ហ្វីលីពីន ​គ្រោង​អនុវត្តន៍​សង្គ្រាម​គ្រឿងញៀន​នៅតាម​សាលារៀន​ជាមួយ​ការឆែកឆេរ​និង​ធ្វើតេស្ត

ក្រុមមន្ត្រី​បាន​និយាយ​កាលពី​ថ្ងៃ​សុក្រ​ថា ប្រទេស​ហ្វីលីពីន​មាន​ផែនការ​នាំយក​សង្គ្រាម​លើ​ថ្នាំញៀន​ដ៏​សាហាវ​របស់​លោក​ប្រធានាធិបតី​ Rodrigo Duterte ទៅ​សាលារៀន​ជាមួយ​ការ​ពិនិត្យមើល​កាបូប​និង​បន្ទប់​ដាក់​ខោអាវ​ព្រមទាំង​ធ្វើតេស្ត​គ្រូបង្រៀន​ផង​ដែរ ​ដើម្បី​ទប់ស្កាត់​តម្រូវការ​សារធាតុ​ញៀន​ខុសច្បាប់​។​
​
មេដឹកនាំ​និយាយ​មិន​សំចៃមាត់​រូបនេះ​បានចាប់ផ្តើម​យុទ្ធនាការ​ប្រឆាំង​គ្រឿងញៀន​មួយ​បន្ទាប់ពី​ឡើងកាន់តំណែង​នៅ​ខែមិថុនា​ឆ្នាំ​២០១៦​។ នៅក្នុង​សង្គ្រាម​នេះ ប៉ូលិស​បានសម្លាប់​អ្នកជួញដូរ​គ្រឿងញៀន​និង​អ្នកប្រើប្រាស់​ជាង​៤,២០០​នាក់​។​
​
ទីភ្នាក់ងារ​អនុវត្ត​ច្បាប់​មាន​ផែនការ​បង្កើន​យុទ្ធនាការ​ថ្នាំញៀន​នេះ​តាមរយៈ​ការធ្វើ​តេស្ត​គ្រឿងញៀន​ចៃដន្យ​នៅតាម​សាលា​បឋម លើ​គ្រូបង្រៀន​ក៏ដូចជា​លើ​សិស្ស​ថ្នាក់​ទី​បួន​ដែលមាន​អាយុ ១០​ឆ្នាំ​ផងដែរ​ដែល​ក្រសួង​អប់រំ​បាន​ប្រឆាំង​យ៉ាង​ដាច់អហង្ការ​។​
​
លោក Catalino Cuy ប្រធាន​ក្រុមប្រឹក្សាភិបាល​គ្រឿងញៀន​គ្រោះថ្នាក់ (DDB) បាន​ថ្លែងថា ការិយាល័យ​របស់គាត់​នឹងសិក្សា​អំពី​សំណើ​ដើម្បី​ពង្រឹង​យុទ្ធនា​ការបង្ការ​គ្រឿងញៀន​នៅតាម​សាលារៀន​និង​ដាក់ចេញ​គោលនយោបាយ​មួយ​ដើម្បី​ធានា​ការអនុវត្ត​ត្រឹមត្រូវ​ប្រសិនបើ​ចាំបាច់​។​
​
លោក Cuy បាន​និយាយ​ក្នុង​សេចក្តីថ្លែងការណ៍​មួយ​ថា “​កម្មវិធី​ទប់ស្កាត់​គ្រឿងញៀន​នៅតាម​សាលារៀន​គឺមាន​រួចស្រេច​ទៅហើយ​។ ទាំងនេះ​បានបង្ហាញ​ថា​មាន​ប្រសិទ្ធភាព​ក្នុងការ​រារាំង​ការប្រើ​គ្រឿងញៀន​និង​បង្កើត​សារៈសំខាន់​នៃ​ការដឹកនាំ​របៀប​រស់នៅ​ដែលមាន​សុខភាព​ល្អ​និង​គ្មាន​ថ្នាំញៀន​ក្នុងចំណោម​សិស្សសាលា​” ។​
​
មន្ត្រី​ទំនាក់ទំនង​សាធារណៈ​របស់ DDB ឈ្មោះ Ella Marie Dimaculangan បាន​និយាយថា ការពិគ្រោះ​យោបល់​ជាមួយ​សាលារៀន មាតាបិតា​និង​សមាជិក​ដទៃទៀត​នៃ​គណៈកម្មាធិការ DDB ដែល​ក៏​រួមមាន​ទាំង​ក្រសួង​អប់រំ​ផងដែរ​នោះ​គឺ​នឹងត្រូវ​ឡើង​ដើម្បី​ធានាថា សិទ្ធិ​របស់​សិស្ស​ត្រូវបាន​ការពារ​ហើយ​សុវត្ថិភាព​របស់​ពួកគេ​ត្រូវបាន​ធានា​។​
​
ទោះបីជា​យ៉ាងណាក៏ដោយ ក្រសួង​អប់រំ​បាន​និយាយថា ខ្លួន​សូម​ជំទាស់​ផែនការ​របស់​ភ្នាក់ងារ​អនុវត្ត​គ្រឿងញៀន​ដែល​តម្រូវ​ឲ្យ​សិស្ស​បឋមសិក្សា​ចំនួន​១៤​លាន​នាក់​មកពី​ថ្នាក់​ទី​៤​ដល់​ថ្នាក់​ទី​៦​ត្រូវធ្វើ​តេស្ត​រកសារ​ធាតុ​ញៀន​ដោយនិយាយ​ថា​វា​ផ្ទុយ​នឹង​ច្បាប់​៕ REUTERS

​

[caption id="attachment_934027" align="aligncenter" width="700"]  [/caption]

Source: Kampuchea Thmey Daily