ភ្នំពេញ ៖ ជនសង្ស័យ៦នាក់ ដែលជាកូនជាងទងភាគច្រើនមកពីស្រុកកំណើតជាមួយគ្នា ត្រូវបានសមត្ថកិច្ចចាប់ឃាត់ខ្លួនយកទៅសាកសួរ បន្ទាប់ពីត្រូវមេជាងទងរបស់ខ្លួនចោទប្រកាន់ថា បានឃុបឃិតគ្នាចាក់សោបង្ខាំងរូបគាត់ក្នុងបន្ទប់ រួចចូលទៅលួចយកប្លាទីនអស់២តម្លឹងកាលពីវេលាម៉ោង៩និង៣០នាទីយប់ ថ្ងៃទី២០ ខែមិថុនា ឆ្នាំ២០១៨ នៅបន្ទប់ជួលកន្លែងធ្វើប្លាទីន ស្ថិតនៅភូមិថ្មគោល សង្កាត់ចោមចៅ២ ខណ្ឌពោធិ៍សែនជ័យ។
ជនរងគ្រោះឈ្មោះម៉ៅ វណ្ណៈ ភេទប្រុស អាយុ២២ឆ្នាំ មុខរបរមេជាងទង ស្នាក់នៅបន្ទប់ជួលនៅភូមិកើតហេតុ និងមានស្រុកកំណើតនៅភូមិតាយា ឃុំធ្លក ស្រុកស្វាយជ្រំ ខេត្តស្វាយរៀង។ ដោយឡែកជនសង្ស័យជាប់ពាក់ព័ន្ធក្នុងករណីនេះ ទី១ឈ្មោះ អិច មករា ភេទប្រុស អាយុ២០ឆ្នាំ មុខរបរកូនជាងទង ស្នាក់នៅបន្ទប់ជួលជិតកន្លែងកើតហេតុ មានស្រុកកំណើតនៅភូមិតាយា ឃុំធ្លកស្រុកស្វាយជ្រំខេត្តស្វាយរៀង ទី២ឈ្មោះយឹម ផល្លី ភេទប្រុស អាយុ២៤ឆ្នាំ កូនជាងទងស្នាក់នៅជាមួយគ្នាផ្ទះជួលខាងលើ មានស្រុកកំណើតនៅភូមិជ្រកស្គរ ឃុំស្វាយចេក ស្រុករំដួលខេត្តស្វាយរៀង ទី៣ ឈ្មោះណេត សុវណ្ណ ភេទប្រុស អាយុ២២ឆ្នាំ មុខរបរកូនជាងទងស្នាក់នៅបុរីសន្តិភាព២ សង្កាត់ចោមចៅ២ ខណ្ឌពោធិ៍សែនជ័យមាន ស្រុកកំណើតនៅភូមិសំដី ឃុំធ្លក ស្រុកស្វាយជ្រំ ខេត្តស្វាយរៀង ទី៤ឈ្មោះសេក រតនៈ ភេទប្រុស អាយុ១៩ឆ្នាំ មុខរបរជាងជួសជុលម៉ាស៊ីន ដេរស្នាក់នៅសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិធ្លក ឃុំធ្លក ស្រុកស្វាយជ្រំ ខេត្តស្វាយរៀង ទី៥ឈ្មោះសង វិចិត្រ ភេទប្រុស អាយុ២១ឆ្នាំ មុខរបរកូនជាងទងស្នាក់នៅក្រុងតាខ្មៅ ខេត្តកណ្ដាល និងទី៦ឈ្មោះអៀង ស៊ីណាត ភេទប្រុស អាយុ២៨ឆ្នាំ មុខរបរកូនជាងទង ស្នាក់នៅផ្សារដើមមៀន ក្រុងតាខ្មៅ ខេត្តកណ្ដាល មានស្រុកកំណើតនៅស្រុកមេសាងខេត្តព្រៃវែង។
តាមប្រភពព័ត៌មានពីជនរងគ្រោះជាមេជាងទងបានឲ្យដឹងថា រូបគាត់ត្រូវបានក្រុមជនសង្ស័យជាកូនជាងរបស់ខ្លួនឃុបឃិតគ្នាវាក់សោបង្ខាំង នៅក្នុងបន្ទប់ ហើយចម្លងសោចាក់យកប្លាទីនអស់ចំនួន២តម្លឹងនៅក្នុងបន្ទប់ធ្វើប្លាទីន។ នៅមុនពេលកើតហេតុរូបគាត់ទុកប្លាទីននៅក្នុងបន្ទប់ ហើយក្រុមជនសង្ស័យបានចាក់សោបង្ខាំងគាត់នៅក្នុងបន្ទប់ បន្ទាប់មកពួកគេឃុបឃិតគ្នាចាក់សោ ដែលចម្លងរួចជាស្រេចចូលលួចយកប្លាទីននៅក្នុងបន្ទប់ ទម្រាំតែគាត់ហៅឲ្យគេជួយទាន់ ក្រុមកូនជាងបានចាកចេញពីកន្លែងកើតហេតុបាត់អស់។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ចោមចៅ២ បាននាំជនសង្ស័យខាងលើយកទៅសាកសួរ តែជនសង្ស័យខាងលើបានបដិសេធថា ពួកគាត់មិនបានប្រព្រឹត្តនោះឡើយ តែទោះជាយ៉ាងណាសមត្ថកិច្ចកំពុងសាកសួរបន្តទៀត និងកសាងឯកសារបញ្ជូនឲ្យជំនាញចាត់ការតាមនីតិវិធី៕
Source: Kampuchea Thmey Daily
0 Comments