សៀមរាប ៖ ទុស្សេខ្សែភ្លើងបណ្ដាលឲ្យឆាបឆេះផ្ទះពលរដ្ឋចំនួន០១ខ្នង ខូចខាតទ្រព្យសម្បត្តិប្រមាណជា៧០ភាគរយ ខណៈពេលដែលម្ចាស់ផ្ទះកំពុងដេកលង់លក់ក្នុងដំណេក តែករណីនេះពុំមានប៉ះពាល់ដល់អាយុជីវិតនរណាម្នាក់ទេ។
ហេតុការណ៍គ្រោះអគ្គិភ័យនេះ កើតឡើងនៅវេលាម៉ោង២២នាទីយប់ ថ្ងៃទី២០ ខែមិថុនា ឆ្នាំ២០១៨ ស្ថិតនៅចំណុចភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប។
សមត្ថកិច្ចបានឲ្យដឹងថា ករណីអគ្គិភ័យនេះ កើតឡើងនៅពេលដែលម្ចាស់ផ្ទះឈ្មោះ ផយ សុផល ភេទស្រី អាយុ៣៣ឆ្នាំ ជាមួយនឹងសមាជិក៣នាក់ទៀត កំពុងដេកលក់ ស្រាប់តែមានទុស្សេខ្សែភ្លើងយ៉ាងសន្ធោសន្ធៅ ទើបដឹងខ្លួន ហើយនាំគ្នារត់ចេញមកក្រៅទាន់ពេលវេលា។
សមត្ថកិច្ចបានឲ្យដឹងទៀតថា ផ្ទះដែលត្រូវអគ្គិភ័យឆាបឆេះនេះមានទំហំទទឹង៦ម៉ែត្របណ្តោយ១០ម៉ែត្រ សង់ផ្ទាល់ដី ជញ្ជាំងថ្មលាយឈើ ដំបូលប្រក់ស័ង្កសី។ ការឆាបឆេះនេះផងដែរ គឺខូចខាតប្រមាណ៧០ភាគរយ ហើយទ្រព្យសម្បត្តិ ដែលខូចខាតក្នុងនោះមានដូចជា ប្រាក់ដុល្លារចំនួន៦៤៥ដុល្លារ ប្រាក់រៀល៦០ម៉ឺនរៀល ប្រាក់បាត៦០០០បាត ម៉ាស៊ីនបោកខោអាវ១គ្រឿង គ្រែ៤ ពូក៤ សំលៀកបំពាក់ ចានឆ្នាំង កន្ទេលមុងភួយ ទូដាក់ខោអាវ សៀវភៅគ្រួសារ អត្តសញ្ញាណប័ណ្ណចំនួន២សន្លឹក។
ប្រតិបត្តិការពន្លត់អគ្គិភ័យនេះដែរ សមត្ថកិច្ច បានធ្វើការប្រើប្រាស់ឡានទឹកពន្លត់អស់ចំនួន៣គ្រឿងទើបធ្វើការពន្លត់បានទាំងស្រុងនៅម៉ោងប្រមាណជា២រំលងអធ្រាត្រឈានចូលថ្ងៃទី២១ ខែមិថុនា នេះ៕
Source: Kampuchea Thmey Daily
0 Comments