ចិន​ទទួល​រុស្ស៊ី ​និង​អ៊ីរ៉ង់​សម្រាប់​កិច្ចប្រជុំ​កំពូល ​ខណៈ​ភាព​តានតឹង​ជាមួយ​អាមេរិក​កំពុង​កើន​ឡើង

នៅ​ថ្ងៃ​សៅរ៍ ប្រទេស​ចិន​បាន​បើក​កិច្ចប្រជុំ​កំពូល​សន្តិសុខ​ថ្នាក់​តំបន់​រយៈពេល​២​ថ្ងៃមួយ ​ដោយមាន​ការចូលរួម​ពី​សំណាក់​ប្រទេស​រុស្ស៊ី អ៊ីរ៉ង់​ និង​សម្ព័ន្ធមិត្ត​ដទៃទៀត​ ដែល​កំពុង​ប្រឈមមុខ​នឹង​ភាព​តានតឹង​កាន់តែខ្លាំង​ជាមួយ​សហរដ្ឋអាមេរិក​ ជុំវិញ​ការធ្វើ​ពាណិជ្ជកម្ម​និង​ការដកខ្លួន​របស់​ក្រុង​វ៉ាស៊ីនតោន​ចេញពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​។​
​
រថពាសដែក​បាន​តម្រង់​ជួរ​នៅតាម​ដងផ្លូវ​នៃ​ទីក្រុង​ឆ្នេរសមុទ្រ Qingdao ខណៈដែល​មេដឹកនាំ​ពិភពលោក​បានមក​ដល់​កាលពី​ថ្ងៃ​សុក្រ​សម្រាប់​កិច្ចប្រជុំ​កំពូល​ប្រចាំឆ្នាំ​លើក​ទី​១៨​របស់​អង្គការ​សហប្រតិបត្តិកា​រ​សៀង​ហៃ (SCO) ដែលជា​ប្លុក​សន្តិសុខ​ក្នុង​តំបន់​ដឹកនាំ​ដោយ​ចិន​និង​រុស្ស៊ី​។​
​
បណ្តា​រដ្ឋ​ជា​សមាជិក​របស់ខ្លួន​ក៏​រួមមាន​សាធារណរដ្ឋ​អាស៊ី​កណ្តាល​ចំនួន​៤​ដែលជា​អតីត​សហភាពសូវៀត​ព្រមទាំង​ប៉ា​គី​ស្ថាន​និង​ឥណ្ឌា​ផងដែរ​។ ប្រទេស​អ៊ីរ៉ង់​គឺជា​សមាជិក​សង្កេតការណ៍​។​
​
អាជ្ញាធរ​បាន​បោសសម្អាត​ទីក្រុង​នេះ​ទាំងមូល​ដោយ​បញ្ឈប់​អ្នកលក់ដូរ ពលរដ្ឋ​និង​អ្នក​ដើរលេង​ដើម្បី​បើកផ្លូវ​ឲ្យ​ប្រធានាធិបតី​ចិន​លោក Xi Jinping, សម​ភាគី​រុស្ស៊ី​លោក Vladimir Putin និង​ប្រធានាធិបតី​អ៊ីរ៉ង់​លោក Hassan Rouhani​។ ប្រធានាធិបតី​ប៉ា​គី​ស្ថាន​លោក Mamnoon Hussain និង​នាយករដ្ឋមន្ត្រី​ឥណ្ឌា​លោក Narendra Modi ក៏​នឹងចូលរួម​កិច្ចប្រជុំ​នេះ​ផងដែរ​។​
​
កិច្ចប្រជុំ SCO បាន​ធ្វើឡើង​បន្ទាប់ពី​ប្រធានាធិបតី​អាមេរិក​លោក Donald Trump ដក​ក្រុង​វ៉ាស៊ីនតោន​ចេញពី​កិច្ចព្រមព្រៀង​អន្តរជាតិ​ឆ្នាំ​២០១៥​ជាមួយ​ប្រទេស​អ៊ីរ៉ង់​ដែល​កិច្ចព្រមព្រៀង​នោះបាន​ដាក់​កំហិត​លើ​កម្មវិធី​នុយក្លេអ៊ែរ​របស់ខ្លួន​ជា​ថ្នូរ​នឹង​ការបន្ធូរបន្ថយ​ទណ្ឌកម្មសេដ្ឋកិច្ច​។​
​
បើទោះបីជា​មិនមាន​របៀបវារៈ​ជា​ផ្លូវការ​ក៏ដោយ ក្រុមអ្នកវិភាគ​បាន​និយាយថា ប្រធានបទ​សំខាន់​មួយ​នៃ​កិច្ចពិភាក្សា​ក្នុងឆ្នាំនេះ​គឺអាច​ផ្តោតទៅលើ​ថា​តើ​អ៊ីរ៉ង់​នឹងត្រូវ​បានអនុញ្ញាត​ឲ្យ​ឡើង​ឋានៈ​ពី​ជា​អ្នកសង្កេតការណ៍​របស់ SCO ដើម្បី​ក្លាយទៅជា​រដ្ឋ​សមាជិក​ពេញលេញ​ដែរ​ឬក៏​អត់​ដែល​ដំណើរការ​នេះ​ត្រូវបាន​ប្រទេស​អ៊ីរ៉ង់​ស្វែងរក​ចាប់តាំងពី​ឆ្នាំ​២០០៨​មកម្ល៉េះ ​ប៉ុន្តែ​មិនអាច​សម្រេចបាន​ខណៈពេល​ដែល​ខ្លួន​ស្ថិតនៅក្រោម​ការដាក់ទណ្ឌកម្ម​របស់​អង្គការសហប្រជាជាតិ​។​
​
ទោះបីជា​យ៉ាងណាក៏ដោយ​កិច្ចព្រមព្រៀង​នុយក្លេអ៊ែរ​ឆ្នាំ​២០១៥​បាន​លុបចោល​ឧបសគ្គ​នោះ​។​
​លោក Dawn Murphy សាស្ត្រាចារ្យ​ផ្នែក​សន្ដិសុខ​អន្តរជាតិ​នៅ​មហាវិទ្យាល័យ​សង្គ្រាម​អាកាស​អាមេរិក​បាន​និយាយថា ឥឡូវនេះ​ក្រោយពី​ការដកខ្លួន​របស់​សហ​រដ្ឋ​អាមេរិក​ចេញពី​កិច្ចព្រមព្រៀង​នេះ​, សមាជិក​របស់ SCO អាច​នឹង​ប្រើប្រាស់​ការប្រគល់​ភាពជា​សមាជិក​ពេញលេញ​ទៅ​ឲ្យ​ប្រទេស​អ៊ីរ៉ង់​ដើម្បី​បង្ហាញ​ពី​ការគាំទ្រ​ដល់ទី​ក្រុង​តេ​អេរ៉ង់​និង​កិច្ចព្រមព្រៀង​នុយក្លេអ៊ែរ​។
​
ភាព​តានតឹង​ជុំវិញ​ប្រទេស​អ៊ីរ៉ង់​បាន​កើតមានឡើង​នៅពេលដែល​បញ្ហា​នុយក្លេអ៊ែរ​មួយទៀត​បាន​លេចឡើង​ខណៈដែល​លោក Trump និង​មេដឹកនាំ​កូរ៉េខាងជើង​លោក​គីម​ជុង​អ៊ុន​កំពុង​រៀបចំ​កិច្ចប្រជុំ​កំពូល​មិន​ធ្លាប់មាន​ពីមុនមក​នៅក្នុង​ប្រទេស​សិង្ហ​បុរី​៕ AFP

​

Source: Kampuchea Thmey Daily