ព្រឹត្តិការណ៍រត់ពាក់កណ្ដាលម៉ារ៉ាតុងភ្នំពេញអន្តរជាតិឆ្នាំ២០១៨នេះ នឹងធ្វើនៅព្រឹកថ្ងៃអាទិត្យទី១៧ខែមិថុនា ដោយកំណត់ការចេញដំណើរ និងដល់ទីនៅមុខព្រះបរមរាជវាំងដូចរៀងរាល់ឆ្នាំ។
រត់ពាក់កណ្ដាលម៉ារ៉ាតុងភ្នំពេញអន្តរជាតិ ជាព្រឹត្តិការណ៍មួយ ធ្វើឡើងដើម្បីអបអរសាទរព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ និងដើម្បីមនុស្សធម៌ សុខភាព មិត្តភាព សាមគ្គីភាព និងកិច្ចការពារបរិស្ថាន។
ក្នុងសន្និសីទកាសែតនាព្រឹក នៅថ្ងៃទី១២ មិថុនា លោកវ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកបានឲ្យដឹងថា កាលពីឆ្នាំកន្លងទៅមានអ្នកចូលរួមរត់ជាង៤.០០០នាក់សម្រាប់ឆ្នាំនេះលោកមានជំនឿចិត្តថា ចំនួនអ្នករត់នឹងកើនឡើងបន្តិចបន្តួចប៉ុណ្ណោះ។
លោកពន្យល់ថា មូលហេតុ ដែលចំនួនអ្នកចូលរួម ពិសេសជនបរទេសចូលរួមមិនសូវច្រើននោះ ដោយសារតែព្រឹត្តិការណ៍ម៉ារ៉ាតុងធំៗនៅក្រៅប្រទេស ទើបតែបញ្ចប់ ហើយអ្នកចូលរួមរត់ចម្ងាយឆ្ងាយបែបនេះគេត្រូវការសម្រាកតិចបំផុត ដើម្បីស្ដារកម្លាំងឡើងវិញអញ្ចឹងហើយទើបជនបរទេសដែលមកចូលរួមមិនសូវមានច្រើននោះ។
ទោះជាយ៉ាងនេះក៏ដោយ ក៏គេសង្កេតឃើញថា គិតត្រឹមពេលនេះអ្នកចូលរួមរត់ចម្ងាយ២១គីឡូម៉ែត្រជាជនបរទេសមានចំនួនជាង២០០នាក់ ខ្មែរជាង១០០នាក់ រត់១០គីឡូម៉ែត្របរទេសជាង២០០នាក់ ខ្មែរជាង១.០០០នាក់ និងរត់ ៣គីឡូម៉ែត្របរទេសជាង៥០នាក់ និង ខ្មែរជាង១.០០០នាក់។ បរទេសគឺមកពីប្រទេសចំនួន៣៦។
លោកអគ្គលេខាធិការ បានធ្វើការកត់សម្គាល់ថា នេះជាព្រឹត្តិការណ៍រត់ប្រចាំឆ្នាំ ដើម្បីអបអរពិធីបុណ្យចម្រើនព្រះជន្មសម្ដេចម៉ែ។ ថវិកាដែលបានពីការរត់នេះ នឹងយកទៅប្រើប្រាស់សម្រាប់ការងារមនុស្សធម៌នោះគឺការជួយដល់មន្ទីរពេទ្យគន្ធបុប្ផា។ លោកអគ្គលេខាធិការបានចាត់ទុកថា អ្វីដែលប្លែកសម្រាប់ឆ្នាំនេះ គឺជនជាតិកម្ពុជាចូលរួមរត់ពាក់កណ្ដាលម៉ារ៉ាតុង និង១០គីឡូម៉ែត្រច្រើនជាងឆ្នាំកន្លងទៅ។ នេះបញ្ជាក់ថា សុខភាពផ្លូវកាយ និងផ្លូវចិត្តរបស់ពួកគេកាន់តែកាន់ ប្រសើរជាងមុន។
លោកសែម ផល្លា ដែលជាមន្ត្រីទទួលបន្ទុកខាងរៀបចំបច្ចេកទេសប្រកួតបានបញ្ជាក់ថា ឆ្នាំនេះការរត់២១គីឡូម៉ែត្រមិនមានឆ្លងស្ពានឡើយ ព្រោះស្ពានជ្រោយចង្វារមានតែមួយបើរត់ឆ្លងស្ពាននឹងបង្កឲ្យស្ទះចរាចរ។ ការរត់គឺធ្វើត្រឹមតែរង្វង់ត្រើយខាងលិចដោយឆ្លងកាត់ផ្លូវសំខាន់ៗមួយចំនួន និងតំបន់កោះពេជ្រតែប៉ុណ្ណោះ៕
Source: Kampuchea Thmey Daily
0 Comments