អ្នកនាំពាក្យ​ថា ការ​ថ្លែង​អបអរសាទរ​របស់​លោក​ស្រី Pauline Tamesis គឺជា​ការ​ទទួល​ស្គាល់​លទ្ធផល​នៃ​ស្នាដៃ​របស់​រាជរដ្ឋាភិបាល​កម្ពុជា

ភ្នំពេញ ​៖ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​អះអាងថា ការ​ថ្លែង​អបអរសាទរ​របស់​អ្នកសម្របសម្រួល​របស់​អង្គការសហប្រជាជាតិ លោកស្រី Pauline Tamesis បញ្ជាក់​ច្បាស់​ពី​ការទទួលស្គាល់​លទ្ធផល​នៃ​ស្នាដៃ​របស់​រាជរដ្ឋាភិបាល​កម្ពុជា ដឹកនាំ​ដោយ​សម្តេច​តេ​ជោ​ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដែលមាន​បទពិសោធន៍​​​ដ៏​ជ្រាលជ្រៅ ក្នុងការ​ដឹកនាំ​ប្រទេស​ពី​បាត​ដៃទទេ រហូត​មានការ​អភិវឌ្ឍ​​​រីកចម្រើន​ដូច​សព្វថ្ងៃ​។​
​
លោក សុខ ឥសាន លើកឡើងថា មន្ត្រីជាន់ខ្ពស់​នៃ អសប លោកស្រី Pauline Tamesis បាន​វាយតម្លៃ​ខ្ពស់ និង​ការប្តេជ្ញា​ខ្ពស់​របស់ អសប និង​គាំទ្រ ចំពោះ​កម្ពុជា និង​ភាគី​ពាក់ព័ន្ធ ដែល​សម្រេចបាន​នូវ​សន្តិភាព និង​ការ​អភិវឌ្ឍ​​​ប្រកបដោយ​ចីរភាព​សម្រាប់​ទាំងអស់គ្នា​។ លោកស្រី​ក៏បាន​ថ្លែង​ពី​ជោគជ័យ​របស់​ព្រះរាជាណាចក្រ​កម្ពុជា ដែល​ត្រូវបាន​ជ្រើសតាំង​ជា​អនុប្រធាន​នៃ​មហាសន្និបាត​លើក​ទី​៧៣ នៃ​អសប និង​ត្រូវបាន​ជ្រើសតាំង​ជា​សមាជិក​នៃ​ក្រុមប្រឹក្សា​សេដ្ឋកិច្ច​និង​សង្គម នៃ​អសប នាពេល​ថ្មីៗ​កន្លងមក​នេះដែរ​។
​
តាម​លោក សុខ ឥសាន “​ការ​ថ្លែង​អបអរសាទរ​ចំពោះ​ជោគជ័យ​ដ៏​ឧត្តុង្គឧត្តម ខ្ពង់ខ្ពស់​នេះ បញ្ជាក់​ច្បាស់​ពី​ការទទួលស្គាល់​លទ្ធផល​នៃ​ស្នាដៃ​របស់​រាជរដ្ឋាភិបាល​កម្ពុជា ដឹកនាំ​ដោយ​សម្តេច​តេ​ជោ​ហ៊ុន សែន នាយករដ្ឋមន្ត្រី ដែលមាន​បទពិសោធន៍​​​ដ៏​ជ្រាលជ្រៅ​ក្នុងការ​ដឹកនាំ​ប្រទេស​ពី​បាតដៃ​ទទេ​​រហូត​មានការ​អភិវឌ្ឈ​​​រីកចម្រើន​ដូច​សព្វថ្ងៃនេះ ព្រមទាំង​នាំ​ប្រជាជន​កម្ពុជា ឲ្យ​មាន​ក្តីសង្ឃឹម​តទៅ​អនាគត​ដ៏​ភ្លឺស្វាង​របស់ខ្លួន​។ ទន្ទឹមនឹងនេះ ការវាយតម្លៃ​ប្រកបដោយ​សត្យានុម័ត​នេះ គឺ​ប្រៀបបាន​នឹង​វាយ​សំពង​ទៅលើ​ពួក​មជ្ឈដ្ឋាន​ប្រឆាំង​យ៉ាងដំណំ ដែល​ពួកគេ​តែងតែ​និយាយ​ឃោសនា​មួលបង្កាច់​សភាព​ការណ៍​ពិត​នៅ​កម្ពុជា មើលទៅ​ហាក់ដូចជា​កំពុងស្ថិត​នៅក្រោម​ភ្នក់ភ្លើងសង្គ្រាម ប្រជាជន​កំពុង​រត់លូន​ចេញពី​ដំបូល​សន្តិភាព ដែល​ផ្ទុយ​ពី​ការពិត​ទាំងស្រុង​”​។​
​
លោក សុខ ឥសាន លើកឡើង​បែបនេះ បន្ទាប់ពី​អ្នកសម្របសម្រួល​របស់​អង្គការសហប្រជាជាតិ​លោកស្រី Pauline TAMESIS បាន​អបអរសាទរ​កម្ពុជា ដែល​ត្រូវបាន​ជ្រើសតាំង​ជា​អនុប្រធាន​សម័យប្រជុំ​លើក​ទី​៧៣ នៃ​មហាសន្និបាត និង​ជា​សមាជិក​ក្រុមប្រឹក្សា​សេដ្ឋកិច្ច សង្គម​របស់​អង្គការសហប្រជាជាតិ (UN) ពីព្រោះ​តំណែង​នេះ បាន​បង្ហាញ​ឲ្យ​ឃើញ​ពី​ការដឹកនាំ ការ​ប្តេជ្ញាចិត្ត និង​កិច្ច​ខិតខំ​ប្រឹងប្រែង​របស់​រាជ​រដ្ឋាភិបាល​កម្ពុ​ជា ដើម្បី​សម្រេច​ឲ្យ​បាន​នូវ​គោលដៅ​អភិវឌ្ឍ​ជាតិ​។​
​នៅក្នុង​លិខិត​ចុះ​ថ្ងៃទី​១៩ ខែមិថុនា ឆ្នាំ​២០១៨ លោកស្រី Pauline TAMESIS បាន​លើកឡើងថា ក្នុងឋានៈ​ជា​តំណាង​អង្គការសហប្រជាជាតិ​នៅ​កម្ពុជា សូម​សម្តែង​អំណរ​សាទរ​យ៉ាង​កក់ក្តៅ​បំផុត សម្រាប់​ការ​ជ្រើសតាំង​ក​ម្ពុ​ជា​ជា​អនុប្រធាន​សម័យប្រជុំ​លើក​ទី​៧៣ នៃ​មហាសន្និបាត​អង្គការសហប្រជាជាតិ និង​សម្រាប់​តួនាទី​ជា​សមាជិក​ក្រុមប្រឹក្សា​សេដ្ឋកិច្ច និង​សង្គម​របស់​អង្គការសហប្រជាជាតិ មាន​អាណត្តិ​មួយឆ្នាំ ចាប់ផ្តើម​ពី​ឆ្នាំ​២០១៩។

