ក្លិបបឹងកេតអែហ្វស៊ី ដែលកំពុងឈរកំពូលតារាងពានរង្វាន់លីគកំពូលកម្ពុជា Metfone Cambodian League 2018 បានប្រកាសចុះកិច្ចសន្យានាំយកតារាចម្រៀងបែបយុវវ័យម្នាក់ចូលរួមជាសមាជិកក្រុម កាលពីពេលថ្មីៗ ខណៈក្រុមមួយនេះ ត្រូវការពិន្ទុបន្ថែមនៅជើងទី២ ដើម្បីការពារតំណែងជើងឯកផងដែរ។
អ្នកចម្រៀងដែលមានឈ្មោះពេញ ខំ លន់ចេន បានលើកឡើងថា ខ្លួនមានចំណុចខ្វះខាតជាច្រើនដោយក្នុងនោះមាន បញ្ហាកម្លាំង ព្រោះទើបចូលហាត់ និងទី២គឺភាពស៊ាំនឹងទីលាននិងការយល់ពីប្លង់លេងរបស់លោកគ្រូបង្វឹក។ រូបគេចង់ពង្រឹងសមត្ថភាពដែលខ្វះខាតទាំងប៉ុន្មានសិន មុនគិតរឿងដណ្តើមកៅអីជម្រើស១១នាក់ដំបូង។
ក្រៅពីអាជីពជាតារាចម្រៀងនៅក្រុមតន្ត្រី Mustache Band ចេន មានទេពកោសល្យនិងចំណូលចិត្តខ្លាំងលើវិស័យកីឡាជាពិសេសគឺកីឡាបាល់ទាត់តែម្តង ខណៈនេះជាចំណងចំណូលចិត្តរបស់ខ្លួនតាំងពីក្មេង។ ក្រុមតន្ត្រី Mustache Band មានសមាជិក៥នាក់ ខណៈ ចេន ជាសមាជិកម្នាក់ដែរ។ ក្រុមតន្ត្រីបែបយុវវ័យនេះ ធ្លាប់ចេញបទចម្រៀងពិរោះៗជាច្រើនបទដូចជា ពាក្យថាសង្សារចាស់, មិនអាចទៅរួច, ប្រុសម្នាក់នេះសំខាន់នៅពេលណា ជាដើម។
តារាចម្រៀងដែលអាចច្រៀងជាភាសាខ្មែរនិងថៃយ៉ាងពីរោះរូបនេះ លើកឡើងដែរថា «តាមពិតទៅ ក្ដីស្រមៃរបស់ខ្ញុំគឺដូចគ្នារវាងបាល់ទាត់និងសិល្បៈហ្នឹង ប៉ុន្តែអ្វីដែលខ្ញុំចង់ធ្វើវាហាក់ចៃដន្យដែលអាជីពតន្ត្រីដើរមុន ហើយក៏ធីបបាល់ទាត់ទុកសិន។ តែទាំងពីរនេះខ្ញុំស្រលាញ់ខ្លាំងដូចគ្នា។ ខ្ញុំស្រលាញ់បាល់ទាត់តាំងពីតូច និងលេងបាល់ទាត់តាំងពីតូច ហើយតែងលេងបាល់បែកញើសៗដើម្បីសុខភាពជាប្រចាំ។ តែគ្រប់យ៉ាងឥឡូវមកដល់ហើយ ទាំងឱកាសទាំងអី គឺពេលវេលាបានមកដល់ហើយ។ អ្វីដែលនៅសល់គឺអាស្រ័យលើខ្លួនឯងដែលត្រូវខំប្រឹង»។
ក្រុមបឹងកេត មានកីឡាករចេញចូលច្រើន ដោយក្នុងនោះកីឡាករដែលសម្រេចចាកចេញពីក្លិបមានដូចជា រស់ សំអឿន ទៅកាន់វិសាខា ស៊ូ យ៉ាទី ទៅណាហ្គាវើល សុខ សុវណ្ណ ទៅវិសាខា ឃួន ឡាបូរ៉ាវី ទៅលីគលំដាប់ទី៣ប្រទេសថៃ។ ងាកមកមើលកីឡាករដែលសម្រេចចូលរួមជាមួយក្រុមមានដូចជា ចាន់ វឌ្ឍនាកា, យុគ្គ អៈអារី, កែ វណ្ណៈ, ពុំ បារាំង ជាដើម៕
Source: Kampuchea Thmey Daily
0 Comments