លោកគ្រូ អ្នកគ្រូ គឺជាសេដ្ឋីចិត្តបុណ្យ នៃកេរ្តិ៍ឈ្មោះ ដែលមានទ្រព្យសម្បត្តិមហាសាល ចែករំលែកទៅដល់សិស្សឱ្យក្លាយជាមនុស្សមានចំណេះដឹង

ពោធិ៍សាត់ ៖ លោក ហ៊ុន ម៉ាណែត មានប្រសាសន៍បែបនេះ នៅក្នុងពិធីសំណេះសំណាល ជាមួយលោកគ្រូ អ្នកគ្រូនៅក្នុងខេត្តពោធិ៍សាត់ កាលពីថ្ងៃទី២៣ ខែមិថុនា ឆ្នាំ២០១៨។

លោក ហ៊ុន ម៉ាណែត លើកឡើងថា លោកគ្រូ អ្នកគ្រូ គឺជាឪពុកម្ដាយទី២ ដែលបានបណ្ដុះបណ្ដាលអប់រំមនុស្សម្នាក់ៗឲ្យក្លាយជាធនធានដ៏ល្អសម្រាប់គ្រួសារខ្លួនឯង និងសង្គមជាតិ ដែលនេះ គឺជាកិច្ចការសំខាន់មិនអាចកាត់ថ្លៃបានព្រោះថាប្រទេសជាតិមួយរឹងមាំ គឺដោយសារប្រជាពលរដ្ឋរឹងមាំ ប្រជាពលរដ្ឋខ្លាំងក្លា ប្រជាពលរដ្ឋមានសមត្ថភាព ចំណេះដឹង សីលធម៌និងគុណធម៌ ដែលទាំងអស់នេះបានធ្វើឲ្យប្រទេសយើងរីកចម្រើនតាំងពីយើងបញ្ចប់សង្គ្រាមមក។

តាមលោក ហ៊ុន ម៉ាណែត “លោកគ្រូ អ្នកគ្រូ គឺជាសេដ្ឋីចិត្តបុណ្យ នៃកេរ្តិ៍ឈ្មោះ ដែលមានទ្រព្យសម្បត្តិមហាសាល គឺចំណេះដឹង សីលធម៌ គុណធម៌ ដែលទ្រព្យសម្បត្តិដ៏មានតម្លៃ ចែករំលែកទៅដល់សិស្សរាប់រយ រាប់ពាន់នាក់ឱ្យក្លាយជាមនុស្សមានចំណេះដឹងសីលធម៌ គុណធម៌ ហើយបានកសាងអភិវឌ្ឍប្រទេស ធ្វើឱ្យមានការរីកចម្រើនដល់ប៉ុណ្ណេះ”។ ជាមួយគ្នានោះ សូមថ្លែងអំណរគុណលោកគ្រូ អ្នកគ្រូដែលបានលះបង់កម្លាំងកាយចិត្តខិតខំចិត្តយកទុកដាក់នៅក្នុងការកសាងមនុស្សនៅក្នុងការចែករំលែកចំណេះដឹង សីលធម៌គុណធម៌ កសាងអនាគតរបស់មនុស្សម្នាក់ៗឲ្យបានច្រើន។

លោក ហ៊ុន ម៉ាណែត លើកឡើងទៀតថា រាជរដ្ឋាភិបាលយកចិត្តទុកដាក់ណាស់ទៅលើការងារនេះជាអាទិភាពរបស់រាជរដ្ឋាភិបាល។ ជាក់ស្តែងការចំណាយរបស់រាជរដ្ឋាភិបាលខ្ពស់លើវិស័យអប់រំបើប្រៀបធៀប នឹងវិស័យផ្សេងៗ និងផ្តោតសំខាន់លើការយកចិត្តទុកដាក់លើជីវភាពរបស់លោកគ្រូ អ្នកគ្រូតាមរយៈការដំឡើងប្រាក់បៀវត្សលោកគ្រូ អ្នកគ្រូ ការបណ្តុះបណ្តាលសមត្ថភាព និងបង្កើនលទ្ធភាពលោកគ្រូ អ្នកគ្រូ ក្នុងការចែករំលែកចំណេះដឹងដល់សិស្សានុសិស្ស ការកសាងហេដ្ឋារចនាសម្ព័ន្ធក្នុងវិស័យអប់រំ។ នេះគឺជាការយកចិត្តទុកដាក់របស់រាជរដ្ឋាភិបាល និងជាមោទនភាពរបស់វិស័យអប់រំរបស់យើង។ លោកបន្តថា គោលនយោបាយនិងចក្ខុវិស័យរបស់មេដឹកនាំ គឺសំខាន់ណាស់ ដើម្បីដឹកនាំប្រទេសយើងរីកចម្រើនទៅមុខ។ ដូច្នេះសូមលោកគ្រូ អ្នកគ្រូបន្តជឿទុកចិត្តអ្នកកាន់ចង្កូតនាវាកម្ពុជា គឺគាំទ្រការដឹកនាំរបស់សម្ដេចតេជោ ហ៊ុន សែន ជាបន្តទៅទៀត និងយើងរួមគ្នាដើម្បីឲ្យនាវាកម្ពុជាឆ្ពោះទៅមុខតាមទិសដៅដែលល្អ និងដើម្បីធានានិរន្តរភាព ធានាការរីកចម្រើន ធានារួមគ្នាក្នុងការកែលម្អចំណុចអវិជ្ជមាននិងពង្រឹងទូកយើងឲ្យកាន់តែលឿនទៅមុខ។

លោក ហ៊ុន ម៉ាណែត អះអាងថា ក្នុងរយៈពេល ៥ឆ្នាំម្តង លោកគ្រូអ្នកគ្រូមានឱកាសប្រើសិទ្ធិរបស់ខ្លួននៅក្នុងការជ្រើសរើសអ្នកដឹកនាំដែលខ្លួនពេញចិត្ត។ ដូច្នេះសូមលោកគ្រូអ្នកគ្រូអញ្ជើញទៅបោះឆ្នោតឱ្យបានគ្រប់ៗគ្នានៅថ្ងៃទី២៩ ខែកក្កដា ដើម្បីគាំទ្រការដឹកនាំរបស់សម្តេចតេជោ ហ៊ុន សែន ជាបន្តទៀតព្រោះថាសិទ្ធិសេរីភាពរបស់លោកគ្រូអ្នកគ្រូ មិនមែនជាចំណាប់ខ្មាំងរបស់អ្នកនយោបាយណាមួយទេ។ រាជរដ្ឋាភិបាលបានបើកសិទ្ធិទូលំទូលាយសម្រាប់ប្រជាពលរដ្ឋសម្រាប់ការជ្រើសរើសមេដឹកនាំ ដោយមិនមានការបង្ខិតបង្ខំណាមួយឡើយ៕