ជិះ​ម៉ូតូ​ឆ្លងកាត់​កុងត្រូល​ត្រួតពិនិត្យ​អាវុធ​ជាតិផ្ទុះ សមត្ថកិច្ច​ចាប់​ដាក់​ខ្នោះ​ ខណៈ​រក​ឃើញ​ថ្នាំញៀន​នៅ​ក្នុង​ហោប៉ៅ

ភ្នំពេញ ​៖ ជនសង្ស័យ​ម្នាក់ ត្រូវបាន​កម្លាំង​នៃ​អធិការដ្ឋាន​នគរបាល​ខណ្ឌទួលគោក​ធ្វើការ​ឃាត់ខ្លួន ជាក់ស្តែង ខណៈ​ជនសង្ស័យ​រូបនេះ​លាក់​ថ្នាំញៀន​ក្នុង​ហោហៅ​ខោ ​ជិះ​ម៉ូត​ឆ្លងកាត់​កុងត្រូល អនុវត្តន៍ ច្បាប់​ចរាចរណ៍​ផ្លូវគោក និង​ត្រួតពិនិត្យ​អាវុធជាតិផ្ទុះ​នៅក្នុង​មូលដ្ឋាន សង្កាត់​ផ្សារ​ដើម​គរ ខណ្ឌទួលគោក។

ជនសង្ស័យ​ត្រូវបាន​ឃាត់ខ្លួន កាលពី​វេលា​ម៉ោង​៤​និង​១០​នាទី​ល្ងាច ថ្ងៃ​ពុធ ៨​កើត ខែ​បឋមាសាឍ ឆ្នាំច សំរឹទ្ធ​ស័ក ព​.​ស ២៥៦២ ត្រូវ​នឹង​ថ្ងៃទី​២០ ខែមិថុនា ឆ្នាំ​២០១៨ នៅ​ចំណុច​ផ្លូវ​២១៧​ កែង​ផ្លូវ​២២៣ ក្រុម​២០ ភូមិ​៤ សង្កាត់​ផ្សារ​ដើម​គរ ខណ្ឌ​ទួលគោក រាជធានី​ភ្នំពេញ។

ជនសង្ស័យ ឈ្មោះ អុន ស៊ី​ដេ​ត ហៅ​ដេ​ត ភេទ​ប្រុស អាយុ​២០​ឆ្នាំ ជនជាតិខ្មែរ មុខរបរ​មិន​ពិតប្រាកដ ស្នាក់​នៅផ្ទះ​គ្មាន​លេខ ភូមិ​ពាង​ឧកញ៉ា​អ៊ុ ស្រុក​ល្វា​ឯក ខេត្តកណ្តាល។

វត្ថុតាង​ ដែល​បាន​ចាប់​យក​រួមមាន ១-​ក្រាម​ពណ៌​ស​ថ្លា​(​សង្ស័យ​ជា​គ្រឿងញៀន​) ១​កញ្ចប់​តូច​។ ២-​ម៉ូតូ​ចំនួន​១​គ្រឿង​ម៉ាក HONDA SCOOPY (​កូន​ទា​) ពណ៌​ទឹកប្រាក់​លា​យស ពាក់​ស្លាក​លេខ ភ្នំពេញ​1W-3204។ ៣-​ទូរ​ស័ព្ទ​ដៃ​ចំនួន​០១​គ្រឿង ម៉ាក iPhone 5 ពណ៌​ស។

មន្ត្រី​ប៉ូលិស​ខណ្ឌទួលគោក បានអោយ​ឲ្យ​ដឹងថា នៅ​មុនពេល​កើតហេតុ កម្លាំង​នគរបាល​ខណ្ឌទួលគោក បានដាក់​គោលដៅ​រឹតបន្តឹង​ច្បាប់​ចរាចរណ៍​ផ្លូវគោក​នៅ ចំណុច​ផ្លូវ​២១៧​កែង​ផ្លូវ​២២៣ ក្រុម​២០ ភូមិ​៤ សង្កាត់​ផ្សារ​ដើម​គរ ខណ្ឌទួលគោក រាជធានី​ភ្នំពេញ ខណៈនោះ​ក៏​ឃើញ​ជនសង្ស័យ​ម្នាក់​ជិះ​ម៉ូតូ​មួយគ្រឿង មិនមាន​កញ្ចក់​មើល​ក្រោយ​ និង​គ្មាន​មួកសុវត្ថិភាព​សមត្ថកិច្ច​ក៏បាន​ឃាត់ខ្លួន ដើម្បី​ត្រួតពិនិត្យ ស្រាប់តែ​រកឃើញ​ថ្នាំញៀន​១​កញ្ចប់ លាក់​ក្នុង​ហោប៉ៅ​ខោ ទើប​ប៉ូលិស​ឃាត់ខ្លួន​តែម្ដង​។​

បច្ចុប្បន្ន​ជនសង្ស័យ​ខាងលើ កំពុង​ឃាត់ខ្លួន​ជា​បណ្តោះអាសន្ន​នៅ​អធិការដ្ឋាន​នគរបាល​ខណ្ឌទួលគោក ដើម្បី​សាកសួរ និង​កសាង​សំណុំរឿង​បញ្ជូនទៅ សាលាដំបូង​រាជធានី​ភ្នំពេញ ចាត់ការ​តាមផ្លូវ​ច្បាប់៕

Source: Kampuchea Thmey Daily