តាកែវ ៖ មានករណីគ្រោះថ្នាក់ចរាចរណ៍មួយ បានកើតឡើងនៅយប់ថ្ងៃទី២០ ខែមិថុនា ២០១៨ នៅកំណាត់ផ្លូវខេត្តលេខ១២A ស្ថិតនៅភូមិចុងថ្នល់ សង្កាត់បារាយណ៍ ក្រុងដូនកែវ ខេត្តតាកែវ និងបានធ្វើសិស្សសាលាពីរនាក់ ដែលចេញពីរៀននៅវេលាម៉ោង១៩យប់ត្រឡប់មកផ្ទះវិញរងគ្រោះមានស្លាប់និងរបួស។
ហេតុការណ៍គ្រោះថ្នាក់ចរាចរណ៍នេះបង្កឡើងដោយរថយន្តមួយគ្រឿងបើកបរក្នុងទិសដៅបញ្ច្រាសទិសគ្នា បែកកង់មុខរេចង្កូតចូលមកបុកម៉ូតូយ៉ាងពេញទំហឹងនៅចិញ្ចឹមផ្លូវ បណ្តាលឲ្យសិស្សសាលាពីរនាក់ រងរបួសបាក់ដៃ បាក់ជើង និងបែកក្បាលយ៉ាងធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ចំណែកជនរងគ្រោះម្នាក់ទៀតរងរបួសស្រាល ដេកសម្រាកព្យាបាលនៅផ្ទះ។
លោក ឥន្ទ មណ្ឌល អធិការរងនគរបាលក្រុងដូនកែវ បានឲ្យដឹងថា រថយន្តបង្កហេតុនោះម៉ាក កាមរី ឆ្លាម ពណ៌ដីឥត ពាក់ស្លាកលេខព្រៃវែង 2A-0879 អ្នកបើកបរមិនស្គាល់អត្តសញ្ញាណ ក្រោយពេលកើតហេតុបានរត់គេចខ្លួនបាត់។
ចំណែកជនរងគ្រោះជិះម៉ូតូម៉ាកគុបជ្រុង សេ៥០ ពណ៌ទឹកប៊ិច ពាក់ស្លាកលេខតាកែវ 1I-9801 បើកបរដោយឈ្មោះ ង៉ែត ប៊ុនហុង ភេទប្រុសអាយុ ១៧ឆ្នាំ មុខរបរជាសិស្ស រស់នៅភូមិឃុំកើតហេតុ ខាងលើ រងរបួសស្រាល និងជនរងគ្រោះម្នាក់ទៀត ឈ្មោះ ឆាន់ ខុឌុន ភេទប្រុស អាយុ១៨ឆ្នាំ មុខរបរជាសិស្ស បើកបរម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ តាកែវ 1B-4774 រងរបួសធ្ងន់ ក្រោយពេលកើតហេតុ ក្រុមមន្ត្រីជំនាញបានឲ្យរថយន្តសាមុយដឹកយកមកសង្គ្រោះបន្ទាន់នៅមន្ទីរពេទ្យបង្អែកខេត្តតាកែវ តែដោយមានស្ថានភាពធ្ងន់ធ្ងរពេក ត្រូវបានគ្រូពេទ្យបញ្ជូនបន្តទៅរាជធានីភ្នំពេញ។ ជាអកុសលជនរងគ្រោះបានស្លាប់ពេលបញ្ជូនដល់ភ្នំពេញ។
អ្នកឃើញហេតុការណ៍នៅទីនោះបាននិយាយថា មុនពេលកើតហេតុ គេឃើញរថយន្តមួយគ្រឿងបើកបរមកពីទិសខាងជើង ទៅទិសខាងត្បូង រីឯម៉ូតូទាំងពីរគ្រឿងនោះបើកបរពីទិសត្បូងទៅទិសខាងជើង មកដល់ចំណុចកើតហេតុ ស្រាប់តែរថយន្តបង្កនោះបែកកង់មុខ រួចរេចង្កូតចូលមកបុកម៉ូតូពីរគ្រឿងនៅចិញ្ចឹមផ្លូវនេះតែម្តង បណ្តាលឲ្យអ្នកបើកបរម៉ូតូទាំងពីរគ្រឿងនោះម្នាក់ខ្ទាតចេញទៅចិញ្ចឹមផ្លូវ ម្នាក់ទៀតបុកផ្ទុបជាមួយនឹងកញ្ចក់រថយន្តតែម្តង។ ក្រោយមកម្ចាស់រថយន្តក៏បាននាំប្រពន្ធ និងកូនរត់គេចខ្លួនទៅបាត់តែម្តងទៅ។
បច្ចុប្បន្នរថយន្តបង្កត្រូវបានយកមករក្សាទុកជាវត្ថុតាងនៅអធិការដ្ឋាននគរបាលក្រុងដូនកែវ ចំណែកសពក្មេងរងគ្រោះត្រូវបានក្រុមគ្រួសាររៀបចំធ្វើបុណ្យតាមប្រពៃណី៕
Source: Kampuchea Thmey Daily
0 Comments