ភ្នំពេញ ៖ ជាទូទៅស្ត្រីដែលមានផ្ទៃពោះគ្រប់ខែ គឺត្រូវធ្វើការសម្រាលបុត្រនៅគភ៌មានអាយុចន្លោះពី ៣៧ ទៅ ៤០សប្តាហ៍។
ក្នុងករណីស្ត្រីមានផ្ទៃពោះដែលធ្វើការសម្រាលបុត្រលើសពីអាយុ ៤១សប្តាហ៍ឡើងទៅ នោះគេហៅថាផ្ទៃពោះលើសខែ។ ការមានផ្ទៃពោះលើសខែនេះ គឺមិនត្រឹមតែមានគ្រោះថ្នាក់សម្រាប់ទារកនោះទេ អ្នកម្តាយក៏នឹងអាចប្រឈមនឹងគ្រោះថ្នាក់ផងដែរ។
ចំពោះផលវិបាកវិញសម្រាប់ស្ត្រីជាម្តាយ អាចប្រឈមដូចជាការវះកាត់យកកូនកាន់តែច្រើនឡើង ការដាច់រហែកទ្វារមាសកម្រិត ៣ និង ៤ដង ការធ្លាក់ឈាមក្រោយសម្រាល ឬមានជំងឺ Chorioamniotite និងការបង្ករោគនៅក្នុងភ្នាសស្បូន។ ដូច្នេះហើយការតាមដានអ្នកម្តាយមានផ្ទៃពោះលើសខែគឺត្រូវធ្វើការតាមដានផ្ទៃពោះអោយបានកាន់តែជាប់លាប់ ចាប់ពីអាយុគភ៌ ៤១សប្តាហ៍និងគួរធ្វើការតាមដាន ២-៣ដង ក្នុង១សប្តាហ៍។
វិធីសាស្ត្រក្នុងការធ្វើការតាមដាន ការថយចុះនៅចលនាបម្រាសរបស់កូនក្នុងពោះ ដែលធម្មតាស្ត្រីត្រូវការតាមដានក្នុងមួយថ្ងៃ (កូនត្រូវមានចលនាបម្រាសលើសពី ៣ដងក្នុងរយៈពេល ១ម៉ោង)។ ការធ្វើការវិភាគតាមរយៈលើចង្វាក់បេះដូងកូន ការធ្វើការវិភាគ Iformatisé du RCFរួមនឹងការធ្វើអេកូសាស្ត្រ ដើម្បីស្វែងរកនៅការថយចុះបរិមាណទឹកភ្លោះដែលត្រូវធ្វើ ២ ទៅ ៣ដង ក្នុង១សប្តាហ៍ ចាប់ពីអាយុគភ៌៤១សប្ដាហ៍ឡើងទៅ (ករណីមានការខ្វះទឹកភ្លោះ ត្រូវធ្វើការជំរុញអោយឈឺពោះសម្រាល និងបន្ថែមការតាមដាន)។
ចំណាំ អ្នកម្តាយទាំងឡាយត្រូវចងចាំអំពីកាលបរិច្ឆេទនៃពេលសម្រាល ដែលកំណត់ដោយគ្រូពេទ្យជំនាញ និងទុកដាក់ឯកសារអោយបានត្រឹមត្រូវ ក្នុងករណីអ្នកម្តាយមានផ្ទៃពោះលើសខែ គួរគប្បីរួសរាន់មកជួបជាមួយគ្រូពេទ្យជំនាញសម្ភពដើម្បីធ្វើការពិនិត្យ និងតាមដានឲ្យបានត្រឹមត្រូវ ដែលអាចជៀសផុតពីគ្រោះថ្នាក់ដល់ម្តាយ និងទារកក្នុងផ្ទៃផងដែរ៕
Source: Kampuchea Thmey Daily
0 Comments