ភ្នំពេញ ៖ លោករស់ ពិសិដ្ឋ ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី ២៦មិថុនា ឆ្នាំ២០១៨ បានប្រកាសសាលក្រមសម្រេចកែប្រែបទចោទលើបុរសខ្មែរអ៊ីស្លាមម្នាក់ពីបទប៉ុនប៉ងឃាតកម្ម និងបទប្រឆាំងអ្នករាជការសាធារណៈ មកជាបទហិង្សាដោយចេតនាមានស្ថានទម្ងន់ទោសតាមមាត្រា២១៨នៃក្រមព្រហ្មទណ្ឌវិញ។
សាលក្រមកែប្រែបទចោទប្រកាន់នេះ ចៅក្រមបានសម្រេចផ្ដន្ទាទោសជនជាប់ចោទ២ឆ្នាំ តែទោសនេះអនុវត្តទណ្ឌកម្មក្នុងពន្ធនាគារត្រឹម១៨ខែ ទោសសល់ពីនេះត្រូវព្យួរ បើកផ្លូវប្ដឹងឧទ្ធរណ៍តាមកំណត់ច្បាប់។
ជនជាប់ចោទឈ្មោះ សា សារី ហៅសារី ភេទប្រុស អាយុ៤២ឆ្នាំ ជាជនជាតិខ្មែរអ៊ីស្លាម ស្នាក់នៅផ្ទះលេខ៤៣៧ ផ្លូវលំ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ។
ជនរងគ្រោះក្នុងករណីនេះឈ្មោះ ហ៊ុល ចន្ទរាសី ភេទប្រុស អាយុ២៩ឆ្នាំ មុខរបរជានគរបាល បម្រើការនៅ អធិការដ្ឋាននគរបាល ខណ្ឌឫស្សីកែវ និង មានទីលំនៅផ្ទះលេខ៣៤F ផ្លូវ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។
កាលពីយប់ថ្ងៃទី១៦ ខែកុម្ភៈ ឆ្នាំ២០១៨ ជនជាប់ចោទឈ្មោះ សា សារី ហៅសារី បានបើករថយន្តរបស់គាត់ ម៉ាក Lexus RX300 ពណ៌ស ពាក់ស្លាកលេខ 2AL-1530 បំបុកជនរងគ្រោះឈ្មោះ ហ៊ុល ចន្ទរាសី ខណៈពេលដែល ជនរងគ្រោះ កំពុងតែចុះអនុវត្តច្បាប់ ចរាចរណ៍ផ្លូវគោក នៅតាមបណ្តោយផ្លូវជាតិលេខ៥ នៅខាងមុខរោងចក្រញូកាញ់ ស្ថិតនៅ ក្រុម៤ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ បណ្តាលឲ្យជនរងគ្រោះរបួសធ្ងន់ និងត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗ ដើម្បីជួយ សង្គ្រោះអាយុជីវិត។
មុនពេលកើតហេតុ គឺមានកងនគរបាលខណ្ឌឫស្សីកែវមួយក្រុមបានដាក់ប៉ុស្តិ៍ត្រួតពិនិត្យការអនុវត្តច្បាប់ចរាចរណ៍ ពេលនោះឈ្មោះសា សារី បានបើករថយន្តលុចស៊ីសមកដល់ចំណុចប៉ុស្តិ៍ត្រួតពិនិត្យ ក៏ត្រូវកងនគរបាលឃាត់ឲ្យឈប់ ព្រោះគាត់ស្រវឹងស្រាយ៉ាងខ្លាំង ប៉ុន្តែសា សារី មិនឈប់រថយន្តទេ បែរជាបង្កើនល្បឿនរថយន្តបំបុកប៉ារ៉ាស់និងបុកមន្ត្រីនគរបាលឈ្មោះ ហ៊ុល ចន្ទរាសី បណ្ដាលឲ្យរងរបួសស្ទើរស្លាប់ ស្ទើររស់។
ក្រោយមកជនដៃដល់បានត្រូវចាប់ខ្លួន ហើយតុលាការបានចោទប្រកាន់ពីបទប៉ុនប៉ងមនុស្សឃាត និងបទប្រឆាំងអ្នករាជការអនុវត្តការងារសាធារណៈ ហើយក៏ត្រូវឃុំខ្លួន រហូតដល់មានការកាត់ទោស ស្រាប់តែលោកចៅក្រមរស់ ពិសិដ្ឋ បានកែប្រែបទចោទទាំងអស់មកជាបទហិង្សាវិញ ហើយសម្រេចសេចក្ដីព្យួរទោស ដើម្បីសម្រាលទោសឲ្យជនជាប់ចោទ៕
Source: Kampuchea Thmey Daily
0 Comments