បន្ទាយមានជ័យ ៖ កាលពីព្រឹក ថ្ងៃទី១៨ ខែកក្កដា ឆ្នាំ២០១៨នេះ បុរសម្នាក់បានរៀបចំកម្មពិធីឡើងផ្ទះ ម្តាយបានក្រោកពីព្រឹកបោសក្នុងរោងបុណ្យស្រាប់តែប៉ះចំតំណខ្សែភ្លើងបណ្តាលឲ្យឆក់ស្លាប់ពេលបញ្ជូនទៅមន្ទីរពេទ្យ នៅក្នុងភូមិ អូរវែង ឃុំតាបែន ស្រុកស្វាយចេក ខេត្តបន្ទាយមានជ័យ។
លោកនាយប៉ុស្តិ៍នគរបាលរដ្ឋបាលឃុំតាបែន បានប្រាប់អ្នកយកព័ត៌មានប្រាប់ឲ្យដឹងថា ស្ត្រីរងគ្រោះ មានឈ្មោះ គង់ ណាគ្រី អាយុ៥១ ឆ្នាំ រស់នៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។
លោកនាយប៉ុស្តិ៍នគរបាលរដ្ឋបាលបានបញ្ជាក់ឲ្យដឹងទៀតថា មុនពេលកើតហេតុនោះស្ត្រីរងគ្រោះបានក្រោកពីព្រឹកបោសសំរាម នៅក្នុងរោងពិធីសម្រាប់ទទួលភ្ញៀវ ពេលកំពុងតែបោសគាត់បានឃើញព្រីខ្សែភ្លើងដែលបែក ត្រូវបានគេរុំស្របថង់និងយកស្បៃសម្រាប់ហាលស្រូវមកគ្របពីលើ ជួនជាស្បៃនោះសើមត្រូវទឹកភ្លៀងផងនោះ គាត់បានយកដៃទៅទាញដើម្បីបោសសំរាមបន្តក៏ឆក់ បណ្តាលឲ្យរងរបួសធ្ងន់ ក្រោយពីកើតហេតុភ្លាមកូនៗបានដឹកម្តាយទៅកាន់មន្ទីរពេទ្យតែអកុសល
ម្តាយបានស្លាប់ពេលបញ្ជូនដល់ទៅមន្ទីរពេទ្យ។
សពស្ត្រីរងគ្រោះ ត្រូវបានរៀបចំធ្វើបុណ្យតាមប្រពៃណី កូនចៅយំអោបសពម្តាយស្ទើរគាំងបេះដូងស្លាប់សែនសោកស្តាយម្តាយជាពន់ពេក កម្មពិធីឡើងផ្ទះសោះក្លាយជាកម្មវិធីបុណ្យសពម្តាយទៅវិញ៕
Source: Kampuchea Thmey Daily
0 Comments