ព្រះសីហនុ ៖ យ៉ាងហោចណាស់មានមនុស្ស២នាក់ បានស្លាប់ និងម្នាក់ទៀត របួសធ្ងន់ ក្នុងហេតុការណ៍គ្រោះថ្នាក់ចរាចរណ៍រថយន្ត២គ្រឿងបុកគ្នា កាលពីម៉ោង២២និង០០នាទី យប់ថ្ងៃទី០៨ ខែមិថុនា ឆ្នាំ២០១៨ លើផ្លូវជាតិលេខ៤ ចន្លោះបង្គោលគីឡូម៉ែត្រលេខ 34-135 ភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ។
សមត្ថកិច្ចបញ្ជាក់ថា ករណីគ្រោះថ្នាក់រថយន្តបុកគ្នានេះ បង្កដោយរថយន្តម៉ាក ISUZU ចង្កូតស្តាំ ពណ៌ទឹកប្រាក់ ពាក់ស្លាកលេខ ក្រ.ព្រះសីហនុ 2A-2417 មានទិសដៅពីភ្នំពេញទៅខេត្តព្រះសីហនុ បានរេចង្កូតចូលទៅបុករថយន្ត បែន ម៉ាក HYUNDAI ក្បាលពណ៌ស ទ្រុងពណ៌ស ពាក់ស្លាកលេខ ព្រះសីហនុ 3A-6591 ដែលមានទិសដៅបញ្ច្រាសទិសគ្នា បណ្តាលអោយអ្នកជិះក្នុងរថយន្តISUZU មានគ្នា បីនាក់ ក្នុងនោះស្លាប់ ២នាក់ និងរបួសធ្ងន់១នាក់។ ក្រោយកើតហេតុអ្នកបើករថយន្តប្រភេទបែន បានរត់គេចខ្លួនបាត់ភ្លាមៗចេញពីកន្លែងកើតហេតុ។
សមត្ថកិច្ចបានឲ្យដឹងថា ជនរងគ្រោះ មានឈ្មោះ ១/ ឈ្មោះ ម៉េង និត ភេទប្រុស អាយុ ២៤ឆ្នាំ ជនជាតិខ្មែរ ជាអ្នកបើកបរ(ស្លាប់នៅនឹងកន្លែងកើតហេតុ) ២/ ឈ្មោះ មាស ចិត្រា ភេទប្រុស អាយុ ២៣ឆ្នាំ ជនជាតិខ្មែរ(ស្លាប់នៅនឹងកន្លែងកើតហេតុ) ៣/ ឈ្មោះ មិន ណែត ភេទប្រុស អាយុ៣១ឆ្នាំ ជនជាតិខ្មែររបួសធ្ងន់។
សមត្ថកិច្ចបានឲ្យដឹងទៀតថា ជនរងគ្រោះ ទាំង៣នាក់នេះ រស់នៅភូមិធូរត្រេះ ឃុំអូរត្រេះ ស្រុកស្ទឹងហាវ ខេត្តព្រះសីហនុ៕
Source: Kampuchea Thmey Daily
0 Comments