អ្នកប្រដាល់ជើងខ្លាំង៤រូប នឹងឡើងប្រកួតដណ្តើមពានអនុស្សាវរីយ៍បាយ័ន សម្រាប់ប្រភេទទម្ងន់៥៧គីឡូក្រាម ឆ្នាំ២០១៨។ អ្នកប្រដាល់ទាំង៤រូបនោះ រួមមាន ឯម សុធី មកពីក្លិបថ្មគោលពោធិសែនជ័យ , អ៊ូច ភារិទ្ធ ក្លិបអាណាចក្រគុនខ្មែរ , កំពែង ខ្មៅសមាគមកីឡាប្រដាល់ក្រសួងកសិកម្ម និង នីម នន មកពីក្លិបកងពលតូចទ័ពឆ័ត្រយោង៩១១។
ពួកគេទាំង៤នាក់នេះ នឹងជួបប្រកួតគ្នានៅល្ងាចថ្ងៃសៅរិ៍ទី៣០ មិថុនា ២០១៨នេះ នៅលើសង្វៀនបាយ័នស្ទឹងមានជ័យ ។ ការប្រកួតប្រព្រឹត្តទៅតាមរូបមន្តជាMarathon គឺចាញ់ជ្រុះហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងខ្លាំងម្ចាស់ពានក្នុងពេលតែមួយ ។
ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយ៍ទូរទស្សន៍បាយ័ន។
អ្នកប្រដាល់ទាំង៤រូបនេះ បន្ទាប់ពីឆ្លងកាត់ការចាប់ឆ្នោតនោះ ឯម សុធី នឹងត្រូវជួបជាមួយកំពែង ខ្មៅ ហើយអ៊ូច ភារិទ្ធ ជួបជាមួយ នីម នន ។ រវាងអ្នកប្រដាល់ ឯម សុធី និង កំពែង ខ្មៅ នេះ ពួកគេធ្លាប់ប៉ះគ្នាម្តងហើយកាលពីពេលកន្លងមក ដែលក្នុងការជួបគ្នាពេលនោះ សុធី ឈ្នះ កំពែង ខ្មៅ ដោយពិន្ទុ។ ពីរនាក់នេះ ពិបាកទស្សន៍ទាយណាស់ថា អ្នកណាឈ្នះ អ្នកណាចាញ់នោះ សម្រាប់ការជួបគ្នាលើកនេះ ព្រោះថាកំពែង ខ្មៅ ថ្វីត្បិតតែធ្លាប់ចាញ់ឯម សុធី មួយលើកហើយក៏ដោយ ក៏មិនប្រាកដថាគេចាញ់ទៀតដែរ សម្រាប់ការជួបគ្នាលើកនេះ ។ សុធី បានខាងក្បាច់គុន តែកំពែងខ្មៅ គេបានខាងមានចិត្តប្រដាល់ធំ ស៊ូការប្រកួត ។និយាយរួម ឯម សុធី ពិបាកទប់ទល់ជាមួយកំពែង ខ្មៅ ហើយ ។
គួរបញ្ជាក់ថា ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ ។
ចំពោះអ៊ូច ភារិទ្ធ និង នីម នន វិញ ពួកគេទាំងពីរមិនធ្លាប់ជួបប្រកួតគ្នាទេ កន្លងមក ។ យ៉ាងណា រវាងពួកគេពីរនាក់នេះ អ៊ូច ភារិទ្ធ ទំនងជាមិនអាចឈ្នះនីម នន ក្នុងការប្រកួតជម្រុះលើកដំបូងនោះ។
ទោះជាយ៉ាងណា ក្នុងចំណោមពួកគេ៤នាក់នេះ គេបានកត់សម្គាល់ឃើញថា ឯម សុធី និង នីម នន គេមានថ្វីដៃល្អដូចគ្នា ទាំងបទពិសោធន៍ ទាំងក្បាច់គុន ទាំងកម្លាំងស៊ុហ្វ ដែលអាចឆ្លងផុតវគ្គជម្រុះ ឈានដល់វគ្គផ្តាច់ព្រ័ត្របាន ។ តែយ៉ាងណាក៏ដោយ គេមិនអាចទាយមុនបានថា ការប្រកួតដណ្តើមពានបាយ័នទម្ងន់៥៧គីឡូក្រាមឆ្នាំ២០១៨នេះ មិនដឹងថាធ្លាក់ទៅលើនរណានោះទេ ។
ចំពោះការប្រកួតគូឯកវិញនោះ ឆាយ មាស អ្នកប្រដាល់ក្លិបសំរោងកោងខេត្តបាត់ដំបង ត្រូវគេផ្គូអោយជួបប្រកួតជាមួយ លី កែវឡុង អ្នកប្រដាល់ក្លិបថ្មគោលពោធិសែនជ័យ ដោយប្រកួតគ្នាក្នុងទម្ងន់៦០គីឡូក្រាម។
ពីរនាក់នេះ ពុំធ្លាប់មានប្រវត្តិជួបគ្នាទេកន្លងមក ។ ប៉ុន្តែយ៉ាងណា រវាងពួកគេទាំងពីរ នាក់នេះ ឆាយ មាស គេល្អនិងខ្លាំងជាងលី កែវឡុង តែមិនច្បាស់ថាឆាយ មាសឈ្នះ លី កែវឡុង នោះឡើយ។ការប្រកួតចុងក្រោយរបស់ឆាយ មាស គឺវាយឈ្នះងួន គា អ្នកប្រដាល់ក្លិបតាឡីដំរីគីមានរិទ្ធ ដោយពិន្ទុ (០២មិថុនា២០១៨)៕
Source: Kampuchea Thmey Daily
0 Comments