ពិភពលោក បានមើលឃើញពីការផ្លាស់ប្តូរ ខណៈកិច្ចប្រជុំលើកដំបូងរវាងប្រធានាធិបតីសហរដ្ឋអាមេរិកកំពុងកាន់តំណែង និងប្រមុខរដ្ឋរបស់កូរ៉េខាងជើង បានធ្វើឡើងក្នុងប្រទេសសិង្ហបុរីនៅថ្ងៃអង្គារ។
ខណៈដែលហ្វូងមនុស្ស បានតម្រង់ជួរនៅតាមដងផ្លូវនៃប្រទេសសិង្ហបុរីដើម្បីមើលលោក ដូណាល់ ត្រាំ និងលោក គីម ជុងអ៊ុន ធ្វើដំណើរមកសម្រាប់ប្រជុំរបស់ពួកគេនៅពេលព្រឹកនោះ, មនុស្សរាប់លាននាក់ទៀតបានមើលពេលវេលាជាប្រវតិ្តសាស្ត្រនេះ ដែលបានផ្សាយផ្ទាល់តាមកញ្ចក់ទូរទស្សន៍។
ព្រឹត្តិការណ៍នេះត្រូវបានតាមដានយ៉ាងយកចិត្តទុកដាក់នៅក្នុងរដ្ឋធានីសេអ៊ូលរបស់កូរ៉េខាងត្បូងដែលនៅទីនោះ មនុស្សរាប់ម៉ឺននាក់បានប្រមូលផ្តុំគ្នានៅស្ថានីយរថភ្លើងនានានិងនៅកន្លែងសាធារណៈជាច្រើនសម្រាប់ការបញ្ចាំងជាសាធារណៈនៃកិច្ចប្រជុំកំពូលនេះ។
ការទះដៃអបអរសាទរបានកើតឡើងនៅពេលលោក គីម និងលោក ត្រាំ ចេញមកក្រៅហើយស្វាគមន៍គ្នាទៅវិញទៅមកដោយការចាប់ដៃគ្នា។
អេក្រង់ធំៗនៅអគារល្បីៗជុំវិញទីក្រុងសេអ៊ូលក៏បានផ្សាយអំពីជំនួបនេះផងដែរ។ ទីភ្នាក់ងារព័ត៌មាន Yonhap របស់កូរ៉េខាងត្បូងបានបង្ហាញពីលោកប្រធានាធិបតី មូន ចេអ៊ីន ញញឹមនៅពេលដែលលោក ត្រាំ និងលោក គីម ចាប់ដៃគ្នា។
Yonhap បានដកស្រង់សម្តីរបស់លោក មូន ដែលបាននិយាយនៅក្នុងកិច្ចប្រជុំគណៈរដ្ឋមន្ត្រីមួយថា “កិច្ចប្រជុំកំពូលកូរ៉េខាងជើង - អាមេរិកបានចាប់ផ្តើមហើយ។ ខ្ញុំគិតថា មនុស្សគ្រប់រូបកំពុងផ្តោតការយកចិត្តទុកដាក់ទៅលើប្រទេស សិង្ហបុរី”។
ប៉ុន្តែក៏មានបាតុកម្មផងដែរនៅក្នុងទីក្រុងសេអ៊ូលដោយសកម្មជនប្រឆាំងសង្គ្រាមបានប្រមូលផ្ដុំនៅខាងក្រៅស្ថានទូតសហរដ្ឋអាមេរិកដើម្បីអំពាវនាវឲ្យមានសន្ធិសញ្ញាសន្តិភាពមួយ និងការបញ្ចប់អរិភាពរយៈពេលជិត៧០ឆ្នាំ។ សង្គ្រាមកូរ៉េឆ្នាំ ១៩៥០-៥៣ ត្រូវបានបញ្ចប់តែជាមួយបទឈប់បាញ់មួយប៉ុណ្ណោះ មិនមែនជាសន្ធិសញ្ញាសន្តិភាពទេ។នៅ Koreatown ក្នុងទីក្រុង Los Angeles, មនុស្សជាច្រើនបានប្រមូលផ្តុំគ្នាសម្រាប់ការមើលជាសហគមន៍នៃកិច្ចប្រជុំកំពូលនេះហើយបានអបអរសាទរនិងទះដៃនៅពេលលេចរូបភាពនៃការចាប់ដៃនៅក្នុងប្រទេសសិង្ហបុរី។
Koreatown ជាកន្លែងប្រមូលផ្តុំដ៏ធំបំផុតមួយរបស់ជនជាតិកូរ៉េនៅសហរដ្ឋអាមេរិកហើយពលរដ្ឋជាច្រើននៅទីនោះបានសម្តែងនូវក្តីសង្ឃឹមរបស់ពួកគេចំពោះលទ្ធផលវិជ្ជមាននៃកិច្ចប្រជុំកំពូលក្នុងប្រទេសសិង្ហបុរី។
នៅឆ្នេរភាគខាងកើតសហរដ្ឋអាមេរិក ហ្វូងមនុស្សក៏បានចូលរួមក្នុងការទស្សនាដ៏ធំនៃព្រឹត្តិការណ៍នេះផងដែរដោយមានមនុស្សជាច្រើនបានប្រមូលផ្តុំគ្នានៅឯទីលាន Times Square របស់ទីក្រុងញូវយ៉កដើម្បីមើលកិច្ចប្រជុំកំពូលនេះនៅលើអេក្រង់ទូរទស្សន៍។
នៅទីក្រុងតូក្យូ មនុស្សបានប្រញាប់ប្រញាលទិញលេខពិសេសរបស់កាសែតដែលចុះផ្សាយអំពីកិច្ចប្រជុំកំពូលនេះខណៈដែលប្រជាជនជប៉ុនកំពុងឃ្លាំមើលចលនារបស់គីមយ៉ាងយកចិត្តទុកដាក់ដែលកាលពីមុនបានបាញ់បង្ហោះគ្រាប់រ៉ុក្កែតលើប្រទេសជប៉ុន៕ CNA
Source: Kampuchea Thmey Daily
0 Comments