ភ្នំពេញ ៖ បុរសឈាមក្ដៅបានចិញ្ចឹមចិត្តប្រចណ្ឌប្រពន្ធរបស់ខ្លួនដាក់ប្រុសផ្សេង ទោះបីប្រពន្ធប្រកែក និងបដិសេធជាច្រើនលើកច្រើនសាយ៉ាងណាក៏ដោយ ក៏ប្ដីមិនជឿ លុះដល់ថ្ងៃកើតហេតុទាញកាំបិតផ្គាក់កាប់ប្រពន្ធជាច្រើនកាំបិតបណ្ដាលឲ្យរបួសធ្ងន់ រួចគេចខ្លួនទៅសម្ងំនៅឯខេត្តបាត់ដំបងបានរយៈពេល១១ថ្ងៃ ទើបសមត្ថកិច្ចសហការចាប់ខ្លួនបាននាំយកមកកាន់ទីកន្លែងកើតហេតុនៅខណ្ឌពោធិ៍សែនជ័យវិញ។
ការចាប់ខ្លួនជនដៃដល់នេះ ធ្វើឡើងកាលពីវេលាម៉ោង១១និង២៥នាទីថ្ងៃត្រង់ថ្ងៃទី១៩ ខែកក្កដា ឆ្នាំ២០១៨ ស្ថិតនៅក្នុងភូមិបួនជួរ ឃុំបឹងប្រិយ៍ ស្រុកបាណន់ ខេត្តបាត់ដំបង។
នគរបាលបានឲ្យដឹងថា ជនសង្ស័យមាន ឈ្មោះហ៊ន រិទ្ធី ភេទប្រុស អាយុ២៨ឆ្នាំ មុខរបរកម្មករសំណង់ស្នាក់នៅផ្ទះជួលក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យមានស្រុកកំណើតនៅភូមិព្រៃបឹង ឃុំវាលពន់ ស្រុកថ្ពងខេត្តកំពង់ស្ពឺ បានកាប់ប្រពន្ធឈ្មោះត្រេន ពៅ អាយុ៣៣ឆ្នាំ មុខរបរជាកម្មការិនីរោងចក្រកាត់ដេរហែនសាំ ស្នាក់នៅបន្ទប់ជួលក្នុងភូមិព្រៃទាសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានបានឲ្យដឹងថា ករណីនេះបានកើតឡើងកាលពីវេលាម៉ោង១២និង៥០នាទីរសៀលថ្ងៃទី៨ ខែកក្កដា ឆ្នាំ២០១៨ នៅក្នុងបន្ទប់ផ្ទះជួលនៅក្នុងភូមិព្រៃទា សង្កាត់ចោមចៅ៣។
ដោយបុរសជាប្ដីបានប្រចណ្ឌប្រពន្ធរបស់ខ្លួនជាមួយប្រុសផ្សេង ហើយបានតាមរករឿងនាងជាប្រពន្ធជាបន្តបន្ទាប់ ដោយនៅមុនពេលកើតហេតុវេលាល្ងាចថ្ងៃទី៧ខែកក្កដា បុរសជាប្ដីបានចោទប្រពន្ធថានាងក្បត់ចិត្តទៅមានប្រុសថ្មី ហើយពេលនោះនាងបានបដិសេធថា អត់មានទេ ស្រាប់តែប្ដីបានយកដែកឆាបចុងស្រួចមកគំរាមចាក់សម្លាប់នាង ប៉ុន្តែពេលនោះមិនហ៊ានចាក់ទេរួចក៏បានស្ងប់ស្ងាត់ទៅវិញ។
ប្រភពបានបន្តទៀតថា លុះដល់ថ្ងៃកើតហេតុ ប្ដីបានរករឿងនិងចោទនាងថា មានប្រុសថ្មីបន្តទៀតចំណែក នាងដែលមិនបានក្បត់ចិត្តប្ដីផងនោះ ត្រូវទទួលរងការចោទប្រកាន់ទាំងអយុត្តិធម៌បែបនេះ ក៏បានប្រកែកយ៉ាងដាច់អហង្ការនិងឈ្លោះប្រកែកគ្នាទៀតផង។ ខណៈនោះប្ដីដែលនៅតែមិនជឿលើចិត្តប្រពន្ធសោះនោះ បានស្ទះទៅទាញកាំបិតផ្គាក់មកកាប់រូបនាងជាច្រើនកាំបិតប៉ងសម្លាប់ តែមិនស្លាប់ រួចហើយបានគេចខ្លួនបាត់តែម្ដង។
ចាប់ពីពេលនោះមក សមត្ថកិច្ចជំនាញបានធ្វើការស្រាវជ្រាវសហការរហូតមកដល់ថ្ងៃទី១៩ ខែកក្កដា គឺរយៈពេល១១ថ្ងៃក្រោយពេលកើតហេតុ ទើបឈានដល់ការចាប់ខ្លួនតែម្ដង។ នៅចំពោះមុខសមត្ថកិច្ចចម្លើយគ្មានអ្វីក្រៅពីពាក្យថា ខឹងព្រោះប្រចណ្ឌនោះឡើយ ពេលនេះកំពុងត្រូវបានកសាងសំណុំរឿងបញ្ជូនទៅតុលាការចាត់ការតាមច្បាប់៕
Source: Kampuchea Thmey Daily
0 Comments