ភ្នំពេញ ៖ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងកាលពីថ្ងៃទី២២ ខែមិថុនា ឆ្នាំ២០១៨ ថា ពលរដ្ឋខ្មែរចំនួន២១នាក់ ត្រូវបានស្ថានឯកអគ្គរាជទូតកម្ពុជាជួយសង្គ្រោះពីប្រទេសចំនួន៣ ហើយបានបញ្ជូនមកកម្ពុជាវិញ ដើម្បីជួបជុំក្រុមគ្រួសារ។
តាមលោក ជុំ សុន្ទរី ករណីទី១. ស្ថានឯកអគ្គរាជទូតកម្ពុជាប្រចាំប្រទេសសិង្ហបូរី បានជួយរៀបចំមាតុភូមិនិវត្តន៍របស់ពលការិនី ខ្មែរចំនួន២នាក់ មកពីខេត្តកំពង់ចាម និងខេត្តកំពង់ឆ្នាំង ដែលបានទៅបម្រើការងារជាជំនួយការមេផ្ទះនៅប្រទេសសិង្ហបូរី កាលពីខែមេសា និងខែឧសភា ឆ្នាំ២០១៨ តែមិនអាចទ្រាំទ្រការងារលំបាកនៅទីនោះបាន និងដោយសារមានធុរៈក្នុងគ្រួសារ។
ស្ថានទូត បានផ្តល់កន្លែងស្នាក់នៅ អាហារបរិភោគ ព្រមទាំងជួយទាមទារលិខិតឆ្លងដែន និងសំបុត្រយន្តហោះពីភ្នាក់ងារនាំពលករ ហើយពលការិនីទាំងពីរនាក់បានមកដល់កម្ពុជាវិញ ជាបន្តបន្ទាប់ នៅថ្ងៃទី០៨ និងថ្ងៃទី២១ ខែមិថុនា ឆ្នាំ២០១៨ ។
ករណីទី២. ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានសហការជាមួយអាជ្ញាធរមានសមត្ថកិច្ចរបស់ម៉ាឡេស៊ី ដោះស្រាយបញ្ហានិងរៀបចំមាតុភូមិនិវត្តន៍របស់ពលរដ្ឋខ្មែរចំនួន១២នាក់ មកពីខេត្តកណ្តាល កំពត កំពង់ធំ កំពង់ចាម ត្បូងឃ្មុំ ពោធិ៍សាត់ ព្រះវិហារ និងរាជធានីភ្នំពេញ ក្នុងនោះពលករមានចំនួន២នាក់ និងពលការិនី៧នាក់ ដែលបានទៅធ្វើការដោយខុសច្បាប់នៅប្រទេសម៉ាឡេស៊ី និង៣នាក់ជាកុមារ (កូនរបស់ពល-ការិនីម្នាក់)។ ពលរដ្ឋខ្មែរទាំង១២នាក់នោះ បានមកដល់កម្ពុជាវិញជាបន្តបន្ទាប់ ចន្លោះពីថ្ងៃទី០៣ ដល់ថ្ងៃទី១៧ ខែមិថុនា ឆ្នាំ២០១៨។
ករណីទី៣. ស្ថានអគ្គកុងស៊ុលកម្ពុជាប្រចាំទីក្រុងសៀងហៃ ប្រទេសចិន បានសហការជាមួយអាជ្ញាធរមានសមត្ថកិច្ចរបស់ចិន បានអន្តរាគមជួយសង្គ្រោះនិងរៀបចំមាតុភូមិនិវត្តន៍របស់ស្ត្រីខ្មែរចំនួន៧នាក់ មកពីខេត្តកណ្តាល កំពង់ចាម តាកែវ បាត់ដំបង ពោធិ៍សាត់ ព្រៃវែង និងស្វាយរៀង ដែលត្រូវបានមេខ្យល់នាំធ្វើដំណើរពីកម្ពុជា ទៅរៀបការ និងស្នាក់នៅដោយខុសច្បាប់នៅក្នុងប្រទេសចិន កាលពីខែធ្នូ ឆ្នាំ២០១៣ និងដើមឆ្នាំ២០១៨។
លោក ជុំ សុន្ទរី អះអាងថា ស្ថានអគ្គកុងស៊ុល បានផ្តល់កន្លែងស្នាក់នៅ អាហារបរិភោគ និងរៀបចំឯកសារធ្វើដំណើរដល់ស្ត្រីខ្មែរ ទាំង៧នាក់ ហើយពួកគេនឹងមកដល់កម្ពុជាវិញ នៅយប់ថ្ងៃទី២២ ខែមិថុនា ឆ្នាំ២០១៨៕
Source: Kampuchea Thmey Daily
0 Comments