តុលាការកូរ៉េខាងត្បូងមួយ បានប្រកាសថា ការសម្លាប់សត្វឆ្កែដើម្បីយកសាច់គឺជារឿងខុសច្បាប់។ នេះជាការសម្រេចជាប្រវត្តិសាស្ត្រមួយដែលសកម្មជនសិទ្ធិសត្វនិយាយនៅថ្ងៃព្រហស្បតិ៍ថា អាចត្រួសត្រាយផ្លូវសម្រាប់ការធ្វើឲ្យការបរិភោគសាច់សត្វនេះក្លាយទៅជារឿងខុសច្បាប់។
សាច់នេះគឺជាផ្នែកមួយនៃអាហាររបស់កូរ៉េខាងត្បូងខណៈដែលសត្វឆ្កែប្រហែលមួយលានក្បាលត្រូវបានគេជឿថាត្រូវបានបរិភោគជារៀងរាល់ឆ្នាំ។
ប៉ុន្តែការប្រើប្រាស់បានធ្លាក់ចុះខណៈដែលប្រជាជនកូរ៉េខាងត្បូងកាន់តែចាប់យកគំនិតថាសត្វឆ្កែគឺជាមិត្តល្អបំផុតរបស់មនុស្សជាជាងសត្វចិញ្ចឹមផ្សេងទៀតហើយការអនុវត្តនាពេលបច្ចុប្បន្ននេះជាអ្វីមួយដែលគួរឲ្យភ្ញាក់ផ្អើលក្នុងចំណោមក្មេងៗជំនាន់ក្រោយនិងមានសម្ពាធពីក្រុមសកម្មជនកាន់តែខ្លាំងឡើង។
ថ្វីបើមិនមានការហាមឃាត់ជាក់លាក់ក៏ដោយ អាជ្ញាធរបានស្នើសុំច្បាប់អនាម័យឬច្បាប់ការពារសត្វដែលហាមឃាត់វិធីសម្លាប់សាហាវឃោឃៅដើម្បីបង្ក្រាបកសិដ្ឋានចិញ្ចឹមឆ្កែនិងភោជនីយដ្ឋាននានាមុនពេលព្រឹត្តិការណ៍អន្តរជាតិដូចជាកីឡាអូឡាំពិកទីក្រុង Pyeongchang ជាដើម។
អង្គការសិទ្ធិសត្វ Care កាលពីឆ្នាំមុនបានដាក់ពាក្យបណ្តឹងប្រឆាំងនឹងម្ចាស់កសិដ្ឋានចិញ្ចឹមឆ្កែមួយកន្លែងក្នុងទីក្រុង Bucheon ដោយចោទប្រកាន់ថា គាត់បានសម្លាប់សត្វដោយគ្មានហេតុផលត្រឹមត្រូវនិងរំលោភលើបទបញ្ជាអគារនិងអនាម័យហើយក្រោយមករដ្ឋអាជ្ញាបានចោទប្រកាន់គាត់។
គាត់ត្រូវបានកាត់ទោសដោយតុលាការក្រុង Bucheon ដែលបានសម្រេចថា ការបរិភោគសាច់នេះមិនមែនជាហេតុផលស្របច្បាប់ដើម្បីសម្លាប់សត្វឆ្កែនោះទេនិងបានពិន័យជាប្រាក់ចំនួន៣លានវ៉ុន (២,៧០០ដុល្លារអាមេរិក)។
សេចក្តីសម្រេចរបស់តុលាការបានបង្កឲ្យមានការតវ៉ាខឹងសម្បាពីម្ចាស់កសិដ្ឋានចិញ្ចឹមឆ្កែដែលបរិវេណរបស់ពួកគេបានធ្វើជាកន្លែងសម្លាប់ខណៈដែលរដ្ឋាភិបាលមិនអនុញ្ញាតឲ្យមានការសម្លាប់សត្វឆ្កែឡើយ។
គួរបញ្ជាក់ថា មានកសិដ្ឋានចិញ្ចឹមឆ្កែប្រហែល១៧,០០០កន្លែងនៅទូទាំងប្រទេស៕ AFP
Source: Kampuchea Thmey Daily
0 Comments