បណ្ដាញផ្សព្វផ្សាយអូស្ត្រាលី ABC បានរាយការណ៍កាលពីថ្ងៃចន្ទថា អ្នកមុជទឹកជនជាតិអូស្ត្រាលី២នាក់ ដែលជួយនាំក្រុមបាល់ទាត់វ័យក្មេងចេញពីរូងភ្នំថៃគឺបានទទួលអភ័យឯកសិទ្ធិផ្នែកការទូតមុនពេលការជួយសង្គ្រោះក្នុងករណីដែលខ្លួនបរាជ័យ។
ក្រុមបាល់ទាត់ “ជ្រូកព្រៃ” បានជាប់គាំងនៅក្នុងរូងភ្នំភាគខាងជើងប្រទេសថៃអស់រយៈពេល១៨ថ្ងៃមុនពេលទាហានជើងទឹកថៃនិងអ្នកជំនាញរូងភ្នំអន្តរជាតិបាននាំពួកគេចេញមកក្រៅនៅក្នុងប្រតិបត្តិការដ៏គ្រោះថ្នាក់បំផុតរយៈពេលបីថ្ងៃ។
អ្នកជំនាញឈ្មោះ Richard Harris និងដៃគូមុជទឹករបស់គាត់ឈ្មោះ Craig Challen ដែលសុទ្ធតែជាអ្នកជំនាញខាងមុជទឹកគឺបានដើរតួនាទីយ៉ាងសំខាន់នៅក្នុងការជួយសង្គ្រោះនោះ។
ABC បានរាយការណ៍ថា ការចូលរួមរបស់ពួកគេបានធ្វើឡើងបន្ទាប់ពីការចរចាររវាងអាជ្ញាធរអូស្ត្រាលីនិងថៃបានផ្តល់ឲ្យពួកគេនូវអភ័យឯកសិទ្ធិផ្នែកការទូតដើម្បីការពារពួកគេពីការកាត់ទោសដែលអាចទៅបានបើសិនជាមានរឿងអ្វីកើតឡើងក្នុងពេលបេសកកម្មដ៏គ្រោះថ្នាក់នោះ។
ក្រសួងការបរទេសអូស្ត្រាលីបានបដិសេធបញ្ជាក់ឬច្រានចោលរបាយការណ៍នេះ។
លោក Challen បានប្រាប់បណ្តាញសារព័ត៌មានក្នុងស្រុកបន្ទាប់ពីវិលត្រឡប់មកមាតុប្រទេសវិញថា នេះជាបេសកកម្ម “ស្លាប់រស់” ហើយអ្នកឯកទេសមុជទឹកមិនប្រាកដប្រជាទេថាពួកគេអាចជួយសង្គ្រោះក្មេងប្រុសទាំង១២នាក់និងគ្រូបង្វឹករបស់ពួកគេបានដោយជោគជ័យដែរឬអត់។
លោកបានប្រាប់កាសែត Sunday Times ក្នុងទីក្រុង Perth ថា “វាមិនមានគ្រោះថ្នាក់ដល់ពួកយើងទេប៉ុន្តែខ្ញុំមិនអាចបញ្ជាក់បានថាតើវាមានគ្រោះថ្នាក់ប៉ុណ្ណោះទេសម្រាប់ក្មេងៗ”។
លោក Challen បានបន្ថែមថា កុមារទាំងនោះមិនត្រូវបានគេប្រាប់ឲ្យដឹងថាតើមានអ្វីកំពុងកើតឡើងនោះទេដើម្បីការពារពួកគេពីភាពភ័យខ្លាចនៅពេលពួកគេត្រូវបាននាំដោយអ្នកមុជទឹកនៅតាមច្រកតូចៗចេញពីរូងភ្នំ។
លោកបាននិយាយថា “ពួកគេមានថ្នាំ។ យើងមិនអាចឲ្យកុមារមានភាពភ័យខ្លាចបានទេនៅទីនោះ។ ពួកគេនឹងសម្លាប់ខ្លួនឯងហើយអាចសម្លាប់អ្នកជួយសង្គ្រោះផងដែរ”។
អ្នកមុជទឹកបាននិយាយថា ពួកគេបានហ្វឹកហាត់នៅខាងលើជាមួយកុមារក្នុងតំបន់នៅជិតអាងទឹកមួយក្បែរនោះមុនពេលអនុវត្តជាមួយក្មេងប្រុសដែលជាប់ក្នុងរូងភ្នំ៕ AFP
Source: Kampuchea Thmey Daily
0 Comments