បាត់ដំបង ៖ ជនសង្ស័យម្នាក់ដែលជាមុខសញ្ញាប្រើអំពើហិង្សាដោយមានស្ថានទម្ងន់ទៅលើភរិយារបស់ខ្លួននៅឯរាជធានីភ្នំពេញ ហើយបានរត់គេចខ្លួនមកសំងំយ៉ាងសុខស្រួលនៅក្នុងទឹកដីខេត្តបាត់ដំបង ត្រូវបានកម្លាំងចម្រុះធ្វើការសហការចុះវែកមុខ និងចាប់ខ្លួនបានហើយដើម្បីនាំខ្លួនត្រឡប់ទៅកាន់ទីក្រុងភ្នំពេញវិញ។
លោកឧត្តមសេនីយ៍ត្រី ជេត វណ្ណនីបានឲ្យដឹងថា ជនសង្ស័យឈ្មោះ ហ៊ាន រិទ្ធី ភេទប្រុស អាយុ២៨ឆ្នាំ រស់នៅភូមិព្រៃទា១ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានប្រើហិង្សាដោយប៉ងសម្លាប់ប្រពន្ធកាលពីថ្ងៃទី៨ ខែកក្កដា ឆ្នាំ២០១៨ នៅភូមិសង្កាត់ ដែលខ្លួនជនសង្ស័យរស់នៅ ហើយបានរត់ទៅលាក់ខ្លួននៅខេត្តបាត់ដំបងយ៉ាងស្ងៀមស្ងាត់។
បន្ទាប់ពីមានការសហការរវាងកម្លាំងនាយកដ្ឋានព្រហ្មទណ្ឌកម្រិតធ្ងន់ នៃស្នងការដ្ឋានរាជធានីភ្នំពេញ និងដោយមានការណែនាំពីលោកឧត្តមសេនីយ៍ទោ អ៊ុច សុខុន ស្នងការនគរបាលខេត្ត ព្រមទាំងមានការឯកភាពពីលោក ព្រះរាជអាជ្ញា នួន សាន ផងនោះ ទើបនៅថ្ងៃទី ១៩ ខែកក្កដា ឆ្នាំ២០១៨ នេះ សមត្ថកិច្ចចម្រុះ បានចេញប្រតិបត្តិការទៅកាន់ភូមិបួនជួរ ឃុំស្នឹង ស្រុកបាណន់ ខេត្តបាត់ដំបង ដើម្បីចាប់ខ្លួនជនសង្ស័យខាងលើដែលកំពុងគេចខ្លួនមកសំងំនៅទីនេះ។
តាមការឲ្យដឹងពីប្រភពមួយចំនួនបាននិយាយថា ដើមចមអំពើហិង្សាក្នុងគ្រួសារនេះគឺចេញមកពីភ្លើងប្រច័ណ្ឌដោយបុរសជាស្វាមីបានចោទភរិយាខ្លួនដែលកំពុងធ្វើការក្នុងរោងចក្រថា នាងបានផិតក្បត់ទៅមានប្រុសថ្មី ខណៈដែលសព្វថ្ងៃពួកគេមានកូនពីរនាក់ទៅហើយនោះ។
ដោយសារបញ្ហានេះហើយ ដែលធ្វើឲ្យបុរសជាប្តីព្យាយាម និងគម្រាមជាច្រើនលើកច្រើនសាថា នឹងសម្លាប់នាងទីបំផុតជនរូបនេះបានប្រើប្រាស់កាំបិតខ្វែវជាអាវុធកាប់ទៅលើកញ្ចឹង.កប្រពន្ធពីក្រោយបណ្តាលឲ្យរយៈយ៉ាងធំ តែជាសំណាងល្អដែលបច្ចុប្បន្នក្រុមគ្រូពេទ្យបានសង្គ្រោះអោយរួចផុតពីសេចក្តីស្លាប់ហើយ។
បច្ចុប្បន្នជនសង្ស័យ ត្រូវបានសមត្ថកិច្ចនៃស្នងការខេត្តបាត់ដំបងបញ្ជូនទៅកាន់រាជធានីភ្នំពេញ ដើម្បីធ្វើការចាត់វិធានការណ៍បញ្ជូនទៅកាន់តុលាការ ចាត់ការតាមនីតិវិធី៕
Source: Kampuchea Thmey Daily
0 Comments