ប្រជាពលរដ្ឋ រស់នៅបុរីផ្ទះល្វែងចំការល្មុត និងចំការស្វាយក្នុងភូមិតាង៉ូវជាង៤០០គ្រួសារ ទទួលបានប័ណ្ណកម្មសិទ្ធិពីអភិបាលរាជធានី

ភ្នំពេញ ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង បានអញ្ជើញចុះមកសំណេះសំណាល និងប្រគល់ប័ណ្ណកម្មសិទ្ធិជូនប្រជាពលរដ្ឋចំនួន៤០៧គ្រួសារ ដែលកំពុងរស់នៅបុរីផ្ទះល្វែងចំការល្មុតនិងចំការស្វាយភូមិ តាង៉ូវ ក្រោយពីពួកគាត់រស់នៅមិនមានប័ណ្ណកម្មសិទ្ធិស្របច្បាប់តាំងពីឆ្នាំ២០១២មក។

ពិធីនេះធ្វើឡើងកាលពីព្រឹកថ្ងៃទី២៤ មិថុនានេះ នៅក្នុងភូមិតាង៉ូវ សង្កាត់និរោធ ខណ្ឌច្បារអំពៅ ដោយមានការចូលរួមពីអភិបាលរងរាជធានី មន្ទីរពាក់ព័ន្ធ និងលោកចេង មុន្នីរ៉ា អភិបាលខណ្ឌច្បារអំពៅ រួមនិងប្រជាពលរដ្ឋចូលរួមជាច្រើនរយនាក់ផងដែរ។

លោកសារិន វណ្ណា ប្រធានមន្ទីររៀបចំដែនដីសំណង់និងសុរិយោដីរាជធានីភ្នំពេញ ក្នុងឱកាសនោះ បានលើកឡើងថា ប្រជាពលរដ្ឋដែលត្រូវបានទទួលប័ណ្ណកម្មសិទ្ធិនាពេលនេះមានចំនួន៤០៧គ្រួសារឬ ខ្នងផ្ទះ ដែលពួកគាត់បាននឹងកំពុងរស់នៅក្នុងបុរីផ្ទះល្វែងចំការល្មុតនិងចំការស្វាយ ស្ថិតក្នុងភូមិតាង៉ូវ សង្កាត់និរោធ ខណ្ឌច្បារអំពៅ។

លោកបន្តថា អ្វីដែលប្រជាពលរដ្ឋត្រូវធ្វើជាជំហានតំបូងនោះ គឺត្រូវបង់ត្រឹមតែ៨ម៉ឺនរៀលប៉ុណ្ណោះ ទទួលបានប័ណ្ណ ពេលបងប្អូនបានប័ណ្ណនេះហើយ បងប្អូនអាចយកប័ណ្ណនេះទៅផ្ទេរកម្មសិទ្ធិតែម្តង ហើយតម្លៃនៃការផ្ទេរឬបងប័ណ្ណអចលនទ្រព្យចំនួននេះត្រឹមតែ៦០ម៉ឺនរៀល តែកុំអោយគេរត់ការអោយ។

លោកឃួង ស្រេង ក្នុងឱកាសនោះ បានមានប្រសាសន៍លើកឡើងពីរបបប៉ុលពត ដែលធ្វើអោយប្រទេសជាតិធ្លាក់ដល់ចំណុចសូន្យ ហើយក្រោយថ្ងៃរំដោះឆ្នាំ១៩៧៩ ត្រូវបានគេហ៊ុមព័ទ្ធសេដ្ឋកិច្ចជាតិថែមទៀត ដែលធ្វើអោយប្រទេសយើងជួបការលំបាកយ៉ាងខ្លាំង។ ប៉ុន្តែក្រោមការដឹកនាំរបស់សម្តេចតេជោហ៊ុន សែនធ្វើអោយប្រទេសដ៏សែនខ្ទេចខ្ទាំមួយនេះ បានរួចចាកផុតពីសង្គ្រាម ធ្វើអោយប្រជាពលរដ្ឋរស់នៅបានសុខស្រួលជាមួយក្រុមគ្រួសារ មានការងារ និងមានមុខរបបរធ្វើទៅតាមសមត្ថភាព និងចំណង់ចំណូលចិត្តរៀងៗខ្លួន ជាមួយនឹងការមានជីវភាពរស់នៅធូរធារសមរម្យ។ ក្រោមម្លប់សន្តិភាព ក៏បានផ្តល់ឱកាសគ្រប់យ៉ាងដល់ពលរដ្ឋក្នុងការកសាងសង្គមគ្រួសារ, សហគមន៍ និងប្រទេសជាតិឲ្យកាន់តែរីកចម្រើនក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន។ ដូច្នេះលោកអភិបាលសូមអោយបងប្អូនប្រជាពលរដ្ឋទាំងអស់ចូលរួមថែរក្សា ការពារសន្តិភាព និងសណ្តាប់ធ្នាប់សង្គមឲ្យបានគង់វង្ស ដោយយើងឆ្អែតឆ្អន់ហើយសង្គ្រាម។

លោកឃួង ស្រេង បានបន្តទៀតថា ទោះបីប្រទេសជាតិមានសន្តិភាព១០០ភាគរយ ប្រជាពលរដ្ឋរស់នៅដោយមានក្តីសុខកាយសប្បាយចិត្តហើយក្តី ប៉ុន្តែសម្តេចនៅតែ គិតគូរដល់ប្រជាពលរដ្ឋដដែល ពោលគឺសម្តេចតេជោ នូវបានណែនាំអោយមន្ត្រីថ្នាក់ជាតិ ថ្នាក់ក្រោមជាតិចុះមូលដ្ឋាន មើលសុខទុក្ខប្រជាពលរដ្ឋ មានន័យថា មន្ត្រីទាំងអស់គ្មានថ្ងៃសៅរ៍ ថ្ងៃអាទិត្យ ថ្ងៃឈប់សម្រាកនោះទេ ក្នុងការបម្រើប្រជាពលរដ្ឋ។

លោកបន្តថា ជាក់ស្តែងសម្រាប់ថ្ងៃនេះជាថ្ងៃអាទិត្យ ប៉ុន្តែមន្ត្រី រាជការយើងនៅតែបំពេញការងារ ដើម្បីបម្រើផលប្រយោជន៍ប្រជាពលរដ្ឋ។ លោកថា ការប្រគល់ប័ណ្ណកម្មសិទ្ធិផ្ទះសម្បែងនៅថ្ងៃនេះ ពិតជាមានសារៈសំខាន់ណាស់សម្រាប់ប្រជាពលរដ្ឋ ដែលធ្វើអោយស្ថានភាពគ្រួសារកាន់តែប្រសើរឡើង ពោលគឺអាចយកប័ណ្ណកម្មសិទ្ធិនេះ ទៅដាក់នៅធនាគារយកថវិកាមកប្រើប្រាស់រកស៊ី បង្កើន មុខរបរបានប្រសើរឡើងមួយកម្រិតថែមទៀត៕