គាស់ទម្លុះទម្លាយផ្ទះ២ខ្នងទាំងកណ្ដាលថ្ងៃ យកទ្រព្យសម្បត្តិអស់ក្រែល

Cambodia News June 21, 2018

បាត់ដំបង ៖ លំនៅដ្ឋានរបស់ប្រជាពលរដ្ឋចំនួន២ខ្នង ដែលមានទីតាំងនៅជាប់គ្នាត្រូវបានជនមិនស្គាល់មុខ ធ្វើសកម្មភាពគាស់ទម្លុះទម្លាយ ទាំងកណ្តាលថ្ងៃ ដោយបានប្រមូលយកនូវទ្រព្យសម្បត្តិ អស់ក្រែលទៅជាមួយផង ខណៈដែលម្ចាស់ផ្ទះមិននៅ រីឯសមត្ថកិច្ចក៏អាចលង់លក់ផងដែរ។

ករណីនេះបានកើតឡើងនៅវេលាម៉ោង ១១ និង ៣០ នាទី ថ្ងៃទី ២០ ខែមិថុនា ឆ្នាំ២០១៨ នៅត្រង់ចំណុចភូមិស្វាយជ្រុំ ឃុំជ្រៃ ស្រុកថ្មគោល ខេត្តបាត់ដំបង ដោយជនសង្ស័យដែលមិនស្គាល់មុខ និងមិនដឹងចំនួន បានធ្វើសកម្មភាព គាស់ផ្ទះចំនួន២ខ្នង ដែលនៅជាប់គ្នា ព្រមទាំងបានប្រមូលយករបស់របរមានតម្លៃគ្មានសល់។

ម្ចាស់ឈ្មោះទី១. មានឈ្មោះ តាំង យក់អ៊ី ភេទស្រី អាយុ៧៥ឆ្នាំ ទ្រព្យសម្បត្តិដែលបាត់បង់រួមមាន ខ្សែដៃប្លាទីន ១ ខ្សែ តម្លៃ ៧០០ ដុល្លារ ប្រាក់ថៃចំនួន ៣ ០០០ បាត ប្រាក់រៀល ចំនួន ៧៥ម៉ឺនរៀល និង ប្រាក់អូស្ត្រាលី ចំនួន ១០០ ដុល្លារ ដោយឡែកម្ចាស់ផ្ទះទី២ ដែលមានឈ្មោះ គឹម កែវមុន្នី ភេទស្រី អាយុ៥៥ឆ្នាំ គឺអស់តែបន្តោងប្លាទីន រូបឃ្លោក តែ១ ប៉ុណ្ណោះ គឺសកម្មភាពរបស់ក្រុមចោរនេះ ធ្វើឡើង ខណៈដែលម្ចាស់ផ្ទះមិននៅទាំងពីរនាក់។

បើតាមការពិនិត្យពីសំណាក់សមត្ថកិច្ចជំនាញគឺ ជនសង្ស័យអាចប្រើប្រាស់វត្ថុរឹង ដើម្បីគាស់គន្លឹះទ្វារ និងដែកទ្វារ ក្នុងការធ្វើសកម្មភាពចូលប្រមូលទ្រព្យសម្បត្តិទាំងអស់នេះ។

បច្ចុប្បន្នសមត្ថកិច្ចកំពុងតែចុះសិក្សា និងស្រាវជ្រាវរកមុខសញ្ញាក្នុងការនាំខ្លួនយកមកផ្តន្ទាទោសតាមផ្លូវច្បាប់៕