អគ្គមេធាវីអាមេរិកលោក Jeff Sessions បានប្រកាសកាលពីថ្ងៃចន្ទថា ជនរងគ្រោះនៃអំពើហិង្សាក្នុងគ្រួសារនិងអំពើហិង្សាដោយក្រុមជើងកាង នឹងលែងមានសិទ្ធិជ្រកកោនទៀតហើយ។ នេះគឺជាកិច្ចខិតខំប្រឹងប្រែងមួយដើម្បីកាត់បន្ថយលំហូរនៃក្រុមគ្រួសារជនអន្តោប្រវេសន៍ខុសច្បាប់មកពីតំបន់អាមេរិកកណ្តាល។
នៅក្នុងការសម្រេចចិត្តលើករណីនៃស្ត្រីមិនស្គាល់អត្តសញ្ញាណម្នាក់មកពីប្រទេសអែលសាល់វ៉ាឌ័រដែលត្រូវបានចាប់រំលោភនិងធ្វើបាបដោយស្វាមីរបស់នាងអស់រយៈពេលជាច្រើនឆ្នាំ, លោក Sessions បាននិយាយថា អ្នកស្វែងរកសិទ្ធិជ្រកកោនត្រូវតែបង្ហាញថា ពួកគេបានទទួលរងការបៀតបៀនដែលកើតចេញពីសមាជិកភាពរបស់ពួកគេនៅក្នុងក្រុមខុសគ្នា។
លោក Sessions បាននិយាយថា “ជនបរទេសម្នាក់អាចរងការគំរាមកំហែងនិងអំពើហិង្សានៅក្នុងប្រទេសក្រៅ ដោយសារហេតុផលមួយចំនួនទាក់ទងនឹងសង្គម សេដ្ឋកិច្ច គ្រួសារឬស្ថានភាពផ្ទាល់ខ្លួនដទៃទៀតរបស់នាង។ ប៉ុន្តែលក្ខន្តិកៈសុំសិទ្ធិជ្រកកោនគឺមិនបានផ្តល់ការដោះស្រាយសម្រាប់សំណាងអាក្រក់ទាំងអស់នេះឡើយ”។
នេះជាការបដិសេធចំពោះសេចក្តីសម្រេចសុំសិទ្ធជ្រកកោនកាលពីលើកមុនដែលបានទទួលយកស្ត្រីរៀបការហើយដែលជាជនរងគ្រោះនៃទំនាក់ទំនងអំពើហិង្សា។
សេចក្តីសម្រេចនេះបានកើតឡើងជាផ្នែកមួយនៃការរុញច្រានចំពោះការមកដល់របស់ជនអន្តោប្រវេសន៍រាប់ពាន់នាក់ពីប្រទេសហុងឌូរ៉ាស់ ហ្គាតេម៉ាឡានិងអែលសាល់វ៉ាឌ័រកាលពីឆ្នាំមុនដែលបានរត់ភៀសខ្លួនចេញពីអំពើហិង្សារីករាលដាលនៅក្នុងប្រទេសរបស់ពួកគេ។
ភាគច្រើននៃពួកគេបានឆ្លងកាត់ព្រំដែនអាមេរិក-ម៉ិកស៊ិកហើយបានសុំសិទ្ធិជ្រកកោនភ្លាមៗ។
កាលពីដើមខែឧសភា លោក Sessions បានប្រកាសថា អ្នកឆ្លងដែនខុសច្បាប់រួមទាំងអ្នកស្វែងរកសិទ្ធិជ្រកកោនផងដែរគឺនឹងត្រូវបានចោទប្រកាន់ពីបទឧក្រិដ្ឋហើយឪពុកម្តាយនិងកូនៗនឹងត្រូវបានបំបែកគ្នា។
គោលនយោបាយនេះបានបង្កឲ្យមានការរិះគន់យ៉ាងខ្លាំងក្លានិងការចោទប្រកាន់ពីការិយាល័យសិទ្ធិមនុស្សរបស់អង្គការសហប្រជាជាតិថា សិទ្ធិកុមារកំពុងត្រូវបានរំលោភបំពានដោយគោលនយោបាយនេះ។
គួរបញ្ជាក់ថា ការដាក់ពាក្យសុំសិទ្ធិជ្រកកោនមានជាង៧,៨០០ត្រឹមតែក្នុងខែមីនាតែមួយហើយតុលាការអន្តោប្រវេសន៍បានប្រឈមមុខនឹងបញ្ជីមិនទាន់ធ្វើហើយដែលមានប្រហែលជា ៧០០,០០០នៃករណីគ្រប់ប្រភេទ៕ AFP
Source: Kampuchea Thmey Daily
0 Comments