លោកស្រី Pauline TAMESIS បាន​បញ្ជាក់ថា “​យើងខ្ញុំ​ចាត់ទុក​ឱកាស​ទាំងពីរ​នេះ ជា​កាលានុវត្តភាព​ដ៏​សំខាន់ ដើម្បី​បង្ហាញ​ឲ្យ​ឃើញ​ពី​ការដឹកនាំ ការប្តេជ្ញាចិត្ត និង​កិច្ចខិតខំ​ប្រឹងប្រែង​រប​ស់រាជ​រដ្ឋាភិបាល ដើម្បី​សម្រេច​ឲ្យ​បាន​នូវ​គោលដៅ​អាទិភាព​នៃ​កិច្ច​អភិវឌ្ឍ​ជាតិ និង​ដើម្បី​សម្រេច​គោលដៅ​អភិវឌ្ឍន៍​ប្រកបដោយ​ចីរភាព​សកល​”​។ ជាមួយគ្នា​នោះ លោកស្រី Pauline TAMESIS បាន​សំដែង​នូវ​ការ​ប្តេជ្ញា​របស់​អង្គការសហប្រជាជាតិ​នៅ​កម្ពុជា គាំទ្រ​រាជរដ្ឋាភិបាល ភាគី​ពាក់ព័ន្ធ​ទាំងអស់ និង​ប្រជាជន​កម្ពុជា ក្នុងការ​សម្រេច​បាន​នូវ​សន្តិភាព និង​ការអភិវឌ្ឍ​ប្រកបដោយ​ចីរភាព​សំរាប់​ទាំងអស់គ្នា​។​
​
ព្រះរាជាណាចក្រ​កម្ពុជា​ត្រូវបាន​ជ្រើសតាំង​ជា​អនុប្រធាន​សម័យប្រជុំ​លើក​ទី​៧៣ នៃ​មហាសន្និបាត​អង្គការសហប្រជាជាតិ នៅ​ថ្ងៃទី​៥ ខែមិថុនា ឆ្នាំ​២០១៨ និង​ជា​សមាជិក​ក្រុមប្រឹក្សា​សេដ្ឋកិច្ច និង​សង្គម​របស់​អង្គការសហប្រជាជាតិ នៅ​ថ្ងៃទី​១៣ ខែមិថុនា ឆ្នាំ​២០១៨ ដោយ​សំឡេង​គាំទ្រ​១៨៣ លើ​១៨៨៕
​

Source: Kampuchea Thmey Daily