ភ្នំពេញ ៖ ស្ត្រីម្នាក់ សង្ស័យមានវិបត្តិផ្ទៃក្នុងគ្រួសារធ្ងន់ធ្ងរ បានដាច់ចិត្តយកកាំភ្លើងបាញ់សម្លាប់ខ្លួនឯង តែមិនស្លាប់ ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យទាន់ពេល។ អំពើធ្វើអត្តឃាតនេះ បានកើតឡើង កាលពីព្រលប់ ថ្ងៃទី២៥ ខែមិថុនា ឆ្នាំ២០១៨នេះ ស្ថិតនៅតាមផ្លូវលេខ២៣៦ កែងនឹងផ្លូវ១៤៣ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
ប្រភពដដែលបន្តថា ស្ត្រី ដែលបាញ់សម្លាប់ខ្លួនឯង ត្រូវបានគេទម្លាយឲ្យដឹងថា ជាភរិយាមន្ត្រីយោធាជាន់ខ្ពស់ម្នាក់ អាចពាក់ដល់ផ្កាយទៀតផង ប៉ុន្តែសមត្ថកិច្ចបាន និងកំពុងបន្ដស្រាវជ្រាវបន្ថែមទៀត ទៅលើអត្តសញ្ញាណពិតប្រាកដ និងមូលហេតុ នៃអំពើអត្តឃាតមិនបានសម្រេចមួយនេះ។ ដោយសារ សាច់ញាតិ និងក្រុមគ្រួសារស្ដ្រីរងគ្រោះ មិនផ្ដល់កិច្ចសហការ ដល់អ្នកព័ត៌មានជូនសមត្ថកិច្ច ដែលចុះទៅសួរនាំនោះឡើយ ពោលថែមទាំងបង្វែងដាន និងបញ្ជូនស្ដ្រីរងគ្រោះម្ដងទៅនេះម្ដងទៅនោះ ទំនងខ្លាចបែករឿង និងដឹងពីអត្តសញ្ញាណរបស់ខ្លួន។
ប្រភពដដែលបញ្ជាក់ថា ករណីបាញ់សម្លាប់ខ្លួនឯង នេះ ត្រូវបានប្រភពខ្លះបង្ហាញថា ស្ត្រីរងគ្រោះ មានបញ្ហា ជាមួយប្តី ដែលមានតួនាទី ធំនៅក្នុងយោធា តែទោះបីយ៉ាងណាគេពុំដឹងថា ផ្តើមឡើងដោយរឿងអ្វីឡើយ លុះដល់ថ្ងៃកើតហេតុ គេបានឮសំឡេងផ្ទុះអាវុធ នៅទីតាំងខាងលើ បន្ទាប់មក ក៏មានការភ្ញាក់ផ្អើលឆោឡោឡើង ហើយនារីរងគ្រោះត្រូវបាន ក្រុមគ្រួសារ បញ្ជូនទៅកាន់ មន្ទីរពេទ្យដើម្បីធ្វើការសង្គ្រោះ ជីវិត។ អ្នកនៅក្បែរកន្លែងកើតហេតុ បានអោយដឹងថា ស្ត្រីរងគ្រោះបានបាញ់ត្រូវពោះខ្លួនឯង មួយគ្រាប់បណ្តាលឲ្យរបួសធ្ងន់។ មូលហេតុយ៉ាងណានោះ សមត្ថកិច្ចកំពុងស្រាវជ្រាវ។
ប្រភពពី មន្ដ្រីនគរបាលរូបនេះ ក៏បញ្ជាក់បន្ថែមថា គិតត្រឹមវេលាម៉ោងជិត១២រសៀលថ្ងៃត្រង់នេះ ស្ដ្រីរងគ្រោះបាន និងកំពុងបន្ដជួយសង្គ្រោះពីក្រុមគ្រូពេទ្យកាល់ម៉ែត ប៉ុន្ដែបានឆ្លងផុតមាត់មច្ចុរាជ ដោយរបួសធ្ងន់តែប៉ុណ្ណោះ។ តាមសេចក្ដីរាយការណ៍ពីមន្ទីរពេទ្យកាល់ម៉ែត ស្ដ្រីរងគ្រោះមានអាយុជាង២០ឆ្នាំ។
សូមបញ្ជាក់ថា ហេតុការណ៍នេះ បង្កឲ្យមានការភ្ញាក់ផ្អើល នៅម៉ោងជាង៥ល្ងាចថ្ងៃទី២៥ ខែមិថុនា ឆ្នាំ២០១៨ ដោយមានករណីស្ត្រីម្នាក់ បានបាញ់ប៉ុនប៉ងស្លាប់ខ្លួនឯង តែមិនស្លាប់បណ្តាលឲ្យរបួសធ្ងន់ នៅក្នុងផ្ទះវីឡារជួលមួយកន្លែង ស្ថិតនៅតាមផ្លូវលេខ២៣៦ កែងនឹងផ្លូវ១៤៣ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ៕
Source: Kampuchea Thmey Daily
0 Comments