ផលិតកម្ម២ ចេញមុខសុំទោសជាសាធារណៈ លើករណីផលិតកម្មវីដេអូខារ៉ាអូខេស្រើបស្រាល

ភ្នំពេញ ៖ ស្របពេល ដែលមានការរិះគន់ជាច្រើនរបស់មហាជន និងមានការស្នើឲ្យក្រសួងវប្បធម៌និងវិចិត្រសិល្បៈត្រូវមានវិធានការព្រមានដល់ការផលិតវីដេអូចម្រៀងខារ៉ាអូខេ(MV) ដែលមានលក្ខណៈសិចស៊ីស្រើបស្រាលជ្រុលហួសហេតុនោះ ក៏ស្រាប់តែមានផលិតកម្មចំនួន២បានចេញមុខសុំទោសមហាជនជាសាធារណៈ។

ចំពោះផលិតកម្មក្នុងស្រុកចំនួន២ដែលដឹងថា កន្លងមកខ្លួនធ្លាប់ចេញផ្សាយនូវបទចម្រៀងខារ៉ាអូខេដែលថតសម្តែងមានបញ្ចូលនូវឈុតឱបថើបស្រើបស្រាលនោះគឺមានផលិតកម្មសាស្តា(Sasda)និងផលិតកម្មភី(P) ។ ខណៈមានផលិតកម្មមួយចំនួនទៀតក៏ហាក់កំពុងភ័យខ្លួនលើករណីនៃការព្រមានរបស់ក្រសួងវប្បធម៌និងវិចិត្រសិល្បៈផងនោះ។

ផ្អែកតាមខ្លឹមសារនៃលិខិតសុំទោសរបស់ម្ចាស់ផលិតកម្ម សាស្តា(Sasda) បានលើកឡើងថា ខ្ញុំ អ៊ុក រតនា អ្នកគ្រប់គ្រងទូទៅផលិតកម្ម សាស្តា(Sasda) មានទីតាំងស្ថិតនៅផ្ទះលេខ៤០៣ ផ្លូវលេខ២៤BT-ភូមិសន្សំកុសល០៤សង្កាត់បឹងទំពន់ទី០១ ខណ្ឌមានជ័យ រាជធានីភ្នំពេញសូមសន្យាថា បញ្ឈប់ការថ តMVបែបសិចស៊ីស្រើបស្រាលដោយប៉ះពាល់ប្រពៃណីវប្បធម៌របស់ជាតិ។

ប្រភពដដែលនេះបានបន្តថា យើងខ្ញុំនឹងគោរពតាមអនុក្រឹត្យលេខ២៣៤អនក្រ.បកស្តីពីការគ្រប់គ្រងឧស្សាហកម្មភាពយន្តនៅកម្ពុជា។ ក្នុងករណីដែលផលិតកម្មនៅតែបន្តការផលិត ធ្វើឲ្យប៉ះពាល់ដល់សង្គម យើងខ្ញុំនឹងទទួលខុសត្រូវចំពោះមុខច្បាប់។

ដោយឡែកសម្រាប់ផលិតកម្មភីឯណោះវិញក៏បានប្រកាសសុំទោសជាសាធារណៈដែរថាខ្ញុំបាទជា ម្ចាស់ផលិតកម្ម ភី និងឆានែលផលិតកម្ម ភី ខ្ញុំបាទសូមផ្ញើសារទៅកាន់បងប្អូនប្រជាពលរដ្ឋខ្មែរទូទាំងប្រទេស ខ្ញុំបាទសូមទោស និងសូមអភ័យទោសចំពោះការផលិត វីឌីអូ បទចម្រៀងដែលមានភាពស៊ីចស៊ីទាំងនេះ។

ផលិតកម្មខាងលើបានបន្ថែមថា ខ្ញុំបាទសូមទោសរាល់កំហុសឆ្គងខ្ញុំបាទសូមសន្យាថានឹងបញ្ឈប់ក្នុងការផលិតបទចម្រៀង ដែលមានរូបភាពសិចស៊ី តទៅទៀតហើយ សូមអរគុណសម្រាប់ការគាំទ្រផលិតកម្ម ភី សូមផ្ញើសារនេះជូនទៅដល់លោក តាំង គីមសួ ផង សូមអរគុណ។

ជាការពិតណាស់បើតាមការកត់សម្គាល់អំឡុងពេលប៉ុន្មានឆ្នាំចុងក្រោយនេះគឺមានផលិតកម្មក្នុងស្រុកមួយចំនួនបានបង្វែរពីការផលិតវីដេអូ ដែលមានការសម្តែងលក្ខណៈអប់រំមកជាវីដេអូខារ៉ាអូខេ ដែលមានសកម្មភាពថតសម្តែងលក្ខណៈសិចស៊ីស្រើបស្រាលផ្ទុយពីគោលការណ៍នៃច្បាប់របស់ក្រសួងវប្បធម៌ និងវិចិត្រសិល្បៈ។ មិនតែប៉ុណ្ណោះក៏មានតួសម្តែងស្រី-ប្រុសរបស់ខ្មែរមួយចំនួនទៀត ហាក់ដូចជាគ្មានភាពញញើតសោះឡើយចំពោះការរិះគន់ឬចំណាត់ការរបស់ក្រសួងលើករណីថតស្រើបស្រាលបង្ហាញសាច់ខ្ចីជាដើម៕