កណ្តាល ៖ លោកមាស បញ្ញា នាយប៉ុស្តិ៍បានឲ្យដឹងថា កម្លាំងប៉ុស្តិ៍ឃាត់ខ្លួនជនសង្ស័យម្នាក់ពីជួញដូរដោយខុសច្បាប់នូវសារធាតុញៀនម៉ាទឹកកក។
ប្រតិបត្តិការបង្ក្រាបធ្វើ ឡើងនៅត្រូវថ្ងៃទី ១៧ ខែ មិថុនា ឆ្នាំ២០១៨ វេលាម៉ោង ១១និង១០នាទីនៅដីចំការស្វាយ (មិនស្គាល់ម្ចាស់) ស្ថិតនៅភូមិចិនកោះ ឃុំគគីរស្រុកកៀនស្វាយ ខេត្តកណ្ដាល។
ជនសង្ស័យមានចំនួនម្នាក់ឈ្មោះ អ៊ុំ ផូ (ចយ) ភេទប្រុស អាយុ៣៨ឆ្នាំ(ខ្មែរ) មានមុខរបរ កសិករ មានទីលំនៅ ភូមិចិនកោះ ឃុំគគីរ ស្រុក កៀនស្វាយ ខេត្ត កណ្ដាល។ វត្ថុតាងចាប់យករួមមាន ម្សៅក្រាមពណ៌សថ្លា សង្ស័យ ជាសារធាតុញៀន(ម៉ាទឹកកក )ចំនួន ០៣ កញ្ចប់តូច និងសម្ភារៈវេចខ្ចប់ថ្នាំញៀនមួយចំនួនទូរស័ព្ទ ចុចពិល ពណ៌ខៀវ ចំនួន ០២ គ្រឿង បំពង់ជ័របិទស្កត់ ពណ៌ខ្មៅ សម្រាប់ដាក់ថ្នាំញៀនចំនួន ០១។
លោក មាស បញ្ញាបានបន្តថា នៅថ្ងៃខែឆ្នាំវេលាម៉ោងខាងលើ សមត្ថកិច្ចប៉ុស្តិ៍នគរបាលរដ្ឋបាលគគីរ បានចេញល្បាតនៅក្នុងភូមិសាស្ត្រ ឃុំគគីរ ពេលល្បាតមកដល់ចំណុចកើតហេតុ បានឃើញជនសង្ស័យឈរនៅក្បែររោងក្នុងដីចំការស្វាយ ដោយមានការសង្ស័យបានឃាត់សួរនាំរួចធ្វើការឆែកឆេរខ្លួនជនសង្ស័យរកឃើញនូវសារធាតុញៀនចំនួន (៣កញ្ចប់ តូច) បន្ទាប់មកបានឃាត់ខ្លួនជនសង្ស័យយកមកប៉ុស្ដិ៍ដើម្បីសួរនាំបន្ត។
ជនសង្ស័យបានសារភាពថា សារធាតុញៀនចំនួន០៣កញ្ចប់តូច នេះជារបស់ខ្លួន បានទិញពីជនសង្ស័យ (មិនស្គាល់ត្រកូល) ភេទប្រុស អាយុប្រហែល៣៤ ឆ្នាំ (ខ្មែរ) មុខរបរ មិនពិតប្រាកដ មានទីលំនៅភូមិជ្រោយតាប៉ា ឃុំគគីរ ស្រុកកៀនស្វាយ ខេត្តកណ្តាល។
ក្រោយសួរនាំរួចហើយ បានបញ្ជូនជនសង្ស័យ រួមទាំងវត្ថុតាងបញ្ជូនខ្លួន មកអធិការដ្ឋាននគរបាលស្រុកកៀន ស្វាយដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments