កម្ពុជា​នឹង​រៀបចំ​ស​ន្និ​សិទ្ធ​អន្តរជាតិ​ធំ​បំផុត​ស្តីពី​កសិកម្ម ចិញ្ចឹមសត្វ​និង​ជលផល​នៅ​កម្ពុជា​នៅ​កោះ​ពេជ្រ

ភ្នំពេញ​ ៖ ​កម្ពុជា​នឹង​រៀបចំ​សន្និសីទ​អន្តរជាតិ​ធំ​បំផុត​ស្តី​ពី​កសិកម្ម ចិញ្ចឹមសត្វ​និង​ជលផល​នៅ​កម្ពុជា ចាប់ពី​ថ្ងៃទី​៥​ដល់​ថ្ងៃទី​៧​ ខែកញ្ញា ​ឆ្នាំ​២០១៨ ​ខាងមុខនេះ​ នៅ​មជ្ឈមណ្ឌល​សន្និបាត និង តាំង​ពិ​ព័រ​ណ៍​កោះ​ពេជ្រ រាជ​ធានី​ភ្នំពេញ​។

លោក​គៀង បា​វិញ​(Nguyen Ba Vinh) អគ្គនាយក​ក្រុមហ៊ុន តាំង​ពិព័រណ៍ ផ្សាយពាណិជ្ជកម្ម Minh Vi Exhiobition & Advertising Co., Ltd (Veas)​បាន​មានប្រសាសន៍​នៅក្នុង​សន្និសីទ​កាសែត​ស្តីពី​ការរៀបចំ​ពិព័រណ៍​កសិកម្ម ចិញ្ចឹមសត្វ​និង​ជលផល​នៅ​កម្ពុជា​កាលពី​ថ្ងៃទី​២២ ខែមិថុនា ឆ្នាំ​២០១៨​នៅ​សណ្ឋាគារ​ភ្នំពេញ​ថា ​កម្មវិធី​តាំង​ពិព៍រណ៍​កសិកម្ម បសុសត្វ ជលផល​សមុទ្រ​នេះ នឹង​រៀបចំ​រយៈពេល​បី​ថ្ងៃ​គឺ​ចាប់ពី​ថ្ងៃទី​៥ ដល់​ថ្ងៃទី ៧ ខែកញ្ញា ឆ្នាំ​២០១៨ នៅ​មជ្ឈមណ្ឌល​សន្និបាត​កោះ​ពេជ្រ រាជធានី​ភ្នំពេញ​ ដោយមាន​អ្នកចូលរួម​ដាក់​តាំង​ពិព័រណ៍​ជាង​៦០​និង​ម៉ា​កជាង​១០០​ ដែល​នឹង​បង្ហាញ​ផលិតផល​របស់​ពួកគេ​អំពី​វិស័យ​កសិកម្ម សត្វ​ចិញ្ចឹ​ម និង វារីវប្បកម្ម​នៅក្នុង​ពិព័រណ៍​។



លោក​រំពឹង​ថា ​នឹង​មាន​ភ្ញៀវ​ប្រមាណ​៥០០០​នាក់ ​មកពី​អាស៊ីអាគ្នេយ៍ និង ជុំវិញ​ពិភពលោក​ចូលរួម​នៅក្នុង​ពិព័រណ៍​នេះ​ ព្រោះ​វា​គឺជា​វេទិកា​ដ៏​ល្អ​បំផុត​ដែល​ផ្តល់នូវ​ការ​តាំង​តាំង​ពិព័រណ៍​អន្តរជាតិ​ដ៏​គួរ​ឲ្យ​ទុកចិត្ត​សម្រាប់​តាំង​តាំង​ពិព័រណ៍​ក្នុងស្រុក និង​អន្តរជាតិ​ដើម្បី​បង្ហាញ​ម៉ាក​របស់​ពួកគេ​ទៅកាន់​ទីផ្សារ​កម្ពុ​ជា ខ​ណៈ​ដែល​ពួកគេ​អាច​ស្វែងរក​ដៃគូ​អាជីវក​ម្ម ដែល​មាន​សក្តានុពល​អ្ន​ក​នាំចូល និង អ្នក​ចែកចាយ​ក្នុងស្រុក និង​ក្រៅ​ស្រុក​រួម​ជាមួយនឹង​សកម្មភាព​ជាក់លាក់​នានា​ផងដែរ​។

