ភ្នំពេញ ៖ ក្មេងស្ទាវ២ក្រុម បង្កជម្លោះវាយតប់គ្នា ដោយសារគ្រាន់តែមើលមុខគ្នាចំប៉ុណ្ណោះ ហើយបានបង្កអោយរងរបួសរៀងៗខ្លួន និងត្រូវបានប៉ូលិសមកចាប់ឃុំខ្លួនទៀតផង ចោទពីបទអុកឡុកក្នុងមូលដ្ឋានបង្កអសន្តិសុខសង្គម និងបង្កអំពើហិង្សារដោយចេតនា។
ទំនាស់នេះ បានកើតឡើងនៅថ្ងៃទី១៥ ខែកក្កដា ឆ្នាំ២០១៨ នៅក្នុងក្លឹបស្នូគឃឺរ(ក្លឹបបុកប៊ីយែ)មួយកន្លែង នៅក្នុងភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ក្រុមក្មេងស្ទាវខាងលើ មាន២ក្រុម ក្រុមទី១ មានគ្នា៣នាក់ ១. ឈ្មោះ លីន រ៉ាហ្វីត អាយុ១៨ឆ្នាំ គ្មានមុខរបរ ស្នាក់នៅភូមិច្រេស សង្កាត់គោកឃ្លាង។ ២.ឈ្មោះទុយ តុង អាយុ១៩ ឆ្នាំ ស្នាក់នៅផ្ទះជួល ភូមិច្រេស។ ៣.ឈ្មោះ ស្រូន វិន អាយុ២៩ឆ្នាំ មុខរបរកម្មករ ស្នាក់នៅផ្ទះជួលភូមិច្រេស សង្កាត់គោកឃ្លាង។ ក្រុមទី២មានគ្នា២នាក់ ១.ឈ្មោះ ឃឹម រស្មី អាយុ២៥ឆ្នាំ មុខរបរកម្មកររោងចក្រ ស្នាក់នៅផ្ទះជួល ភូមិក្រុងថ្មី សង្កាត់គោកឃ្លាង។ ២.ឈ្មោះ ជឿន ប៉េ អាយុ១៨ឆ្នាំ មុខរបរ កម្មករ ស្នាក់ផ្ទះជួល ភូមិក្រុងថ្មី សង្កាត់គោកឃ្លាង ខណ្ឌសែនសុខ។
ប្រភពព័ត៌មានពីកម្លាំងសមត្ថកិច្ចនគរបាលមូលដ្ឋានបានអោយដឹងថា ៖ នៅមុនពេលកើតហេតុ ភាគីក្រុមទី១ បានកំពុងតែលេងបុកប៊ីយែរ នៅចំណុចទីតាំងខាងលើ ក្រោយមកក្រុមទី២ បានចូលមកលេងដែរ ដោយសម្លឹងមើលមុខក្រុមទី២ ក្នុងលក្ខណៈ ឌឺដង ដោយមើលហើយមើលទៀត។ ភ្លាមនោះក្រុមទី១ឈ្មោះ លីនរ៉ាហ្វីត និង ឈ្មោះទុយ តុង បានជិះម៉ូតូចេញមកក្រៅបានប្រទះឃើញដែកទីបជ្រុង២កំណាត់ ក៏ចុះរើសយកមក រួចជិះម៉ូតូបកក្រោយវិញ ទៅវាយលើក្រុមទី២ ហើយក្រុមទី២ បានយកដងកឺ ឈើដំបងសម្រាប់បុកគ្រាប់ស្នូកឃឺរ វាយតប់គ្នាទៅវិញទៅមកផ្អើលគេឯង ហើយម្ចាស់តាបស្នូកឃឺរ បានទូរស័ព្ទប្តឹងប៉ូលិសមូលដ្ឋានអោយមកបង្ក្រាបភ្លាមតែម្តង ដោយប្រមូលបានដំបងចំនួន៧កំណាត់។
ជាលទ្ធផល គូភាគីទាំង២ បានរងរបួសបែកក្បាលរៀងខ្លួនម្នាក់ៗដេរជិត២០ថ្នេរ ហើយក៏ត្រូវបានប៉ូលិសចាប់ឃុំខ្លួនទាំងអស់គ្នាដាក់ទ្រុងដែក អោយមូសខាំ នៅក្នុងគុក នៃអធិការដ្ឋាននគរបាលខណ្ឌសែនសុខ ដើម្បីរៀបចំឯកសារបញ្ជូនទៅតុលាការកាត់សេចក្តីពីបទអុកឡុកក្នុងមូលដ្ឋាន បង្កអសន្តិសុខសង្គម៕
Source: Kampuchea Thmey Daily
0 Comments