សហព័ន្ធកីឡាអុកចត្រង្គកម្ពុជា បានរៀបចំការប្រកួតជើងឯកជាតិឆ្នាំ២០១៨ រយៈពេល២ថ្ងៃគឺថ្ងៃទី២០ដល់២១មិថុនា ដើម្បីចម្រាញ់រកអ្នកខ្លាំង ដើម្បីបញ្ចូលជាក្រុមជម្រើសជាតិ។ ការប្រកួត បានរៀបចំធ្វើនៅទីស្នាក់ការគណៈកម្មាធិការជាតិអូឡាំពិកកម្ពុជា។
លោកឧត្តមសេនីយ៍ឯក តែម ម៉ឺន អគ្គលេខាធិការរងគណៈកម្មាធិការជាតិអូឡាំពិកកម្ពុជាបានអញ្ជើញចូលរួមក្នុងពិធីប្រកាសបើកការប្រកួត។ ជាមួយគ្នានេះ លោកឧត្តមសេនីយ៍បានសំណូមពរឲ្យអាជ្ញាកណ្ដាល ចៅក្រម និងកីឡាករត្រូវប្រកាន់គោលការណ៍Fair- Play ជាធំ។
លោកឈាវ បូរ៉ា អគ្គលេខាធិការសហព័ន្ធកីឡាអុកចត្រង្គកម្ពុជា ដែលធ្លាប់គ្រងតំណែងជាស្ដេចអុក២រជ្ជកាលជាប់ៗគ្នានាឆ្នាំ២០១៤ និង២០១៥នោះ ក៏បានចូលរួមប្រកួតដែរ។
លោកអគ្គលេខាធិការបានឲ្យដឹងថា មានអ្នកខ្លាំងៗទាំងស្ដេចអុក អតីតស្ដេចអុកជើងឯករងចំនួន៤៨នាក់មកចូលរួមក្នុងការប្រកួតប្រចាំឆ្នាំដ៏ធំនេះ។
លោកគ្រួច ចន្ថារិទ្ធដែលជាគ្រូបង្វឹកអុកចត្រង្គជម្រើសជាតិ និង ជាអ្នកគ្រប់គ្រងការប្រកួតនេះបានប្រាប់ឲ្យដឹងថា ការប្រកួតចែកចេញជា ៨ ពូលដោយមួយពូលៗមានកីឡាករ៦រូប។ នៅក្នុងពូលកីឡាករមួយរូបៗត្រូវលេង៥ប្រកួត(៥ក្ដារ )ដែលមួយក្ដារៗមានរយៈពេលអតិបរមាមួយម៉ោង។
សម្រាប់អ្នកប្រកួតឈ្នះបានមួយពិន្ទុ ស្មើបានកន្លះពិន្ទុ និង ចាញ់បានសូន្យពិន្ទុ។ ការប្រកួតនេះបន្ទាប់ពីកីឡាករមួយរូបក្នុងពូលនីមួយៗលេងបាន៥ក្ដារហើយនោះគណៈកម្មការនឹងធ្វើការបូកពិន្ទុ ។កីឡាករ២រូបនៃពូលនីមួយៗដែលមានពិន្ទុលើគេនោះ នឹងក្លាយជាកីឡាករជម្រើសជាតិ។
លោកគ្រួច ចន្ថារិទ្ធបន្តថា សហព័ន្ធមានគម្រោងស្នើទៅក្រសួងអប់រំយុវជន និង កីឡាសុំប្រមូលផ្ដុំកីឡាអុកចត្រង្គជម្រើសជាតិចំនួន១៦រូបនាឆ្នាំ២០១៩ ហេតុនេះកីឡាករ២រូបនៃក្បាលពូលនីមួយៗនឹងក្លាយជាកីឡាករជម្រើសជាតិ។
គួរបញ្ជាក់ថាស្ដេចអុកទាំងជើងចាស់ជើងថ្មីដែលចូលរួមនោះមានឈាវ បូរ៉ាស្ដេចអុកឆ្នាំ២០១៤ និង ២០១៥។ ហូយ សូណាស្ដេចអុកឆ្នាំ២០១៦ ហេង សៅឌីស្ដេចអុកឆ្នាំ២០១៧ និង សុខ លឹមហេងស្ដេចអុកឆ្នាំ២០១៨។ ក្រៅពីនោះមានការចូលរួមពីសំណាកជើងខ្លាំងជាច្រើនទៀតដូចជាឆយ វីរ៉ាស្ដេចអុកឆ្នាំ២០១០ ព្រមទាំងបណ្ដាជើងឯករងនានាដូចជារស់ រិទ្ធីយ៉ា ម៉េង សេរីសម្បត្តិ ប៊ូ ជុនម៉ានីកា ប៉ោ សារិទ្ធ និង ម៉ាត់ សេនជាដើម៕
Source: Kampuchea Thmey Daily
0 Comments