ការរៀបចំ​តាំងពិព័រណ៍​លំដាប់​អន្តរជាតិ​នេះ​ ធ្វើឡើង​ស្រប​ពេល​ដែល​ប្រទេស​កម្ពុជា​បានទទួល​នូវ​ការ​ផ្លាស់ប្តូរ​សេដ្ឋកិច្ច​ដ៏​ទូលំទូលាយ ជាមួយនឹង​គោលនយោបាយ​សេដ្ឋ​កិច្ច​ប្រកបដោយ ប្រសិទ្ធភាព សមត្ថភាព នៃ​ផលិតកម្ម​នៅក្នុង​ប្រទេស​បាន​រីកចម្រើន​យ៉ាង​ខ្លាំង ​ខណៈ​ពេល​ដែល​តម្លៃ​ពលកម្ម ​នៅតែ​បន្ត​មាន​ការ​ប្រកួតប្រជែង​ ហើយ​វិស័យ​កសិកម្ម បសុសត្វ នឹង ជលផល​នៅតែ​ជា​វិស័យ​សេ​ដ្ឋ​កិច្ច​ដ៏​សំខាន់​។



គេ​នឹង​រំពឹង​ថា​ នឹង​បន្ត​រក្សា​កំណើន​សេ​ដ្ឋ​កិច្ច​ដ៏​គួរ​ឲ្យ​ចាប់​អារ​ម្ម​ណ៍​នេះ​ ក្នុង​រយៈពេល​៥​ឆ្នាំ​ខាងមុខ​ដោយ​សេ​ដ្ឋ​កិច្ច​កំពុង​រីកចម្រើន​កាន់តែ​មាន​ភាព​ទាក់ទាញ​ដល់​វិនិយោគិន​អន្តរជាតិ​។ លើសពី​នេះ​ទៀត ​ប្រទេស​កម្ពុ​ជា​មាន​គោលនយោបាយ​ថ្មីៗ ដើម្បី​លើកទឹកចិត្ត​នឹង​ពង្រឹង​ឱកាសហ​ប្រតិបត្តិការ​ផ្នែក​ពាណិជ្ជកម្ម​ដល់​អ្នក​ផលិត កសិកម្ម បសុសត្វ និង​ជលផល​មិន​ត្រឹមតែ​នៅ​កម្ពុជា​ប៉ុណ្ណោះ​ទេ​ ថែម​ទាំង​នៅ​ក្នុង​តំបន់​ដែល​មាន​គុណសម្បត្តិ​នៃ​វ​ប្បធ​ម៌​នឹង​តំបន់​ផង​ដែរ​។

ស​ន្និ​សីទ​អន្តរជាតិ​ធំ​បំផុត​ស្តីពី​កសិកម្ម ចិញ្ចឹមសត្វ​និង​ជលផល​នៅ​កម្ពុជា​រួមមាន​AGRI CAMBODIA 2018 ជា​ការ​តាំងពិព័រណ៍​និង​សន្និបាត​អន្តរជាតិ​លើក​ទី​៣​ស្តីអំពី​កសិកម្ម​សម្រាប់​កម្ពុជា​ដែល​បង្ហាញ​អំពី​ការ​លក់​គ្រឿង​ម៉ាស៊ីន​ឧ​បករ​ណ៍ និង ផលិតផល​ជាមួយនឹង​បច្ចេកវិទ្យា​ថ្មីៗ​បំផុត​ក្នុង​វិស័យ​កសិកម្ម​ដូចជា​គ្រាប់ពូជ គ្រាប់​ធញ្ញជាតិ​បន្លែ រុក្ខជាតិ​និង​សារធាតុ គីមី​ផលិតផល​កា​ពារ​រុក្ខជាតិ។



