ប្រធានាធិបតី​ជាប់ឆ្នោត​ម៉ិ​ក​ស៊ិ​ក​ កាត់បន្ថយ​ប្រាក់ខែ​របស់​ខ្លួន

ប្រធានាធិបតី​ម៉ិ​ក​ស៊ិ​កលោក​ Andres Manuel Lopez Obrador បាន​និយាយ​កាលពី​ថ្ងៃអាទិត្យ​ថា គាត់​នឹង​ទទួល​ប្រាក់ខែ​ត្រឹមតែ​ពាក់​កណ្តាល​ប៉ុណ្ណោះ​ បើ​ធៀប​ទៅ​នឹង​អ្នក​កាន់​តំណែង​មុន​របស់​គាត់​នៅ​ពេល​ដែល​គាត់​ឡើង​កាន់​តំណែង​ក្នុង​ខែធ្នូ ​ដែល​ជា​ផ្នែក​មួយ​នៃ​កិច្ចខិតខំ​ប្រឹងប្រែង​រឹតត្បិត​នៅក្នុង​រដ្ឋាភិបាល។

​គាត់​បាន​ប្រាប់​ក្រុមអ្នកកាសែត​នៅមុខ​ទីស្នាក់ការ​យុទ្ធនាការ​របស់គាត់​ថា “​អ្វីដែល​យើង​ចង់បាន​គឺ​ថវិកា​បាន​ទៅដល់​អ្នក​គ្រប់គ្នា​”​។​

លោក Lopez Obrador បាន​និយាយថា គាត់​នឹង​ទទួលយក​ប្រាក់​ចំនួន​១០៨,០០០​ប៉េ​សូ (៥,៧០៧​ដុល្លារ​) ក្នុង​មួយខែ​ហើយ​ថា គ្មាន​មន្ត្រី​សាធារណៈ​ណា​ម្នាក់​នឹង​អាច​រកប្រាក់​ចំណូល​បាន​ច្រើនជាង​ប្រធានាធិបតី​ទេ​ក្នុងអំឡុង​អាណត្តិ​៦​ឆ្នាំ​របស់គាត់​។ ក្រុម​ផ្ទេរអំណាច​បាន​ឲ្យ​ដឹងថា មេដឹកនាំ​ម៉ិ​ក​ស៊ិ​ក​បច្ចុប្បន្ន​លោក Enrique Pena Nieto រកប្រាក់​បាន​២៧០,០០០​ប៉េ​សូ​ក្នុង​មួយខែ​។​

លោក Lopez Obrador បាន​និយាយថា គាត់​ចង់​កាត់បន្ថយ​ប្រាក់ខែ​របស់គាត់​បន្ថែម​ទៀត​ប៉ុន្តែ​គាត់​មិន​ចង់​ធ្វើ​ឲ្យ​មានការ​ខឹងសម្បា​ក្នុងចំណោម​សមាជិក​គណៈរដ្ឋមន្ត្រី​នាពេល​អនាគត​ទេ​ដែល​ក្នុងករណី​មួយចំនួន​ពួកគេ​អាច​ចាកចេញ​ពីមុខ​តំណែង​ងាក​ទៅរក​វិស័យ​ឯកជន​និង​មុខតំណែង​នានា​ដែល​ទទួលបាន​ប្រាក់​ច្រើនជាង​មន្ត្រី​សាធារណៈ។

លោក​បានលើកឡើង​ជាថ្មី​អំពី​ការសន្យា​អំឡុង​យុទ្ធនាការ​ក្នុងការ​កាត់បន្ថយ​ជំនួយ​សម្រាប់​មន្ត្រី​រដ្ឋាភិបាល​ថ្នាក់ខ្ពស់​ដូចជា​តៃកុង​ឡាន អង្គរក្ស​និង​ការធានារ៉ាប់រង​ផ្នែក​វេជ្ជសាស្ត្រ​ជា​លក្ខណៈ​ឯកជន​ជាដើម​។​

លោក​បាន​និយាយថា លំនៅដ្ឋាន​ប្រធានាធិបតី​នឹង​ក្លាយជា​មជ្ឈមណ្ឌល​វប្បធម៌​មួយ​ហើយ​អតីត​ប្រធានាធិបតី​នឹងមិន​ទទួលបាន​ប្រាក់​សោធន​និវត្តន៍​ទៀត​ទេ​។​

ក្នុងពេល​ជាមួយគ្នានេះដែរ លោក​បាន​អះអាង​អំពី​ការសន្យា​ដើម្បី​លុបបំបាត់​អំពើពុករលួយ​។ ប្រទេស​ម៉ិ​ក​ស៊ិ​កជាប់​ចំណាត់ថ្នាក់​ទី​១៣៥​ក្នុងចំណោម​១៨០​ប្រទេស​នៅក្នុង​ស​ន្ទ​ស្សន៍​ការយល់ដឹង​អំពើពុករលួយ​ឆ្នាំ​២០១៧​របស់​អង្គការ​តម្លាភាព​អន្តរជាតិ​៕ AP

​

Source: Kampuchea Thmey Daily