បន្ទាប់ពីប្រកួតចម្រាញ់រយៈពេល២ថ្ងៃ(២០-២១មិថុនា)មកនោះ សហព័ន្ធកីឡាអុកចត្រង្គកម្ពុជា ជ្រើសរើស បានជើងខ្លាំងចំនួន១៦រូបសម្រាប់បញ្ចូលទៅក្រុមជម្រើសជាតិ សម្រាប់ធ្វើការប្រមូលផ្ដុំនាឆ្នាំ២០១៩ខាងមុខ។
សហព័ន្ធកីឡាអុកចត្រង្គកម្ពុជា បានរៀបចំការប្រកួតជើងឯកជាតិឆ្នាំ២០១៨រយៈពេល២ថ្ងៃគឺថ្ងៃទី២០ដល់២១មិថុនាដើម្បីចម្រាញ់រកអ្នកខ្លាំង បញ្ចូលជាក្រុមជម្រើសជាតិ។ ការប្រកួតនេះមានអ្នកខ្លាំងៗ ដោយមានទាំងជើងឯកអុក អតីតជើងឯករង និងអ្នកខ្លាំងៗមកពីគ្រប់ទិសទីចំនួន៤៨នាក់មកចូលរួម។
ការប្រកួតចែកចេញជា ៨ ពូលដោយមួយពូលៗមានកីឡាករ៦រូប។ នៅក្នុងពូលកីឡាករមួយរូបៗត្រូវលេង៥ប្រកួត(៥ក្ដារ )ដែលមួយក្ដារៗមានរយៈពេលអតិបរមាមួយម៉ោង។ សម្រាប់អ្នកប្រកួតឈ្នះបានមួយពិន្ទុ ស្មើបានកន្លះពិន្ទុ និង ចាញ់បានសូន្យពិន្ទុ។ ការប្រកួតនេះបន្ទាប់ពីកីឡាករមួយរូបក្នុងពូលនីមួយៗលេងបាន៥ក្ដារហើយនោះ គណៈកម្មការនឹងធ្វើការបូកពិន្ទុ។ កីឡាករ២រូបនៃពូលនីមួយៗដែលមានពិន្ទុលើគេនោះនឹងក្លាយជាកីឡាករជម្រើសជាតិ។
បន្ទាប់ពីការប្រកួតដ៏តឹងតែងរយៈពេល២ថ្ងៃមកនោះ ជើងខ្លាំង១៦រូបត្រូវបានរកឃើញដែលក្នុងនោះមាន១០រូបនៅរាជធានីភ្នំពេញ គឺឆយ វីរ៉ា ជើងឯក អុកឆ្នាំ២០១០ សុខ លឹមហេងជើងឯក អុកឆ្នាំ២០១៨ ប៊ូ ប៉ុណ្ណម៉ានីកា រស់ រិទ្ធិយ៉ារៀម វាសនា ឃី ចំរើន នូ ច័ន្ទផានិតម៉េង សេរីសម្បត្តិ ឈិន សំណាង និង ម៉ាត់ សេន។
សូមបញ្ជាក់ថា ជើងឯកអុក២ ជំនាន់ គឺឆ្នាំ២០១៤ និង ២០១៥ឈាវ បូរ៉ាមិនបានជាប់ក្នុងក្រុម១៦រូបនេះឡើយ។ ហេង សៅឌី ជើងឯកអុកឆ្នាំ២០១៧ និង ហូយ សូណាជើងឯកអុកឆ្នាំ២០១៦ក៏ធ្លាក់មិនបានជាប់ជាកីឡាករជម្រើសជាតិដែរ។
ក្នុងចំណោម១៦រូបនេះខេត្តកំពតមានមួយរូប គឺសុខ សំបូរ ខេត្តពោធិ៍សាត់មួយរូបគឺឡៅ លីម៉េន ខេត្តប៉ៃលិនមួយរូបគឺលឹម ផល្លា ខេត្តតាកែវ ២ រូបគឺឈ្មោះទេស សារ៉ាវី និង ស៊ីវ ស៊ីន និង ខេត្តព្រះសីហនុមួយរូបគឺឈ្មោះឃីម ឃីម។
លោកគ្រួច ចន្ថារិទ្ធដែលជាគ្រូបង្ហាត់អុកចត្រង្កជម្រើសជាតិបាននិយាយថា អ្នកខ្លាំងទាំង១៦រូបនេះឆ្នាំក្រោយសហព័ន្ធនឹងសុំទៅក្រសួងអប់រំយុវជន និង កីឡាដើម្បីប្រមូលផ្ដុំបំប៉ន ដើម្បីហ្វឹកហាត់។ ពេលនេះ សហព័ន្ធបានប្ដេជ្ញាហើយថា ឆ្នាំ២០២៣ពេលដែលកម្ពុជាធ្វើជាម្ចាស់ផ្ទះស៊ីហ្គេមលើកទី៣២នោះប្រភេទកីឡាអុកចត្រង្គនេះនឹងត្រូវបញ្ចូលទៅក្នុងកម្មវិធីប្រកួត៕
Source: Kampuchea Thmey Daily
0 Comments