ភ្នំពេញ ៖ បុរសរត់កង់បីម្នាក់ ត្រូវបានក្រុមចោរហៅឲ្យដឹកពួកគេថា នឹងទៅផ្ទះសង្សាររបស់ពួកគេដោយបញ្ជាឲ្យជិះតាមផ្លូវស្ងាត់ៗ ហើយដល់កន្លែងស្ងាត់បានធ្វើសកម្មភាពវាយប្លន់យកកាបូបលុយនិងទូរស័ព្ទហើយយកម៉ូតូកង់បីយកទៅប្លុងចោល នៅកន្លែងផ្សេងដោយសារតែមិនអាចយកទៅណាទៀតបានក៏រត់គេចខ្លួនបាត់អស់ កាលពីវេលាម៉ោង៦និង៣០នាទីព្រលប់ ថ្ងៃទី២៤ ខែមិថុនាឆ្នាំ២០១៨ នៅតាមបណ្តោយផ្លូវលំទល់មុខវត្តស្រះ ស្ថិតនៅសង្កាត់កំបូល ខណ្ឌពោធិ៍សែនជ័យ។
ជនរងគ្រោះឈ្មោះ សែម សេងហួរ ភេទប្រុស អាយុ៣៦ឆ្នាំ មុខរបររត់កង់បី ស្នាក់នៅសង្កាត់ស្វាយប៉ាក ខណ្ឌឫស្សីកែវមានស្រុកកំណើតនៅភូមិបុស្សខ្នុរ ឃុំបុស្សខ្នុរ ស្រុកចំការលើខេត្តកំពង់ចាម។
រ៉ឺម៉កកង់បីឥណ្ឌា ពណ៌ក្រហម ពាក់ស្លាកលេខភ្នំពេញ1HB-7410។ សម្ភារៈដែលចោលប្លន់ រួមមាន ទូរស័ព្ទ ម៉ាកសាំស៊ុង១គ្រឿង។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុរូបគាត់ត្រូវបានជនសង្ស័យដែលមានគ្នា៣នាក់ បានហៅគាត់ឲ្យឌុបទៅផ្ទះសង្សារគាត់នៅម្តុំវត្តឃ្មួញ ដោយដឹកពីម្តុំគីឡូលេខ៦ក្នុងតម្លៃ២៥០០០រៀល ហើយក្រុមជនសង្ស័យចេះតែបញ្ជាឲ្យអ្នករត់កង់បីទៅតាមផ្លូវនេះផ្លូវនោះ ទោះបីជនរងគ្រោះថា ទៅតាមនឹងមិនត្រូវក៏ដោយក៏ពួកគេថា ទៅតាមនឹងក៏បានដែរ លុះដល់កន្លែងស្ងាត់ពួកគេបានឲ្យជនរងគ្រោះឈប់ ហើយក្រុមជនសង្ស័យទាំង៣នាក់ បានធ្វើសកម្មភាពវាយជាច្រើនដៃចំកណ្តាលមុខបណ្តាលឲ្យបែកមុខបែកមាត់ឈាមហូរពេញមុខហើយយកកាំបិតភ្ជង់ឲ្យអង្គុយចុះក្រោមមិនឲ្យគាត់រើបម្រាស់ឡើយ។
ជនរងគ្រោះបានបន្តទៀតថា គឺក្រុមជនដៃដល់បានភ្ជង់សង្កត់កឲ្យគាត់អោនចុះក្រោមនៅក្នុងរ៉ឺម៉កកង់បីបិទជិតដោយជនសង្ស័យម្នាក់ជាអ្នកបើក ហើយ២នាក់ទៀត ជាអ្នកសង្កត់និងភ្ជង់ឲ្យជនរងគ្រោះអោនក្រាបនៅក្នុងរ៉ឺម៉ក ហើយដឹកចេញពីកន្លែងកើតហេតុជាច្រើនម៉ែត្រលុះមកដល់ម្ដុំជិតវត្តពោធិ៍វ័ន្ត ដោយឃើញមានភ្លើងភ្លឺៗ ជនរងគ្រោះបានបម្រើបម្រាស់ស្រែកឲ្យគេជួយ បន្ទាប់មកជនសង្ស័យបានធាក់ទម្លាក់ពីលើកង់បីបណ្ដាលឲ្យរងបួសយ៉ាងធ្ងន់ធ្ងរ ហើយជនសង្ស័យបានបើករ៉ឺម៉ករត់ភ្លាមៗ នោះគាត់បានឲ្យប្រជាពលរដ្ឋជួយដេញឃាត់ជនសង្ស័យ។ ពេលនោះដែរប្រជាពលរដ្ឋបានជួយតេប្តឹងសមត្ថកិច្ចឲ្យជួយអន្តរាគមន៍លុះជនសង្ស័យទាំង៣នាក់បើកមកជិតដល់ខ្លោងទ្វារស្រះ ដែលនៅឆ្ងាយពីវត្តបានប្លុងរ៉ឺម៉កកង់បីទុកចោលនៅទីនោះ ហើយនាំគ្នារត់គេចខ្លួនបាត់ សមត្ថកិច្ចខំដេញតាមរកដែរតែតាមមិនទាន់។
ក្រោយពេលកើតហេតុជនរងគ្រោះដោយសារតែវង្វេងកន្លែងកើតហេតុរកមិនឃើញហើយសមត្ថកិច្ចបាននាំជនរងគ្រោះរកទីតាំងខាងលើជាច្រើនម៉ោង ទើបរកឃើញហើយសមត្ថកិច្ចឲ្យជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកំបូល ដើម្បីឲ្យសមត្ថកិច្ចស្រាវជ្រាវរកជនសង្ស័យមកផ្ដន្ទាទោសតាមច្បាប់៕
Source: Kampuchea Thmey Daily
0 Comments