ពាន​លី​គ​ហ្វូ​ត​សាល​ឆ្នាំ​២០១៨ ​កាន់តែ​កៀក​រក​ឃើញ​ក្រុម​ខ្លាំង​ទាំង​៤​ប្រចាំ​រដូវ​កាល​ហើយ

នៅសល់តែ​៤​សប្ដាហ៍​ទៀត​ប៉ុណ្ណោះ​ពានរង្វាន់​លី​គ​បាល់ទាត់​ក្នុង​សាលា​ឆ្នាំ​២០១៨ (National Futsal League 2018) ក្រោម​ការ​រៀបចំឡើង​ដោយ​សហព័ន្ធ​កីឡាបាល់ទាត់​កម្ពុជា នឹង​រកឃើញ​ក្រុម​ខ្លាំង​គេ​ចំនួន​៤​ក្រុម​ ដែល​អាច​រក​កៅអី​ឡើងទៅ​ដណ្តើម​ជើងឯក​បាន​ហើយ ខណៈ​នៅ​ចុង​សប្ដាហ៍​នេះ​កំពុងដំណើរការ​ដល់​ស​ប្ដា​ហ៍​ទី​១៥ ហើយ ដោយ​ក្រុម​ទាំង​១០​ត្រូវ​ប្រកួត​វិលជុំ​សន្សំ​ពិន្ទុ​ជា​បន្ត​។​

​តាម​គម្រោង​ប្រកួត​សប្ដាហ៍​ទី​១៥ នេះ​មាននៅ​ថ្ងៃ​សៅរ៍ ទី​២៣ ខែមិថុនា វេលា​ម៉ោង​២:៣០​នាទី​ល្ងាច​ក្រុម Down Town Sport ជួប​ក្រុម Fan Sport FT ហើយ​នៅ​ម៉ោង​៤​ល្ងាច​ក្រុម​ឱ​ម៉ា​ល់ ប៉ះ​ក្រុម​អាណាចក្រ​បៃតង និង​នៅ​ម៉ោង​៥:៣០​នាទី​ល្ងាច​ក្រុម B.A United ជួប​ក្រុម Panda FC ហើយ​នៅ​ថ្ងៃអាទិត្យ ទី​២៤ ខែមិថុនា វិញ​វេលា​ម៉ោង​៤​ល្ងាច​ក្រុមយុវជន​៧​មករា ជួប​ក្រុម​ស​.​ស​.​យ​.​ក កំចាយមារ និង​នៅ​ម៉ោង​៥:៣០​នាទី​ល្ងាច ក្រុម​ឆន្ទៈ​កីឡា ជួប​ក្រុម Home Sport FC​។

ងាក​មក​មើល​ចំណាត់ថ្នាក់​បណ្ដោះអាសន្ន​ក្រោយ​ប្រកួត​បាន​១៤​លើក​ម្នាក់​មក​ឃើញ​ថា​ ក្រុម Down Town Sport FC​ឈរ​លេខ​១ មាន​៣៣​ពិន្ទុ តាម​ពីក្រោយ​ដោយ​ក្រុម Home Sport FC ឈរ​លេខ​២ មាន​៣០​ពិន្ទុ ក្រុម ស​.​ស​.​យ​.​ក កំចាយមារ ឈរ​លេខ​៣ មាន​២៧​ពិន្ទុ ស្មើគ្នា​នឹង​ក្រុម​លេខ​៤ ឱ​ម៉ា​ល់ តែ​ខុស​គ្រាប់​បាល់​ចំណេញ​។ ក្រុម​លេខ​៥ អាណាចក្រ​បៃតង មាន​២១​ពិន្ទុ ហើយ​ក្រុម​លេខ​៦ Fan Sport FT មាន​២១​ពិន្ទុ ដូចគ្នា​។ លេខ​៧ ក្រុម Panda FC មាន​១៤​ពិន្ទុ ហើយ​ក្រុម​ឆន្ទៈ​កីឡាករ ឈរ​លេខ​៨ មាន​១១​ពិន្ទុ​ដូចគ្នា ហើយ​ក្រុមយុវជន​៧​មករា ឈរ​លេខ​៩ មាន​១១​ពិន្ទុ និង​ក្រុម​B.A United លេខ​១០ មាន​៤​ពិន្ទុ​។​

​ចំណែក​ក្រុម​ដែល​ស្ថិតក្នុង​បញ្ជី​ក្រុម​ខ្លាំង​ទាំង​៤​ប្រចាំ​រដូវ​កាល (Top4) មាន​ក្រុម Down Town Sport FC​ក្រុម​ឱ​ម៉ា​ល់ ក្រុម​Home Sport និង​ក្រុម ស​.​ស​.​យ​.​ក កំចាយមារ​។ ក្រុម​ដែល​ដណ្តើមបាន​កៅអី Top4 នឹងត្រូវ​បែងចែក​កៅអី​គ្នា​នៅ​ប្រកួត​ចុងក្រោយ​ដោយ​ក្រុម​លេខ​២​ប៉ះ​ក្រុម​លេខ​៣ និង​ក្រុម​លេខ​១​ប៉ះ​ក្រុម​លេខ​៤ ដើម្បី​ឡើងទៅ​លេង​វគ្គ​ផ្តាច់ព្រ័ត្រ​ប្រជែង​យក​ជើងឯក​ប្រចាំ​រដូវ​កាល​ផងដែរ​។​

​ការប្រកួត​លី​គ​ហ្វូ​ត​សាល​ជា​លើកដំបូង​នៅក្នុង​ស្រុក​នេះ​ធ្វើឡើង​ពីថ្ងៃ​ទី​០៣ ខែ មិនា រហូតដល់​ថ្ងៃទី​២៨ ខែ កក្កដា ឆ្នាំ ២០១៨ ខណៈ​ភាកច្រើន​ប្រកួត​នៅ​ថ្ងៃ​ចុង​សប្ដាហ៍ ដែលមាន​ក្រុម​ជា​សមាជិក​ចំនួន​១០​ក្រុម​លើ​ទីលាន ដឹ​ប្លូ​ស្ព័ត (The Blue Sport) ម្តុំ​ទួលគោក​។ ការប្រកួត​មាន​រូបមន្ត​ជា​លក្ខណៈ​ប្រកួត​បែប​លី​គ តាម​ប្រព័ន្ធ​លី​គ​២​ជុំ (​វិលជុំ​សន្សំ​ពិន្ទុ​) ហើយ​ក្រុម​ដែលមាន​ពិន្ទុ​ច្រើនជាងគេ​ចំនួន​៤​ក្រុម (Top4) ត្រូវ​ឡើងទៅ​ប្រកួត​គ្នា​ដណ្តើម​ជើងឯក​ប្រចាំ​រដូវ​កាល​។ ក្រុម​ជើងឯក​នឹង​ទទួលបាន​ពានរង្វាន់​១ មេដាយមាស​ម្នាក់​១​និង​ប្រាក់រង្វាន់​២០​លាន​រៀល​ផងដែរ៕

​

Source: Kampuchea Thmey Daily