ភ្នំពេញ ៖ តាមប្រភពព័ត៌មាន បានឲ្យដឹងថា កាលពីអំឡុងម៉ោង២និង៣០នាទីទៀបភ្លឺឈានចូលថ្ងៃទី១៧ ខែមិថុនានេះ មានចោរមួយក្រុម បានលួចយករថយន្តមួយគ្រឿងម៉ាកបាឡែនស៊េរីឆ្នាំ២០០១ ពណ៌ស ពាក់ស្លាកលេខភ្នំពេញ2N-4586។
តាមប្រភពបានឲ្យដឹងទៀតថា រថយន្តខាងលើនេះ គឺម្ចាស់បានចតនៅមុខផ្ទះក្នុងភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលមានម្ចាស់ឈ្មោះ ហ៊ុយ វណ្ឌី។
ទាក់ទិនទៅនឹងករណីក្រុមចោរលួចយករថយន្តខាងលើនេះ សមត្ថកិច្ចមូលដ្ឋានពុំទាន់បញ្ជាក់ប្រាប់អ្នកយកព័ត៌មានឡើយ ព្រោះម្ចាស់រថយន្តលោកបានបង្ហោះព័ត៌មាន ស្តីពីការបាត់តាមប្រព័ន្ធគ្រុបវាត់អាប់។ ទោះជាយ៉ាងណាគឺក្នុងអំឡុងពេលប៉ុន្មានថ្ងៃនេះមានក្រុមចោរបានធ្វើសកម្មភាពលួចយករថយន្តអស់២គ្រឿង ដែលមួយគ្រឿងទៀតម៉ាកលុចស៊ីស RX ៣០០ ពាក់ស្លាកលេខភ្នំពេញ2AL-0768 ដែលជាកម្មសិទ្ធិរបស់លោក កែ សេរីវឌ្ឍនា ជាមន្ត្រីនគរបាលក្រសួងមហាផ្ទៃ ហើយរថយន្តដែលបានបាត់ទៅ គឺខណៈដែលជនរងគ្រោះចតក្នុងផ្ទះស្ថិតក្នុងភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ នៅក្នុងអំឡុងយប់ថ្ងៃទី១៦ខែមិថុនានេះ៕
Source: Kampuchea Thmey Daily
0 Comments