ជា​មួយ​គ្នា​នេះ​ដែរ ​LIVESTOCK CAMBODIA 2018 គឺជា​ពិព័រណ៍​និង​សន្និបាត​នឹង​បង្ហាញ​ពី​ការ​កែច្នៃ​សាច់សត្វ អន្តរជាតិ​លើក​ទី៣​សម្រាប់​ប្រទេស​កម្ពុជា ដែល​ការ​តាំង​ពិព័រណ៍​នេះ​គឺជា​ឱកាស​ដ៏​ល្អ​សម្រាប់​សហគ្រិន​ដើម្បី​ពង្រីក​ទីផ្សារ​អាជីវកម្ម​របស់​ខ្លួន​ធ្វើ​ឲ្យ​ទាន់សម័យ​នូវ​កា​ច្នៃប្រឌិត​ចុងក្រោយបង្អស់ ផ្សារភ្ជាប់​ជាមួយនឹង​អតិថិជន​សក្តានុពល ប្រកបដោយ​ប្រសិទ្ធភាព​និង​មាន​ទស្សន​អំពី​ទីផ្សារ​អាស៊ី​អាគ្នេយ៍ រួម​ជា​មួយ​និង​សកម្មភាព​ជាក់លាក់​នានា សិក្ខាសាលា​ដែល​គួរ​ឲ្យ​ទាក់ទាញ និង​ផ្តល់​ផល​ប្រ​យោ​ជ​ន៍​ជាមួយ​ប្រធានបទ​ពិសេស​ដែល​បង្ហាញ​ពី​អ្នកជំនាញ​នាំមុខ​ក្នុង​និង​ក្រៅប្រទេស​។

ចំណែក​AQUA FISHERIES គឺជា​សិក្ខាសាលា​ជាតិ​លើក​ទី​៣ សម្រាប់​ការចិញ្ចឹម​សត្វ​និង​ជលផល​កម្ពុជា គឺជា​ពិព័រណ៍​ពាណិជ្ជកម្ម អន្តរជាតិ​តែមួយគត់​សម្រាប់​វារីវប្បកម្ម និង ជលផល​នៅក្នុង​ប្រទេស​កម្ពុជា​នឹងត្រូវ​បានធ្វើ​ឡើងជា​មួយ​នឹង​បច្ចេកវិទ្យា ជីវសាស្ត្រ និង សម្ភារៈ​ផ្សេងៗ​ដែល​ទាក់​ទង់​ទៅនឹង​ឧស្សាហកម្ម​សមុទ្រ និង គ្រឿង​សមុទ្រ​។

លោក មៀ​ច យ៉ា​ឌី ប្រ​ធាន​ការិយាល័យ​ទីផ្សារ​កសិកម្ម​នាយក​ដ្ឋាន​ផែនការ និង ស្ថិតិ​ក្រសួងកសិកម្ម​រុក្ខាប្រមាញ់​និង​នេសាទ​នៃ​ប្រទេស​កម្ពុជា ដែល​បាន​ចូលរួម​នៅក្នុង​ស​ន្និសីទ​ស្តី​ពី​ពិព័រណ៍​ដែរ​នោះ បាន​មានប្រសាសន៍ថា​ ពិព័រណ៍​នេះ​ពិត​ជា​មាន​សារសំខាន់​ណាស់​សម្រាប់​ឲ្យ កសិករ​ទទួល​បាន​នូវ​ចំណេះដឹង​ពី​បច្ចេកទេស​ថ្មីៗ​នៃ​ការ​ដាំ​ដុះ ដែល​ទទួល​បាន​ទិន្នផល​ខ្ពស់​។

ចំណែកឯ​ពាណិជ្ជករ​ក៏​ទទួល​បាន​នូវ​ឱកាស​វិនិយោគ​ថ្មីៗ​ពី​បណ្តា​ក្រុមហ៊ុន​ដែល​បាន​ចូលរួម​តាំងពិព័រណ៍​ផងដែរ​៕

  

Source: Kampuchea Thmey Daily