សៀមរាប ៖ នគរបាលការិយាល័យស៊ើបអង្កេត និងអនុវត្តនីតិវិធី សហការជាមួយនគរបាលផ្នែកគ្រប់គ្រងជនបរទេសក្រុងសៀមរាប ធ្វើការឃាត់ខ្លួនបុរសជនជាតិអង់គ្លេសម្នាក់ ដែលមកស្នាក់នៅខុសច្បាប់ក្នុងក្រុងសៀមរាប។
ហេតុការណ៍នេះ បានកើតឡើងនៅវេលាម៉ោង១៤រសៀលថ្ងៃទី២២ ខែមិថុនា ឆ្នាំ២០១៨ ស្ថិតនៅចំណុចផ្ទះសំណាក់ Mother Home Inn ក្នុងភូមិតាភុល សង្កាត់ស្វាយដង្គំ ក្រុងសៀមរាប។ សមត្ថកិច្ចនគរបាលបានឲ្យដឹងថា ជនជាតិអង់គ្លេសដែលត្រូវឃាត់ខ្លួនគឺមានឈ្មោះ Quarrie Jone Elliott ភេទប្រុស កើតឆ្នាំ១៩៦៤ កាន់លិខិតឆ្លងដែនលេខTI ០០០៩៩៧៥៥ មុខរបរគ្មាន ចូលមកព្រះរាជាណាចក្រកម្ពុជាកាលពីថ្ងៃទី១ ខែឧសភា ឆ្នាំ២០១៦ តាមច្រកព្រលានយន្តហោះអន្តរជាតិសៀមរាប។ ការចាប់នេះ ពីបទស្នាក់នៅដោយខុសច្បាប់ ដោយទិដ្ឋការស្នាក់នៅហួសសុពលភាព។
សមត្ថកិច្ចបានបន្តទៀតថា ដោយលិខិតឆ្លងដែនបានផុតសុពលភាពតាំងពីថ្ងៃទី០៨ ខែតុលា ឆ្នាំ២០១៦មកម៉្លេះ។
ក្រោយពីការឃាត់ខ្លួនជនជាតិអង់គ្លេសរូបនេះ ត្រូវបានសម្រេចបញ្ជូនទៅមណ្ឌលត្រៀមបណ្តេញចេញប្រចាំខេត្តសៀមរាប ដើម្បីចាត់ការបន្តតាមនីតិវិធី៕
Source: Kampuchea Thmey Daily
0 Comments