ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ គ្រោងនឹងបង្កើតមុខវិជ្ជាជំនាញស្រាវជ្រាវពីប្រព័ន្ធផ្កាយរណបថ្មីមួយទៀតនាពេលឆាប់ៗខាងមុខនេះ ដើម្បីលើកកម្ពស់វិស័យបច្ចេកវិទ្យានៅកម្ពុជាឲ្យកាន់តែប្រសើរឡើងថែមទៀត ស្របទៅតាមការរីកចម្រើនរបស់ពិភពលោក។
លោក ឡៅ ហ៊ីម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេសនិងវិជ្ជាជីវៈនៃក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា ក្រសួងការងារនឹងបង្កើតមុខវិជ្ជាជំនាញស្រាវជ្រាវពីប្រព័ន្ធផ្កាយរណបថ្មីនៅវិទ្យាស្ថានពហុបច្ចេកទេសកម្ពុជាដើម្បីបណ្តុះបណ្តាលដល់សិស្សនិស្សិតឆ្លើយតបទៅតាមតម្រូវការរបស់ប្រទេសជាតិ។
ថ្លែងក្រោយជំនួបពិភាក្សាការងារមួយរវាងលោក អ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនិងលោកស្រី ចិន យូ(Chen You )ប្រធានក្រុមប្រឹក្សាសាកលវិទ្យាល័យ ស៊ីនហួ(Tsinghua )របស់សាធារណរដ្ឋចិនកាលពីព្រឹកថ្ងៃទី២១ ខែមិថុនានៅទីស្តីការក្រសួងលោកបានបន្តថា ក្រសួងនឹងធ្វើការសហការជាមួយដៃគូពាក់ព័ន្ធពិសេសសាកលវិទ្យាល័យ ស៊ីនហួដើម្បីរៀបចំបង្កើតថ្នាក់សិក្សាស្តីពីប្រព័ន្ធផ្កាយរណបនេះព្រោះជាមុខវិជ្ជាមួយថ្មីដែលទាមទារនូវធនធានមនុស្សនិងសម្ភារៈបរិក្ខារជាច្រើន។
លោកថា «បច្ចុប្បន្ននិស្សិតយើងមិនទាន់មានជំនាញផ្កាយរណបនេះនៅលើទេ ប៉ុន្តែយើងនឹងរៀបចំមុខវិជ្ជានេះ។ យើងនឹង ត្រៀមបណ្តុះបណ្តាលលើជំនាញនេះ នៅវិទ្យាស្ថានពហុបច្ចេកវិទ្យាកម្ពុជា(NPIC) ។ នៅពេលយើងមានមានកិច្ចសហប្រតិបត្តិការជាមួយភាគីចិនហើយ យើងនឹងរៀបចំកិច្ចការនេះ ឥលូវនេះយើងនៅខ្វះទាំងធនធានមនុស្ស និងទាំងសម្ភារៈ ហើយជាផែនការក្រសួងនឹងរៀបចំ នាពេលឆាប់ៗនេះ យើងត្រូវត្រៀមជាមុនជាមួយដៃគូសហប្រតិបត្តិការ ហើយផ្នែកនេះវាជាតម្រូវការរបស់ប្រទេសកម្ពុជាយើងនាពេលអនាគត»។
លោកបានបន្ថែមថា « បច្ចុប្បន្នកម្ពុជាប្រើប្រាស់ទូរស័ព្ទដៃតាមប្រព័ន្ធខ្សែអុបទិក នៅប្រទេសគេជឿនលឿនគឺគេប្រើតាមរយៈផ្កាយរណបនេះហើយ។ សូម្បីតែ ការហោះហើរ ក៏យើងត្រូវប្រើផ្កាយរណបដែរ អញ្ចឹងសព្វថ្ងៃនេះនៅព្រលានយន្តហោះរបស់យើង ក៏មមាញឹកខ្លាំងណាស់ដែរ ដូច្នេះយើងត្រូវការធនធានមនុស្សទៅលើផ្នែកនេះ។ យើងនឹងជជែកគ្នាជាមួយខាងភាគីចិនសិន ថាតើយើងត្រូវរៀបចំធ្វើអីខ្លះ ដែលជាតម្រូវការធនធានមនុស្សរបស់កម្ពុជានាពេលអនាគត និងយើងត្រូវ ផ្សព្វផ្សាយ ថាផ្នែកនេះជាតម្រូវការខ្ពស់របស់កម្ពុជាយ៉ាងម៉េច»។
ទន្ទឹមនឹងនេះលោកបានបន្ថែមថា ក្រសួងនឹងធ្វើការផ្សព្វផ្សាយកម្មវិធីសិក្សាស្តីពីប្រព័ន្ធផ្កាយរណបនេះឲ្យបានទូលំទូលាយដល់សិស្សនិស្សិតដើម្បីចុះឈ្មោះចូលរៀនឲ្យបានច្រើននឹងអាចបន្តការសិក្សានៅ សាកលវិទ្យាល័យ ស៊ីនហួប្រទេសចិនដែលមានការបណ្តុះបណ្តាលើជំនាញនេះផងដែរ។
ក្រៅពីជួយបណ្តុះបណ្តាលជំនាញប្រព័ន្ធផ្កាយរណប លោក ឡៅ ហ៊ីមបានបញ្ជាក់ថាសាកលវិទ្យាល័យនឹងបន្តជួយផ្តល់អាហារូបករណ៍ដល់មន្ត្រីរាជការក្រសួងក្នុងរយៈពេលវែងនិងបណ្តុះបណ្តាលដល់គ្រូបច្ចេកទេសរយៈពេលខ្លីនៅប្រទេសចិនផងដែរ។ជាក់ស្តែងកន្លងមកសាកលវិទ្យាល័យនេះ បានផ្តល់អាហារូបករណ៍ដល់មន្ត្រីក្រសួងចំនួន៣នាក់រួចមកហើយនិងត្រៀមបញ្ជូនទៅ២នាក់បន្ថែមទៀតនាពេលខាងមុខនេះ។
គួរបញ្ជាក់ថា សាកលវិទ្យាល័យស៊ីងហួរ ជាសកលវិទ្យាល័យដ៏ល្បីល្បាញមួយនៅប្រទេសចិន ដែលមានអាយុកាលជាង១០០ឆ្នាំមកហើយ ដោយធ្វើការបណ្តុះបណ្តាលលើជំនាញជាច្រើន ដូចជាវិស័យកសិកម្ម សុខាភិបាល បច្ចេកវិទ្យាទំនើបៗ ជាពិសេសផ្នែកផ្កាយរណបនេះ៕
Source: Kampuchea Thmey Daily
0 Comments