្បែរនោះមុនម៉ោង ៦ ល្ងាច។ អ្នកបំផ្ទុះគ្រាប់បែកអត្តឃាតបានពាក់អាវកាក់ផ្ទុកគ្រឿងផ្ទុះ។
គ្រាប់បែកលើកទីពីរត្រូវបានគេរាយការណ៍ថា បានផ្ទុះឡើង៧នាទីក្រោយមក នៅពេលដែលអ្នកឆ្លងកាត់បានព្យាយាមជួយដល់អ្នករងរបួស នៅក្នុងហេតុការណ៍ផ្ទុះលើកដំបូង។
អ្នកវាយប្រហារលើកទីបីត្រូវបានគេសម្លាប់មុនពេលដែលរូបគេបានព្យាយាមបំផ្ទុះខ្លួនឯង។
បន្ទាប់ពីការវាយប្រហារ មន្ទីរពេទ្យនៅក្នុងភាគខាងត្បូងទីក្រុងបេរូត បានលើកទឹកចិត្តដល់ប្រជាជនដើម្បីបរិច្ចាគឈាម ដោយសារតែចំនួននៃជនរងគ្រោះមានច្រើនក្រាស់ក្រែលពេក។
ប្រជាជនត្រូវបានគេស្នើឲ្យចាកចេញពីតំបន់នោះ ដោយសារតែវត្តមានរបស់ពួកគេបានរារាំងរថយន្តសង្គ្រោះមិនឲ្យយកអ្នករងរបួសទៅកាន់មន្ទីរពេទ្យ។ ទោះបីជាយ៉ាងណាក៏ដោយមកទល់នឹងពេលនេះ នៅមិនទាន់មានការវាយប្រហារផ្សេងទៀតណាមួយបានកើតឡើងនោះទេ។
លោកនាយករដ្ឋមន្ត្រីលីបង់ Tammam Salam បានប្រកាសថ្ងៃនៃការកាន់ទុក្ខជាតិនៅថ្ងៃសុក្រ ទី១៣ ខែវិច្ឆិកា។
គួរបញ្ជាក់ថា ប្រទេសលីបង់បានរងការបំផ្ទុះគ្រាប់បែកជាច្រើនលើកនៅឆ្នាំនេះដែលបានសម្លាប់មនុស្សរាប់សិបនាក់។ ការវាយប្រហារបំផ្ទុះគ្រាប់បែកចុងក្រោយបំផុតបានកើតឡើងនៅក្នុងទីក្រុង Arsal ដែលស្ថិតនៅក្បែរព្រំដែនប្រទេសស៊ីរី។ បើយោងតាមទីភ្នាក់ងារជាតិបានឲ្យដឹងថា គ្រាប់បែកនោះត្រូវបានគេលាក់នៅក្នុងម៉ូតូមួយគ្រឿង ហើយបានសម្លាប់មនុស្សចំនួន៦នាក់៕
RT
មនុស្សជាង៤០នាក់បានស្លាប់ និងរាប់សិបនាក់រងរបួសក្នុងការបំផ្ទុះគ្រាប់បែកនៅទីក្រុងបេរូត
0 Comments